Chto toj palak na sustrečy z Łukašenkam, jaki jamu padchichikvaŭ?
Alaksandr Sonhin kiruje Sajuzam palakaŭ na Biełarusi. Na pasadu jaho abrali ŭžo paśla 2020 hoda. Ciapier jaho funkcyja — ad imia ŭsich palakaŭ Biełarusi śpiavać ody Łukašenku.
Alaksandru Sonhinu 54 hady. Rodam jon ź vioski Tarnova Lidskaha rajona.
Paśla škoły pajšoŭ u Lidskuju piedahahičnuju vučelniu, dzie atrymaŭ adukacyju nastaŭnika pačatkovaj škoły. Paśla jaho pryzvali ŭ armiju, dzie jon słužyŭ u vojskach MUS, prachodziŭ słužbu ŭ Nahornym Karabachu.
Skončyŭ Biełaruski dziaržaŭny piedahahičny ŭniviersitet, vyvučyŭsia na nastaŭnika historyi. Paśla armii byŭ nastaŭnikam u Dalokich Lidskaha rajona, kiravaŭ dziciačym sadkom i pačatkovaj škołaj u Hudach Lidskaha rajona. Paśla pierajšoŭ namieśnikam dyrektara pa ideałohii i kadrach na aŭtazboračny zavod «Nioman».
U 2012 Sonhina pastavili kiraŭnikom upraŭleńnia adukacyi Hrodzienskaha abłvykankama. A ŭ 2019 hodzie pryznačyli deputatam u parłamient.
Admietna, što jon adzin z tych deputataŭ, jakija pieryjadyčna vystupajuć pa-biełarusku. Jon praktykuje heta i dahetul, a biełaruskaj movaj vałodaje nasamreč dobra.
A ŭ sakaviku 2021 jaho pryznačyli kiravać jašče i prałukašenkaŭskim Sajuzam palakaŭ Biełarusi. I jon pryniaŭsia chvalić ułady, ale ŭžo ad imia palakaŭ:
«Na žyćcio ŭ krainie, asabistaje i prafiesijnaje stanaŭleńnie, karjeru nacyjanalnaść čałavieka nie ŭpłyvaje. Kali hramadzianin trymajecca zakonaŭ, to nijakich pytańniaŭ ni ŭ dziaržavy, ni ŭ asiarodździa nie budzie».
Krytykavaŭ jon i susiedziaŭ Biełarusi — maŭlaŭ, dzie jašče jość pradstaŭniki mienšaściaŭ u parłamiencie.
Praciahvaŭ jon u takim duchu ŭsie apošnija try hady. U asnoŭnym Sonhina dastavali z šafy jak dziažurnaha palaka, kali treba było prakamientavać polska-biełaruskija adnosiny. Jon chvaliŭ dzień narodnaha adzinstva, pisaŭ listy polskim uładam pra spraščeńnie vizavaha režymu i pravodziŭ pikiety kala ambasady Polščy, a taksama łajaŭ ZŠA dy «kalektyŭny Zachad».
Apošni raz Sonhina zaŭvažyli na sustrečy nacyjanalnych mienšaściaŭ z Łukašenkam. Pakul Łukašenka raskazvaŭ pra źniavoleńnie biełaruskaha palaka Andžeja Pačobuta, Sonhin adznačaŭ, što palaki «dychajuć pavietram rodnaj Biełarusi, žyvuć i pracujuć pa zakonach hetaj krainy». I dadaŭ, što žychary Polščy marać pra narmalizacyju adnosinaŭ ź Biełaruśsiu.
Łukašenka na heta adkazaŭ, što narod Polščy dobry, ale ŭłady drennyja i marać zabrać Zachodniuju Biełaruś. A 99% palakaŭ, maŭlaŭ, padtrymlivajuć Łukašenku.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?54
Kamientary