Rasijskaja armija značna paskoryła tempy svajho nastupleńnia ŭ Danieckaj vobłaści. Za pieršyja dva miesiacy vosieni joj udałosia zachapić tut značnuju terytoryju, što, pa padlikach ekśpiertaŭ, źjaŭlajecca rekordam z pačatku poŭnamaštabnaj vajny. Asobnyja vajskoŭcy i palityki pačali kazać, što ŭkrainski front «pasypaŭsia». Ci tak heta, raźbirałasia Ukrainskaja słužba Bi-bi-si.
«Usie my viedajem i ja nie adkryju vajskovuju tajamnicu, što front u nas pasypaŭsia», — zajaviŭ u intervju 27 kastryčnika viadomy ŭkrainski hienierał Dźmitryj Marčanka, jaki kiravaŭ abaronaj Mikałajeva ŭ pačatku vajny. Pryčynami hetaha «abvału frontu» jon nazvaŭ deficyty bojeprypasaŭ i asabovaha składu va Uzbrojenych siłach Ukrainy, a taksama «razbałansavańnie kiravańnia».
Što tyčycca apošniaha, to Marčanka adznačyŭ, što maje na ŭvazie ŭ pryvatnaści častuju źmienu kamandujučych u vajskovych padraździaleńniach i pierakidańnie niepadrychtavanych čaściej na novyja napramki, što, u pryvatnaści, adbyłosia kala Vuhladara ŭ pačatku kastryčnika.
Tezis pra toje, što front «syplecca», adrazu padchapili rasijskija prapahandysty i Z-kanały, a taksama asobnyja ŭkrainskija palityki i vajenkary. Što ž nasamreč adbyvajecca na linii sudakranańnia ŭ Danieckaj vobłaści?
Padrychtoŭka da vyrašalnaha šturmu
Ministerstva abarony Rasii 29 kastryčnika paviedamiła pra zachop horada Sialidava, što za 15 km ad Pakroŭska. Doŭhi čas ukrainskija siły abaraniali hety nasieleny punkt, ale z druhoj pałovy kastryčnika rasijskija vojski pastupova zmahli abyjści jaho z fłanhaŭ, adrezaŭšy šlachi zabieśpiačeńnia, a zatym pačali šturm žyłych kvartałaŭ. Kab nie trapić u akružeńnie, siły abarony Ukrainy, vidavočna, adstupili z horada, a praciŭnik davoli chutka zaniaŭ jaho.
Hienštab USU situacyju kala Sialidava nie kamientuje, a blizki da Minabarony analityčny centr DeepState paćvierdziŭ 30 kastryčnika, što horad užo akupavany praciŭnikam. Padzieńnie Sialidava adkryvaje darohu rasijskaj armii da nastupleńnia na paŭdniovy fłanh Pakroŭska, a taksama praciahu ruchu ŭ bok Kurachava, a mienavita da jaho paŭnočnych uskrain.
Mienavita hetyja dva harady — važnyja łahistyčnyja i pramysłovyja centry Danbasa — imavierna, buduć asnoŭnymi metami rasijskich nastupaŭ najbližejšym časam, kaža ŭkrainskaj Bi-bi-si vysokapastaŭlenaja krynica va ŭładzie.
Ad Pakroŭska pa stanie na pačatak listapada front — na adlehłaści kala 6 km, a što tyčycca Kurachava, to, pa słovach rasijskich vajennych błohieraŭ, armija Rasii ŭžo sprabuje začapicca za jaho ŭschodniuju ŭskrainu. Taksama rasijskaja armija nabližajecca da jaho z poŭdnia z boku akupavanaha Vuhladara, prarvaŭšy liniju abarony USU kala Bohajaŭlenki i Šachciorskaha.
