Hajdukievič i Husačenka taksama pasprabavali źniać ź siabie sankcyi ES. Ale pieršy niadaŭna sam prasiŭ jašče bolej sankcyj
Deputat Pałaty pradstaŭnikoŭ, lidar ŁDP Aleh Hajdukievič i namieśnik staršyni Biełteleradyjokampanii Siarhiej Husačenka taksama asprečvali ŭviedzienyja suprać ich sankcyi ES, ale Jeŭrapiejski sud 24 maja adchiliŭ ich pazovy. Ciapier im daviadziecca apłacić sudovyja vydatki, piša reform.by.
Anałahičnaje rašeńnie było pryniata ŭ dačynieńni da deputataŭ Śviatłany Lubieckaj i Alaksandra Amieljaniuka, jakija taksama sprabavali asprečyć sankcyi, što Jeŭrapiejski sajuz nakłaŭ na ich 21 červienia 2021 hoda.
Sutnaść pretenzij Hajdukieviča i Husačenki anałahičnaja pazovu Lubieckaj i Amieljaniuka. Na ich dumku, sankcyi nosiać charaktar kalektyŭnaj adkaznaści, niasuć pamyłkovuju acenku i parušajuć pryncyp suraźmiernaści.
Hajdukievič zapeŭnivaŭ, što vykazvaŭ svoj asabisty punkt hledžańnia jak deputat, a Husačenka zhadaŭ pra svabodu vykazvańnia mierkavańnia.
Adkazčykam vystupała Rada Jeŭrapiejskaha sajuza. Sud razhledzieŭ dokazy bakoŭ i pryjšoŭ da vysnovy, što rašeńnie ab uviadzieńni sankcyj abhruntavanaje, a adkazčyk padaŭ pierakanaŭčyja tłumačeńni svajho rašeńnia: Hajdukievič, pa sutnaści, jość pradstaŭnikom režymu Łukašenki, a Husačenka zajmajecca prapahandaj i ŭznačalvaje dziaržaŭnaje prapahandysckaje miedyja.
Hajdukieviču i Husačenku zahadana apłacić, u dadatak da ich ułasnych vydatkaŭ, vydatki, paniesienyja Radaj Jeŭrapiejskaha sajuza.
Hajdukievič i Husačenka trapili pad sankcyi ES 21 červienia 2021 hoda.
Cikava, što jašče niadaŭna Hajdukievič dziakavaŭ ES za sankcyi, kab u čynoŭnikaŭ i biznesmienaŭ nie było žadańnia navat hladzieć u bok ES. «Uviadzicie jašče sto pakietaŭ sankcyj», — kazaŭ Hajdukievič.
A prapahandyst Husačenka zapeŭnivaŭ, što nie budzie asprečvać sankcyj.
«Ci sprabuju ja asprečvać rašeńnie ES u dačynieńni da svajoj ścipłaj piersony? A što ŭ takim śviecie možna dakazać? Davajcie ŭspomnim adzin z samych śviežych prykładaŭ — rasśledavańnie incydentu z samalotam RyanAir u Minsku. Kolki razoŭ IKAO pieranosiła datu spravazdačy? U vyniku zajavili, što Biełaruś nie zmušała pavietranaje sudna da pasadki. Ci admianiŭ paśla rasśledavańnia ES sankcyi suprać Biełarusi i biełaruskaj avijakampanii? Zrazumieła, nie. Pra što jašče možna kazać», — raspaviadaŭ jon «Sovietskoj Biełoruśsii».
Husačenku i Hajdukieviča pradstaŭlaŭ advakat Advakackaj pałaty Paryža Dźmitryj Litvinski. Hety ž advakat vystupaŭ ad imia Lubieckaj i Amieljaniuka.
U bazie suda jość jašče niekalki pazovaŭ, padadzienych Litvinskim ad imia hramadzian Biełarusi Alaksandra Bachanoviča, Siarhieja Rubnikoviča i Siarhieja Skryby. U dačynieńni da hetych dziejačaŭ 21 červienia 2021 hoda taksama byli ŭviedzienyja sankcyi ES. Na momant uviadzieńnia sankcyj Bachanovič byŭ rektaram Bresckaha dziaržaŭnaha techničnaha ŭniviersiteta, Rubnikovič — rektaram Biełaruskaha dziaržaŭnaha miedycynskaha ŭniviersiteta, a Skryba — prarektaram pa vychavaŭčaj rabocie BDEU. Rašeńni pa ich, miarkujučy pa bazie, jašče nie pryniaty.
Usie pazovy Litvinskim byli padadzienyja 5 listapada 2021 hoda.
Učora pradstaŭnik pa tranzicie ŭłady Abjadnanaha pierachodnaha kabinieta Pavieł Łatuška ŭ kamientary «Našaj Nivie» raskazaŭ, jak deputaty sprabavali apraŭdacca ŭ sudzie.
Siastra Kaleśnikavaj prapanavała ŭ Bruseli try kroki, jakija treba zrabić dla vyzvaleńnia palitviaźniaŭ23
Kamientary