Raskazvajem, jak mahčyma ŭznaŭlać čaty ŭ Telegram i jak ad hetaha abaranicca

Telegram pracuje pa tych ža pryncypach, što i lubaja sacsietka. Častka koda telehrama, naprykład, datyčnaja stvareńnia paviedamleńniaŭ abo supołak, naŭprost uziataja z Ukantakcie. Dla hetaha častku koda sacsietki adkryli, kali Pavieł Duraŭ jašče byŭ u prajekcie, kab u budučyni skarystać jaho dla Telegram.

Adkrytyja supołki

Kali vy stvarajecie adkrytuju supołku, to jana isnuje ŭ adkrytym internecie, hetak ža, jak i ŭ luboj inšaj sacsietcy. To-bok faktyčna vy stvarajecie veb-resurs na paddamienie t.me.

Kali vy niešta pišacie ŭ adkryty čat, to, kali tam jość bot-skanier, paviedamleńnie budzie zachavanaje, navat kali vy adrazu jaho vydalili. Chutčej za ŭsio, siłaviki majuć takich botaŭ va ŭsich adkrytych čatach, ale jość i płatnyja boty, dastupnyja ŭsim achvotnym.

Płatnyja boty možna znajści, ale my nie raim imi karystacca bieź vialikaj patreby — nieviadoma, ci zachoŭvajuć jany vašy zapyty i jak abychodziacca z vašaj infarmacyjaj. Taksama vielmi składana apłacić ich biaśpiečna, nie pakinuŭšy śladoŭ.

Zakrytyja supołki

Jany pracujuć prykładna tak ža, jak i adkrytyja, ale nie indeksujucca ŭ internecie naŭprost. Ale šmat jakija boty indeksujuć ich tak: vy dasyłajecie spasyłku botu, jon ustupaje ŭ supołku i adrazu pa ŭstupleńni skaniruje ŭsie paviedamleńni ad samaha pieršaha dastupnaha.

U šmat jakich bolšych kanałach takija boty jość. U siabroŭskich kanałach ich niama, ale ŭ vypadku zatrymańnia čałavieka abo ŭ vypadku, kali jon ahient, jany mohuć być zachavanyja abo adnoŭlenyja z pamiaci smartfona.

Asabistyja paviedamleńni

Z asabistymi paviedamleńniami ŭsio składaniej. Jany pryvatnyja i zachoŭvajucca tolki na siervierach płatformy.

Ale nasamreč heta tyja ž zakrytyja čaty, ale miž dvuma ludźmi. To-bok u vypadku, kali čałaviek zatrymany, pierachapić ich možna. U niekatorych vypadkach — navat vydalenyja. Sakretnyja čaty mohuć nie ŭratavać ad mahčymaściaŭ uznaŭleńnia z pamiaci. Padrabiaźniej pra heta možna pračytać u našym artykule pra ŭznaŭleńnie infarmacyi ŭ telehramie.

Dyk jak abaranicca?

Absalutnaj abarony ad hetaha nie isnuje. Ale bazavaje praviła — nie pišycie ŭ adkrytych i vialikich zakrytych čatach, kudy ludzi ŭvachodziać biez asablivaj pravierki, ničoha takoha, što nielha čytać śpiecsłužbam Biełarusi.

Rehularna čyścicie z dvuch bakoŭ niebiaśpiečnyja pierapiski ź ludźmi znutry Biełarusi i, kali vy znachodziciesia ŭ Biełarusi, to ź ludźmi pa-za Biełaruśsiu prynamsi dla siabie. Nie zabyvajciesia čyścić keš i bazy danych telehrama.

Kali vy ŭ Biełarusi, to pažadana mieć telefon, jaki rehularna atrymlivaje abnaŭleńni. Važna ich zahružać i instalavać.

• 8
• 0
• 0
• 2
• 0
• 0
• 1
• 0