Brytanski błohier, jaki chadziŭ na pakłon da Kubrakova, skardzicca, što nie moža atrymać dazvoł na žycharstva ŭ Biełarusi
Błohier ź Vialikabrytanii Uił Ehiertan byŭ prosta maraj biełaruskaj prapahandy. Zrešty, niešta pajšło nie tak, i ciapier jon piša ŭ błohu, što nie hatoŭ źjazdžać ź Biełarusi, ale nie moža atrymać DNŽ. Jon zapuściŭ fłešmob «Dajcie chłopcu DNŽ».
Uił Ehiertan nazyvaje sabie ambasadaram sałatavaha koleru (jon zaŭsiody źjaŭlajecca ŭ rolikach u adzieńni kisłotnaha koleru) i viadzie błohi ŭ tyktoku i instahramie pad nikam willeggerton. U pieršaj sacyjalnaj sietcy na dva jaho akaŭnty ahulna padpisana 645 tysiač čałaviek, u druhoj — bolš za 11 tysiač. Siarod padpisčykaŭ jość biełaruskija prapahandysty i deputaty.
Chłopcu 25 hadoŭ, jon naradziŭsia ŭ Mančestary, va ŭniviersitecie Birminhiema vyvučaŭ ruskuju movu. Błohier aktyŭna vandruje pa roznych krainach, ale asablivuju ŭvahu nadaje postsavieckim — byŭ, naprykład, u Kyrhyzstanie, Kazachstanie, Uźbiekistanie, Ukrainie, Armienii, Rasii i inšych.
U svaich rolikach jon nikoli nie padymaje niejkija palityčnyja temy — naadvarot, zvyčajna ŭsim zachaplajecca i raspaviadaje pra miascovyja słavutaści ci častujecca nacyjanalnymi prysmakami. U Biełarusi Uił hulaŭ pa Minsku, Mahilovie, Hrodnie, Brestu, Viciebsku, Słonimu. Jon jeŭ u Baranavičach «łodački» dy haniaŭ u Rahačoŭ — «na śviatuju ziamlu zhuščonki». A taksama hladzieŭ futboł na «Dynama» i pijaryŭ mierapryjemstva Prezidenckaha spartyŭnaha kłuba. Apošniaje jaho videa pryśviečana tamu, jak błohier nabyŭ modny płoski kruasan nievierahodnych pamieraŭ.
U červieni Ehiertan navat pasprabavaŭ vučyć biełaruskuju movu:
— Ja škodny anhłasaks i mianie chutka departujuć. I kali ja pačnu razmaŭlać na biełaruskaj na miažy, moža, pamiežniki zabłytajucca i padumajuć, što ja biełaruski chłopiec.
Ščyra kažučy, asablivych pośpiechaŭ u jaho nie było. Pačaŭ Uił z prostaha — «Pryvitańnie».
— «Priviet, Tania?!». Chto takaja Tania, blin?!
Sioleta brytanski błohier pryjazdžaŭ u Biełaruś niekalki razoŭ. Upieršyniu Uił źjaviŭsia ŭ Minsku ŭ mai pa biaźvizie. Tady błohier pravioŭ u krainie 31 dzień zamiest dazvolenych 30 dzion. Paśla čaho jon palacieŭ u Kazachstan, ale ŭ chutkim časie viarnuŭsia nazad. U lipieni chłopiec nienadoŭha źlataŭ u Turcyju, ale znoŭ ža viarnuŭsia ŭ Minsk. Z taho času Uił znachodzicca ŭ Biełarusi.
Jak heta mahčyma lehalna? U krainie, dzie «časam nie da zakonaŭ», kali-niekali zdarajucca cudy, asabliva kali hetymi cudami pačynajuć zajmacca vialikija čynoŭniki.
Uił u adnym ź videa źviarnuŭsia da ministra ŭnutranych spraŭ Biełarusi Ivana Kubrakova i paprasiŭ dapamahčy z dakumientami. Kaniečnie, takuju šykoŭnuju nahodu biełaruskaja prapahanda nie mahła prapuścić.
