Duhin — prapaviednik kanca śvietu. Voś čamu śmierć jaho dački złaviesnaja
Viadomy rasijski žurnalist Andrej Łašak raskazaŭ u Facebook pra svajo znajomstva ź ideołaham «ruskaha śvietu» Alaksandram Duhinym. Łašak piša, što nie varta niedaaceńvać upłyŭ fiłosafa, jakimi b varjackimi nam ni zdavalisia jaho idei. «Tym bolš, što hetyja idei majuć tendencyju ažyćciaŭlacca».
Łašak uspaminaje, jak u kancy 90-ch vypadkova apynuŭsia na lekcyi Duhina, pryśviečanaj… aniolskim sutnaściam.
«Heta było zusim nievynosnaje mudrahielstva, pryśviečanaje pieravažna vobrazu Lucypara (paŭšaha anioła) z šyrokimi cytatami z Alistera Kroŭli. U zale siadzieła čałaviek dvaccać ludziej niavyznačanaha ŭzrostu i połu — ja tady jašče padumaŭ, što, mahčyma, jany taksama byli paŭšymi aniolskimi sutnaściami, jakija pryjšli pasłuchać lekcyju pra siabie».
Łašak zhadvaje, jak u siaredzinie nulavych sustrakaŭ Duhina na kancercie Current 93.
«Jon piaščotna lubiŭ brytanski apakaliptyk-fołk za ich prychilnaść nacy-satanizmu. Jak, mabyć, i jaho dačka Darja (bačyŭ niadaŭna post pra toje, jak jana zihavała na Maskoŭskim kancercie Death in June)».
U tyja ž nulavyja Łašak naviedaŭ letni łahier Jeŭrazijskaha sajuza moładzi.
«Dla hetaha byŭ arandavany korpus paŭrazburanaha pansijanata pad Źvianiharadam. Moładzi było niašmat, čałaviek tryccać-sorak.
Šmat chto ŭ kasavarotkach, pakolki Duhin tady ŭžo zrazumieŭ, što stratehija nacy-satanizmu nie maje vialikich pierśpiektyŭ u sučasnaj Rasii, i abviaściŭ siabie staravieram.
Pierad ježaj mardaty baradač abviaščaŭ basam: «Anioły va trapiezu!» i prysutnyja chryścilisia.
Nočču na bierazie Maskvy-raki moładź vystraiłasia ŭ šerah z zapalenymi fakiełami, kab dać prysiahu jeŭrazijca. Duhin tady lubiŭ čornuju mahiju, abrady, rytuały, jakich tak šmat u kroŭlijanstvie, — na hetaj hlebie jon syšoŭsia z Kurochinym i zapaliŭ jaho fašysckimi idejami (a ŭ rešcie rešt i spaliŭ)».
Tekst prysiahi, uspaminaje Łašak, byŭ napyšlivym i nie pazbaŭlenym paetyčnaści, słova «vola» hučała tam jašče čaściej, čym praklony libierałam-atłantystam.
«Vola i rozum, vola i rozum» — choram paŭtarali za Duhinym kvołyja junaki i dziaŭčaty. Heta nahadvała b «Tryumf voli», kali b nie dalokaja ad aryjskich ideałaŭ źniešnaść junych jeŭrazijcaŭ, dadaje Łašak.
«Ja tady, viadoma, nie mierkavaŭ, što paciešny postmaderniscki kult stanie kali-niebudź ideałahičnym mejnstrymam, i da 2022 hoda ŭ hetuju siektu budzie ŭciahnutaja ŭsia kraina», — piša žurnalist.
U 2011 hodzie ŭ letnim łahiery partyjnaja moładź pad kiraŭnictvam Duhina pastaviła akultnuju misteryju «Finis Mundi» — «Kaniec śvietu».
«Darja ihraje tam, darečy, rolu dobraachvotnaj achviary, jakaja ździajśniaje samaspaleńnie ŭ imia vyratavańnia Rasii. U toj čas, jak dziaŭčyna haryć, mužčynski hołas abviaščaje: «Ahniom chryścisia Ruś! U ahni pierahary i svoj ałmaz vyratuj z čornaha horna!»
Režysiorka hetaha dziejstva tak apisvała ideju pastanoŭki: «Nam treba nablizić kaniec śvietu. Antanien Arto kazaŭ, što chvaroba śvietu vylečvajecca adzinym srodkam — spaleńniem śvietu, što ja prademanstravała ŭ finalnaj scenie śpiektakla, dzie adbyvajecca spaleńnie suśvietu».
U finale na scenu vyjšaŭ Duhin i skazaŭ: «My pražyli try dni našaha žyćcia ŭ bok śmierci. Ja dumaju, što ŭ rasšyfroŭcy hetyja siužety, jakija vy pastavili, nie majuć patreby.
Hiermienieŭtyka kanca śvietu — heta toje, što vam samim treba budzie zrabić», — zhadvaje słovy Duhina žurnalist.
Łašak piša, što, na jaho pohlad, fiłosaf Duhin apantany idejaj pryvieści śviet da ačyščalnaha apakalipsisu, paśla jakoha narodzicca Vialikaja jeŭrazijskaja impieryja kanca. «I jon davoli paśladoŭna idzie da hetaj mety».
Z pačatkam «kansiervatyŭnaha pavarotu» Duhin adyšoŭ ad akultnaha postmadernizmu, zasiarodziŭšysia na temie «tradycyi», na jakuju raptam uźnik popyt.
«U Administracyi prezidenta «sutarhava šukali novyja ideałahiemy, kab supraćpastavić ich abvieščanamu varožym libieralizmu. Duhin z bahiemnaha huru pieratvarajecca narešcie ŭ zapatrabavanaha ideołaha ŭłady», — piša Łašak i pryvodzić u dokaz adzin fakt.
«U 2014-m hodzie Duhin svoj prahramny artykuł pra ideałohiju novaj Rasii zakančvaje nastupnym čynam: «Rasija budzie ci ruskaj, to-bok jeŭrazijskaj, to-bok jadrom vialikaha Ruskaha śvietu, albo jana źniknie. Ale tady ŭžo lepš chaj źniknie ŭsio. U śviecie biez Rasii prosta niama čaho žyć»» Praz 4 hady Pucin u intervju Sałaŭjovu na temu jadziernaj pahrozy amal dasłoŭna paŭtoryć hetuju dumku: «Navošta nam śviet, kali ŭ im nie budzie Rasii?» Padobna na toje, što Duhinu ŭdałosia zachapić dyktatara samaj strašnaj svajoj idejaj: nabližeńniem kanca śvietu».
U hetym kantekście śmierć Darji vyhladaje asabliva złaviesna, piša Łašak.
Jon kaža, što mnohich uraziła pachavańnie dziaŭčyny, u pryvatnaści, «pavodziny baćki, jaki straciŭ dačku, jaki nienaturalna dryhotkim hołasam pchaje prapahandysckija tyrady z zaklikam vajavać da pieramožnaha kanca».
«Jany zdochnuć, a my trapim u raj», — skazaŭ Pucin, kali jaho paprasili rastłumačyć, što aznačaje fraza «nam nie patrebny śviet biez Rasii».
«Heta ž roŭna toje, što Duhin nazyvaje «hiermienieŭtykaj kanca śvietu», tolki na movie padvarotni, jakoj dyktatar u daskanałaści vałodaje. Časam mnie zdajecca, što jany ŭžo pryniali «kančatkovaje rašeńnie». Jany nie tolki admianili Ukrainu. Jany admianili śviet», — piša Łašak.
Kamientary