Indyvidualnyja pradprymalniki praviali čarhovy mitynh u centry Minska
Niekalki socień pradprymalnikaŭ sabralisia na Kastryčnickaj płoščy. Ich było mienš, čym tydzień tamu.
Hladzicie videa NN.BY z Kastryčnickaj płoščy:
13:39
Pradprymalniki prahałasavali za toje, kab razyścisia. Ideju praciahnuć siońnia akcyju padtrymali ŭsiaho 20 čałaviek. Nastupnaja akcyja — u niadzielu, 28 lutaha, a 15-j hadzinie.
13:12
U vyniku ludzi sastupili śniehaŭboračnym mašynam.
13:03
Tym časam pryjechali na płošču śniehaŭboračnyja mašyny, jany, prybirajučy śnieh, pakrysie vyciaśniajuć ludziej, častka chłopcaŭ spyniła mašynu.
Adzin z kiroŭcaŭ mašyny kaža: «My nie sami pryjechali, nam načalstva zahadała».
13:02
Udzielniki mitynhu zaklikajuć z prystupak Pałaca Respubliki «Dałučajsia! Dałučajsia!»
12:59
Častka ludziej na płoščy stanovicca na kalena, kab pakazać, što jany spadziajucca na Boha.
12:50
Pavieł Sieviaryniec zaklikaŭ da adstaŭki premjer-ministra Andreja Kabiakova. Jon taksama vykazaŭ niedavier Alaksandru Łukašenku. Prysutnyja sustreli jahonyja słovy vopleskami.
12:46
«Što rabić dalej, my prosta nie viedajem, — skazaŭ prysutny pradprymalnik karespandentu «Našaj Nivy». — Apošniaja naša nadzieja — na pasiedžańnie pracoŭnaj hrupy ŭ Minekanomiki 24 lutaha. I čas da sakavika majem. I ŭsio, što kazali pra «miadovyja hady», heta nie tak. Ja chacieŭ by, kab členy pracoŭnaj hrupy svaje padychody skaardynavali i vystupali adzinym frontam», — zaznačyŭ mužčyna.
Na płoščy tym časam ludzi hałasujuć za adstaŭku Kabiakova, a taksama vykazvajuć niedavier Łukašenku.
Kolkaść prysutnych na Kastryčnickaj płoščy źmianšajecca.
12:40
Ludzi na Płoščy skandujuć «Žyvie Biełaruś!»
12:36
Milicyja pakul adstupiłasia. Ludzi atačyli vystupoŭcaŭ ščylnym kołam i nie puskajuć milicyju da ich.
12:34
Milicyja prakansultavałasia ź ludźmi ŭ cyvilnym i znoŭ pajšła ŭ nastup na IP. Ludzi ŭ łancuhu nie dajuć prajści milicyi. Znoŭ šturchanina.
12:32
Anatol Labiedźka zaklikaje zachoŭvać spakoj. Pradprymalniki tym časam robiać pierakličku, chto ź IP pryjechaŭ na mitynh. «Minskaja vobłaść — jość?» — «Jość». — «Homielskaja jość?» — «Jość» i h.d
12:29
Padyšli try milicyjaniery, ludzi ich ściahvajuć z prystupak.
Uźnikła tuzanina. Ludzi kryčać «Hańba, hańba».
12:27
Na prystupkach ustalavali stend «Što ja dumaju pra ŭkaz №222 i ŭładu» ź vialikim arkušam papiery, prapanujučy pisać svaje pažadańni.
12:25
Anatol Labiedźka pačynaje akcyju ź miehafonam. Jon kaža, što palityki pryjšli dapamahčy IP. Jon prapanuje padyści na prystupki Pałaca Respubliki, padkreślivajučy, što akcyja mienavita IP, a nie palitykaŭ.
12:22
Adna z pradprymalnic kaža, nas z Barysava tut šmat, rehijony stajać usie. «Minsk nas nie pradprymaŭ. Ja chaču pracavać spakojna, pa zakonie, nie bajacca», — kaža jana. «Nas nielha paraŭnoŭvajuć. U mianie ralet dva na try mietry».
12:18
Źjavilisia pieršyja płakaty: «Pradprymalnik — sumlenny čałaviek, a ŭłada bandyckaja». «Płošča robić čałavieka čałaviekam». Na płoščy — kala 300 čałaviek.
Pryjšoŭ Alaksandr Makajeŭ.
Pryjšło kiraŭnictva minskaj milicyi ŭ poŭnym składzie, u tym liku kiraŭnik AMAPa — Bałaba.
Pakul usio spakojna, milicyja nie zaminaje.
Siabry AHP razdajuć svoj infarmacyjny biuleteń.
Hrupa palitykaŭ pačała pratest kala pryjomnaj Administracyi prezidenta. Napiaredadni Mikałaj Statkievič zaklikaŭ pradprymalnikaŭ padavać tudy pietycyi.