Kubrakoŭ zaprasiŭ zamiežnika na asabistuju sustreču. «Papularny błohier ź Vialikabrytanii, jaki pryjechaŭ u Biełaruś pa biaźvizie, apublikavaŭ u sacyjalnaj sietcy videarolik, u jakim paprasiŭ u kiraŭnika viedamstva sadziejničańnia ŭ padaŭžeńni termina znachodžańnia ŭ našaj krainie. Ivan Uładzimiravič, ubačyŭšy zvarot, nie moh pakinuć jaho biez uvahi. Praź ličanyja hadziny hość respubliki ŭžo ŭvachodziŭ u kabiniet ministra», — paviedamiła pres-słužba viedamstva.
Dla sustrečy ź ministram błohier nie staŭ navat pieraapranacca. Jon źjaviŭsia ŭ ministerstvie ŭ tym adzieńni, u jakim chodzić zvyčajna — karotkich šortach i majcy, jakaja padkreślivała jaho muskuły. Ale žurnalistka «SB. Biełaruś siehodnia» znajšła apraŭdańnie hetamu parušeńniu dres-koda: «Kamu patrebnyja farmalnaści, kali sustreča atrymałasia takoj dušeŭnaj?».
Ivan Kubrakoŭ litaściva dazvoliŭ brytancu zastavacca ŭ Biełarusi da siaredziny vieraśnia i zahadaŭ padnačalenym aformić nieabchodnyja dla hetaha dakumienty.
U chutkim časie hety termin skončycca — i błohier znoŭ šukaje dapamohi praz sacyjalnyja sietki. Šeść dzion tamu pasprabavaŭ zapuścić u tyktoku fłešmob «Dajcie chłopcu DNŽ» — na videa roznyja dziaŭčaty i chłopcy viesieła kryčać hetuju frazu. Rolik nabraŭ bolš za 731 tysiaču prahladaŭ i kala 101 tysiačy łajkaŭ. Ale ŭ hety raz Kubrakoŭ čamuści jaho nie zaŭvažyŭ. Niahledziačy na toje, što brytaniec kaža, što zrazumieŭ: jaho miesca — u Biełarusi.
— Ja źviartajusia da biełaruskich uładaŭ. Ja dakładna razumieju, što DNŽ nie dajuć pa pstryčcy palcaŭ. Ale kali ŭsio ž jość lubaja mahčymaść dać hetamu chłopcu DNŽ, ja budu vielmi ŭdziačny. Ja navat dziela hetaha pierastanu źmiešvać usio vakoł sa zhuščonkaj.
Błohier prasiŭ nie tolki repościć videa, ale i tehać u kamientaryjach aficyjny akaŭnt MUS Biełarusi. U tyktoku ŭžo pačalisia źjaŭlacca pieršyja videa ŭ padtrymku Uiła.
U instahramie chłopiec zładziŭ tematyčnuju fotasiesiju: namalavaŭ na tvary brytanski i aficyjny biełaruski ściahi, a taksama pa čarzie ŭkruciŭsia ŭ ściahi dvuch krain. Uił napisaŭ:
«Minsk, dziakuj za ciopłyja ŭspaminy i ciopły pryjom. Adzin z najlepšych hadoŭ u maim žyćci i ŭsio dziakujučy vam… Miljon razoŭ dziakuj, što vy tut i sočycie za chodam majoj spravy, sočycie za maimi vandroŭkami. Ja nie hatovy źjazdžać, nie chaču, ale kali ŭsio ž taki daviadziecca, dziakuj za ŭsio. Minsk, ty nazaŭsiody zastaniešsia ŭ maim sercy».
A pakul Uił rychtujecca da sustrečy z fanatami, jakaja adbudziecca 13 vieraśnia — abiacaje razyhrać 5 litraŭ zhuščonki.
Zastajecca tolki spadziavacca, što Kubrakoŭ padčas asabistaj sustrečy paśpieŭ rastłumačyć brytancu paradak praviadzieńnia masavych mierapryjemstvaŭ u Biełarusi.
«Paśla matča pajechali z chłopcami na daču». Anhlijski tyktokier, jakoha prymaŭ Kubrakoŭ, zhulaŭ u druhoj futbolnaj lizie Biełarusi
U Biełarusi paviedamili pra zatrymańnie ahienta japonskich śpiecsłužbaŭ
«Terakt», za jaki asudzili niemca Kryhiera, zładzili biełaruskija siłaviki — viersija Biełpoła
Na «Viva Brasłaŭ» zatrymali čatyroch hramadzian Łatvii
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary