Minzdaroŭja: Infarmacyja Bloomberg pra 22 pamierłych ad karanavirusa ŭ Biełarusi — fejk
Bolšaść vypadkaŭ karanavirusnaj infiekcyi COVID-19 u Biełarusi majuć lohkaje abo bieśsimptomnaje ciačeńnie, zajaviła namieśnik ministra achovy zdaroŭja Alena Bohdan u efiry telekanała «Biełaruś 1», paviedamlaje BIEŁTA.
«Ministerstva achovy zdaroŭja vałodaje absalutna ŭsioj infarmacyjaj, jakaja na dadzieny momant jość: i pa kolkaści abśledavanych, i pa kolkaści vyjaŭlenych vypadkaŭ, i pa stanie zdaroŭja kožnaha z hetych pacyjentaŭ, — skazała Alena Bohdan. — Asnoŭnaja masa pacyjentaŭ, u jakich vyjaŭleny COVID-19, majuć bieśsimptomnaje ciačeńnie ci absalutna nie vyjaŭlenyja kliničnyja prajavy reśpiratornaha charaktaru».
Štodnia analizujucca zapasy masak, achoŭnych kaściumaŭ, lekavych srodkaŭ. Pryčym kali raniej pa lekach zapas byŭ stvorany na 3—4 miesiacy, to na siońnia pa asnoŭnych pazicyjach jon składaje jak minimum 6 miesiacaŭ.
«Situacyja źjaŭlajecca całkam kantralavanaj», — padkreśliła namieśnik ministra.
Taksama jana prakamientavała infarmacyju ahienctva Bloomberg pra nibyta 22 vypadki śmierci ad karanavirusa ŭ Biełarusi.
«U našych miedycynskich ustanovach ad infiekcyi COVID-19 na siońnia nichto nie pamior. Zakanamiernaje pytańnie: jakoj krynicaj infarmacyi karystajecca Bloomberg», — adznačyła jana.
Amierykanskaje ahienctva Bloomberg siońnia ranicaj paviedamiła pra śmiarotnyja vypadki ad karanavirusa ŭ Biełarusi. Paźniej vyjaviłasia, što heta prosta karektarskaja pamyłka: byli zbłytanyja ličby pamierłych i vyzdaraviełych.
Kamientary