12:14
Adzin ź IP kaža: «My prosim ułady stavicca da nas pa-ludsku. Chočam, kab nas pavažali. Nam bolšaha nie treba»
12:06
Na Kastryčnickaj płoščy prysutničaje — niekalki dziasiatkaŭ čałaviek. Šmat žurnalistaŭ. Usiaho kala 200 čałaviek. Ludzi stajać nievialikimi kupkami. Uźniaty adzin bieł-čyrvona-bieły ściah.
Adzin z udzielnikaŭ — jon z Barysava — kaža, što treba iści da kanca. «Ludzi biez pracy, treba karmić dziaciej, pracy niama».
12:01
Kala znaka «nulavy kiłamietr» sabralisia niekalki čałaviek.
Kala AP, u svaju čarhu, stajać Uładzimir Niaklajeŭ, Pavieł Sieviaryniec, Mikałaj Statkievič i Maryna Adamovič, jakija prynieśli zvarot da budynka AP. Praŭda, z pradprymalnikaŭ siudy nichto nie pryjšoŭ, zatoje šmat «ludziej u cyvilnym».
11:57
Udzielnikaŭ mitynhu na płoščy pakul niama.
11:48
Pa pierymietry płoščy — šmat supracoŭnikaŭ milicyi i ludzi ŭ cyvilnym. Jany stajać taksama ŭ pierachodach mietro. Niekatoryja robiać vyhlad, što niešta šukajuć u mabilnikach.
Kapia Doma aficeraŭ — piać aŭtobusaŭ, a taksama šmat śniehaŭboračnaj techniki.
11:46
Na padychodach da Kastryčnickaj spyniajuć ludziej i praviarajuć rečy.
Adzin ź pieršych udzielnikaŭ mitynhu pryjšoŭ na płošču ŭ vyšyvancy.
11:00
Pieršaja publičnaja akcyja pratestu pradprymalnikaŭ adbyłasia ŭ minuły paniadziełak 15 lutaha. Niahledziačy na svaju stychijnaść, jana akazałasia niečakana šmatludnaj. U joj uziali ŭdzieł kala 800 čałaviek. Pratestoŭcy patrabavali jak admieny ŭkaza 222, tak i źmieny palityčnaha i ekanamičnaha kursu krainy.
Napiaredadni siońniašniaj akcyi Mikałaj Statkievič źviarnuŭsia da pradprymalnikaŭ, prapanavaŭšy pierad praviadzieńniem mitynhu na Kastryčnickaj płoščy prynieści da Administracyi prezidenta z saboj zajavy z patrabavańniem admieny ŭkaza 222, admovy ad abmiežavańniaŭ na atrymańnie i asabisty ŭvoz rečaŭ z-za miažy, źnižeńnia cenaŭ pasłuh ŽKH.
«Zajavy možna i nie addavać, ale varta pryjści adnačasova, kab samym faktam našaha masavaha prychodu my mahli pakazać našuju niazhodu sa sprobaj ułady za naš košt likvidavać nastupstvy svajho biazhłuzdaha kiravańnia ekanomikaj. … Heta vašaje zakonnaje prava prychodzić u tuju pryjomnuju sa svaimi piśmovymi ci vusnymi patrabavańniami. Dla taho ž taja pryjomnaja i isnuje. Nijakich dazvołaŭ dla hetaha nie patrabujecca», — patłumačyŭ Statkievič.
Razam z tym Ministerstva handlu zajaŭlaje, što dziaržava źnižaje hradus u adnosinach ź IP.
Ułady nie buduć admianiać 222-y ŭkaz i praceduru siertyfikacyi, ale hatovyja pajści na spraščeńnie biźnies-pracesaŭ dla indyvidualnych pradprymalnikaŭ. Pra heta raspaviała ŭ intervju prahramie «Niediela» telekanała STB 21 lutaha namieśnik ministra handlu Biełarusi, sustaršynia rabočaj hrupy pa prablemnych pytańniach indyvidualnych pradprymalnikaŭ Iryna Narkievič.
Jana zajaviła, što pradprymalnik u handlovym centry ci na rynku moža mieć da troch «kropak». Adpaviednyja orhany dazvolać mieć supravadžalnyja dakumienty na tavar tolki ŭ adnoj ź ich. «Jak praviła, u jaho niedzie skancentravanyja dakumienty. Ciapier pa zakanadaŭstvie supravadžalnyja dakumienty pavinny być va ŭsich troch miescach. Navošta? My źnižajem hradus. My nie kažam, što nie pavinna być dakumientaŭ. My kažam, što my spraščajem. I kažam, što hetyja dakumienty pavinny być u adnym miescy», - zajaviła jana.
«Bolš za ŭsio paskudstvaŭ pryčyniaje jaŭrejonyš». Dziciačaja doktarka ź Minska šakavała antysiemickimi vykazvańniami34
Kamientary