Ukrainskaje kamandavańnie, pavodle źviestak Bi-bi-si, nakiroŭvaje dadatkovyja padraździaleńni na abaronu hetaha kirunku. Adnak nie vyklučana, što rasijskaja armija pasprabuje paŭtaryć manieŭr, jaki atrymaŭsia z Vuhladaram i Sialidavym, heta značyć abyści harady z fłanhaŭ, a nie šturmavać ich «u łob».
Były načalnik upraŭleńnia stratehičnych kamunikacyj Hienieralnaha štaba USU, pałkoŭnik Jaŭhien Saśko nazyvaje hety taktyčny pryjom rasijan «žavać skivicami». Heta značyć, z paŭnočnaha i paŭdniovaha fłanhaŭ farmujucca mahutnyja «skivicy», jakija pastupova raschistvajuć i «zžoŭvajuć» abaronu vakoł horada, što ŭ vyniku pryvodzić da jaho padzieńnia.
Takaja ž situacyja moža paŭtarycca ŭ rajonie Kurachava, kali Rasija pasprabuje abyści horad na zachadzie ŭ rajonie siołaŭ Kanstancinopal i Andrejeŭka, jakija lažać na trasie Zaparožža — Danieck. Mienavita ŭ bok hetaha nadzvyčaj važnaha dla Ukrainy łahistyčnaha maršrutu ciapier adnačasova z poŭdnia i poŭnačy nastupajuć rasijskija vojski. Da trasy zastajecca kala 11 km z abodvuch fłanhaŭ.
«Spadziajusia, što «kurachaŭskaja kišenia» nie źjavicca ŭ vyniku sustrečnych udaraŭ (rasijan) na Andrejeŭku i «pažavać skivicami» tam nie atrymajecca», — piša pałkoŭnik Saśko.
Mienš ambicyjny varyjant dla rasijan: abyści Kurachaŭskaje vadaschovišča z poŭnačy i pierarezać trasu ŭ rajonie zachodniaha pryharada Kurachava — siała Dačnaje. U hetym vypadku dla RF taksama važna ŭziać pad kantrol siało Uśpienaŭka, što znachodzicca za 8 km na poŭdzień. Tut sychodziacca darohi z Kurachava, Dačnaha, Kaciarynaŭki i Vialikaj Navasiołki. Apošniuju ź ich rasijskaja armija ŭžo pierarezała ŭ rajonie Šachciorskaha.
Situacyja ŭ rajonie Pakroŭska taksama nie nadta spryjalnaja dla USU. Jašče ŭ kancy leta ŭkrainskija abaroncy z dapamohaj pryciahnieńnia reziervaŭ zmahli spynić imklivaje prasoŭvańnie praciŭnika da ŭschodnich uskrain hetaha horada i jaho spadarožnika Mirnahrada. Rasijanam taksama nie ŭdałosia pierarezać važnuju trasu Pakroŭsk — Kanstancinaŭka. Ale ciapier, paśla padzieńnia Sialidava, VS RF zmohuć znoŭ aktyvizavać ruch u hetym rajonie, ale abychodziačy horad z poŭdnia ŭzdoŭž rečyšča raki Sałonaj i čyhunačnaha pałatna ŭ kirunku pasiołkaŭ Navatroickaje i Šaŭčenka.
U vakolicach samoha Pakroŭska USU ŭzvodziać fartyfikacyjnyja zbudavańni, zajaviŭ kiraŭnik haradskoj vajennaj administracyi Pakroŭska Siarhiej Dabrak u efiry nacyjanalnaha telemarafona 30 kastryčnika. Sam nasieleny punkt budzie častkova zabłakavany dla ŭjezdu i vyjezdu, dadaŭ jon.
«Fartyfikacyjnyja zbudavańni ŭzvodziacca ŭ Pakroŭsku, i ŭžo my zachodzim u horad, i peŭnyja ŭčastki horada buduć błakavacca… Ciapier u horadzie ŭžo pabudavana niekalki ešałonaŭ, jakimi častkova buduć pierakrytyja vulicy i mikrarajony Pakroŭska», — rastłumačyŭ kiraŭnik horada vydańniu «Suśpilnie Donbas».
