21-гадовы бацька малалетняга сына асуджаны за згвалтаванне і забойства
Кірыл Паборцаў атрымаў 20 гадоў калоніі ўзмоцненага рэжыму за тое, што ў жніўні 2014 года згвалтаваў і забіў 18-гадовую Вікторыю Ясель.
![](http://d3kcf2pe5t7rrb.cloudfront.net/img/w732d4webp1/photos/z_2015_06/sud0106-vqloo.jpg.webp)
Працэс, які вяла суддзя Аляхновіч, завяршыўся сёння ў Мінску (суд быў закрытым, і ў залу пусцілі толькі на прысуд). Паборцаў павінен таксама сплаціць 300 млн маральнай шкоды сваякам загінулай дзяўчыны. Пракурор прасіў для абвінавачанага 22 гады калоніі, але апратэстоўваць такое пакаранне не збіраецца.
![](http://d3kcf2pe5t7rrb.cloudfront.net/img/w732d4webp1/photos/z_2015_06/sud01062-g8gh8.jpg.webp)
Вядома што Паборцаў — ураджэнец Оршы, жанаты, мае на ўтрыманні малалетняга сына. Раней не судзімы. Пражываў у в. Дубаўляны Мінскага раёна.
Здарэнне адбылося 20 жніўня 2014 года. Вікторыя знікла ў Мінску пасля працы. Пазней выявілася, што яе ў той вечар падвозіў Паборцаў на сваім «Мерседэсе». Затрымалі маладога чалавека ўжо 26 жніўня. «Мерседэс», на якім ён падвозіў ахвяру, канфіскуюць, калі цягам месяца сума шкоды не будзе сплачана.
![](http://d3kcf2pe5t7rrb.cloudfront.net/img/w732d4webp1/photos/z_2015_06/sud01063-8q4qt.jpg.webp)
Маці хлопца заявіла: «Я веру, што мой сын не гвалтаўнік і не забойца. Бог ім суддзя».
Каментары