Viadomaha rasijskaha aeraraźviedčyka praz kanflikt z kamandziram adpravili ŭ miasny šturm. Tam jon i zahinuŭ
«Niekatoryja daśvistalisia, a my, mahčyma, adlatalisia», — havorycca ŭ paśmiarotnym videazvarocie Dźmitryja «Hudvina» Łysakoŭskaha, byłoha kiraŭnika pavietranaj raźviedki armii «DNR».
U Z-pablikach raspaŭsiudziłasia videa, u jakim rasijski vajskoviec abvinavačvaje kamandzira 87-ha pałka Ihara Puzika z pazyŭnym «Zły» ŭ naŭmysnym rasfarmiravańni raźliku BPŁA dalniaj raźviedki i pieravodu jaho słužačych u šturmaviki.
Aŭtar videa havoryć, što znachodzicca ŭ vakolicach siała Miemryk na pakroŭskim napramku frontu. Sam jon pradstaŭlajecca Dźmitryjem Łysakoŭskim z pazyŭnym «Hudvin».
Łysakoŭski — dastatkova viadomaja fihura. U 2014 hodzie jon kamandavaŭ pavietranaj raźviedkaj armii «DNR». U 2015 hodzie viarnuŭsia ŭ Rasiju, dzie niekalki hadoŭ adsiedzieŭ u turmie za rejdarstva. U 2022 hodzie Łysakoŭski znoŭ pajšoŭ na front.
«Naš kamandzir pałka niekalki dzion nazad daŭ spravazdaču ab uziaćci nasielenaha punkta Lasoŭka. Naturalna, heta nie praŭda. Ničoha tam nie ŭziata. Tudy tolki časam zachodziać našy hrupy, hrupy sajuźnikaŭ, jakich usich źniščajuć», —
zajaŭlaje Łysakoŭski i dadaje, što takaja situacyja nie źjaŭlajecca ŭnikalnaj, «tak isnuje pa ŭsim froncie».
«Chłuśnia ab tym, što niejkija nasielenyja punkty zaniatyja, źjaŭlajecca normaj, — śćviardžaje mužčyna i dadaje: Vajnu treba nazyvać vajnoj, a zdradnikaŭ, jakija chłusiać, treba rasstrelvajuć. Inakš vajny nie budzie, a budzie dahavarniačok i rynkavaja ekanomika».
Pa słovach vajskoŭca, kamandzir pałka Puzik znachodzicca pad upłyvam niejkaha Aleha Uładzimirava — «čałavieka, jaki napramuju kantaktuje z zachodnimi raźviedkami».
Hety ŭpłyŭ pryvioŭ da taho, što Puzik «zrabiŭ usio, kab połk pierastaŭ efiektyŭna pracavać».
Taksama Łysakoŭski abvinavačvaje svajho kamandzira ŭ tym, što jon kryšuje handal narkotykami.
U inšym videa sasłužyviec Łysakoŭskaha, padpałkoŭnik Siarhiej Hrycaj z pazyŭnym «Ernest», zaŭvažaje, stojačy pobač ź im:
«Niekatoryja daśvistalisia, a my, mahčyma, adlatalisia. … Samyja słaŭnyja bieśpiłotčyki i kamandziry padraździaleńniaŭ bieśpiłotki z pazyŭnymi «Ernest», «Hudvin» i «Balšoj» atrymali siońnia zadaču syści ŭ piachotnyja paradki. (…) Mnostva ludziej kinułasia nam havaryć, što my sychodzim u adzin kaniec».
Łysakoŭski dadaje, što hałoŭnaj pryčynaj ich adpraŭki ŭ miasny šturm stała toje, što jany supraćdziejničajuć handlu narkotykami ŭ pałku, a taksama krytykujuć kamandavańnie ŭ nieefiektyŭnym vykarystańni infarmacyi, zdabytaj padraździaleńniem BPŁA dalniaj raźviedki:
«Usia infarmacyja, jakuju my dastaŭlali, tarmaziłasia na ŭzroŭni kamandzira pałka i načalnika štaba i nie išła vyšej — dla taho, kab celi ŭkrainskaj armii nie byli źniščanyja. Dla taho, kab jany praciahvali źniščać našych bajcoŭ. Dla taho kab jany praciahvali nanosić udary pa terytoryi Rasii.
A jak tolki vyśvietliłasia, što my majem mahčymaści raźmiarkoŭvać infarmacyju vyšej, pryjšła kamanda: «Davajcie zakapajem Ernesta, Hudvina i ŭsich, chto naohuł da hetaha datyčny».
«Zapomnicie raz i nazaŭsiody. Pieršaje: narkotyki ŭ pałkach — zło. Tamu što jany razrastajucca dalej. Druhoje: infarmacyju treba adpracoŭvać, a nie hanarycca jaje najaŭnaściu. I treciaje: kali vy vajujecie za radzimu, to vajujcie za radzimu, a nie za svaju kišeniu. (…) Treba zrazumieć, što vajnu treba spačatku vyjhrać, a potym prybytak dzialić», — havoryć Łysakoŭski i dadaje:
«Asnoŭnyja zadača ŭ nas — vyžyć. A ŭ ich — zrabić tak, kab my nie vyžyli. (…) Kali raptam zdarycca tak, što z nami niešta pojdzie nie tak, nie tym bokam, kali my adtul nie vierniemsia, ci chacia b adzin z nas nie vierniecca, to druhi daść pakazańni. Kali my nie vierniemsia abodva, to hety zapis budzie dokazam taho, što my mieli racyju».
Źjaŭleńnie videa ŭ sacyjalnych sietkach dało padstavy śćviardžać, što jaho ŭdzielniki zahinuli. Ale aficyjna heta pakul nie paćvierdžana.
Kamientary