Deputat prapanavaŭ stvaryć TelehramBY i InstahramBY — kab pierapiski biełarusaŭ nie zmahli čytać śpiecsłužby ZŠA
Na takuju dumku Aleha Cylko padšturchnuła zatrymańnie Paŭła Durava ŭ Francyi. Jon upeŭnieny, što za hetym stajać amerykanskija śpiecsłužby.
Deputat Pałaty pradstaŭnikoŭ Aleh Cylko prapanavaŭ stvaryć biełaruskija sacsietki, kab pa prykładzie Kitaja poŭnaściu kantralavać infarmacyjnyja patoki.
Na takija razvahi ŭ telehram-kanale Cylko padšturchnuła zatrymańnie ŭ Paryžy Paŭła Durava. Deputat upeŭnieny, što za hetym stajać amierykanskija śpiecsłužby, jakija žadajuć uziać pad kantrol Telegram.
Cylko zadajecca pytańniem: što rabić, kali miesiendžar piarojdzie pad kantrol śpiecsłužbaŭ?
«Jakija miery pavinny budziem pryniać usie my — uładalniki TH-kanałaŭ? Praciahvać vykarystoŭvać ich i ŭvieś čas padviarhacca «varožaj» cenzury ci zusim admovicca ad ich pasłuh? Tady čym zamianić apieratyŭnaje daviadzieńnie infarmacyi?» — pytajecca Cylko.
I adrazu prapanuje recept — stvaryć svaje sacsietki. Nazvy jon im užo prydumaŭ.
«Vierahodna, nadyšoŭ toj čas, kali nam nieabchodna zadumacca nad stvareńniem ułasnych, niezaležnych internet-płatform. Da prykładu, THBY ci InstaBY, jakija b kožny biełarus moh vykarystoŭvać biez aściarohi, što jaho ŭzłamajuć ci zaraziać internet-virusam», — ličyć deputat.
Stanoŭčym prykładam jon ličyć Kitaj, jaki maje svoj internet i svaje anałahi sacsietak.
«Kraina całkam kantraluje kantent, sočyć za biaśpiekaj, kanfidencyjalnaściu, błakuje infarmacyju ekstremisckaj nakiravanaści. Ale, samaje hałoŭnaje, nie zaležyć ad źniešnich, tak by mović, kłasavych vorahaŭ», — miarkuje Cylko.
Deputat razumieje, što Biełarusi składana kankuravać z technałahičnymi hihantami, jakija vałodajuć roznymi internet-płatformami i miljardnym bahaćciem.
«Ale stvaryć anałahičny miesiendžar, jaki buduć vykarystoŭvać dziaržaŭnyja struktury i buduć pačuvacca ŭ biaśpiecy, dumaju, možna i treba. Tym bolš, što resurs, u vyhladzie Parka vysokich technałohij u nas jość», — reziumavaŭ Cylko.
Ministr infarmacyi Marat Markaŭ raniej taksama prapanoŭvaŭ stvaryć biełaruskija sacsietki i jutub. Hiendyrektar BiełTA anansavała źjaŭleńnie biełaruskaj miedyjapłatformy «videa.bieł».
Aleh Cylko rodam z Kastryčnickaha. Jon skončyŭ Kijeŭskaje vajenna-marskoje vučylišča pa śpiecyjalnaści piedahoh-psichołah i Akademiju kiravańnia. Pracavaŭ u sistemie BRSM i Homielskim abłvykankamie, byŭ ideołaham u «Homielabłaŭtatransie».
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?43
Kamientary