Pavodle jaho źviestak, kala 80% infrastruktury horada źniščana, adnak u im usio jašče zastajecca amal 12 tysiač čałaviek, siarod ich 55 dziaciej.
Ci možna nazyvać heta abvałam frontu
Pavodle padlikaŭ analitykaŭ niamieckaha Welt, rasijskija vojski z pačatku kastryčnika zachapili 478 kvadratnych kiłamietraŭ ukrainskaj terytoryi, što stała najbolšym prahresam z momantu aktyŭnaj fazy bajavych dziejańniaŭ u sakaviku 2022 hoda.
Pavodle źviestak ukrainskaha prajekta DeepState, u minułym miesiacy rasijanam udałosia akupavać kala dvuch dziasiatkaŭ nasielenych punktaŭ, a taksama harady Vuhladar i Sialidava.
Izrailski vajskovy ekśpiert David Hiendelman kaža, što ŭ hetym vypadku havorka idzie pra adstupleńnie ŭkrainskich siłaŭ va ŭmovach značnaj pieravahi praciŭnika ŭ žyvoj sile i ŭ pavietry. Pry hetym prasoŭvańnie vojskaŭ RF na samaj spravie davoli pavolnaje.
«Takija zajavy pra «abvał frontu» — heta ŭ asnoŭnym emocyi. Da realnaha abvału tam daloka», — havoryć analityk ukrainskamu Bi-bi-si i dadaje, što front padčas hetaj vajny «pasypaŭsia» adzin raz i heta było z rasijskaha boku.
«Apošni taki prykład byŭ vosieńniu 2022 hoda mienavita z rasijskaha boku, kali byŭ ukrainski praryŭ na Charkaŭskim kirunku. Tam sapraŭdy pasypaŭsia front na kankretnym vialikim učastku».
U vieraśni 2022 hoda USU zmahli prarvać rasijskuju abaronu kala horada Bałakleja na Charkaŭščynie i za karotki pramiežak času vyzvalili vialikuju terytoryju. Pry hetym adstupleńnie rasijan na niekatorych učastkach było chaatyčnym, jany traplali ŭ akružeńnie i kidali vialikija arsienały zbroi i bojeprypasaŭ.
U adroźnieńnie ad hetaj situacyi, adstupleńnie USU z nasielenych punktaŭ paŭdniovaha i centralnaha Danbasa adbyvajecca ŭ asnoŭnym arhanizavana, časta z arjerhardnymi bajami va ŭmovach, kali dalejšaja abarona hetych terytoryj budzie aznačać značnyja straty.
Heta kantrastuje z taktykaj papiarednich hadoŭ, jakaja jarka prajaviła siabie padčas bitvy za Bachmut u 2023 hodzie. Tady USU stracili vialikuju kolkaść padrychtavanych bajcoŭ padčas vuličnych bajoŭ u horadzie.
Asnoŭnaj prablemaj Ukrainy ciapier Hiendelman nazyvaje deficyt žyvoj siły va USU. Z-za adsutnaści asabovaha składu armija vymušanaja raspylać siły na roznych učastkach frontu, i heta dazvalaje rasijanam bić u styk pamiž padraździaleńniami abo praciskać «stomlenuju» abaronu praciŭnika.
Dyrektar vajskovych prahram kijeŭskaha Centra Razumkova, pałkoŭnik zapasu USU Mikałaj Sunhuroŭski kaža, što, akramia prablem z mabilizacyjaj, rasijski nastup na Danbasie vyjaviŭ jašče šerah niedachopaŭ va ŭkrainskim kiraŭnictvie.
«Tak, heta nie abvał frontu, ale, sapraŭdy, jość surjoznyja niedachopy i surjoznyja prablemy. Usio zaležyć ad taho, jak chutka i źmiastoŭna adreahuje na ich ułada», — skazaŭ ekśpiert ukrainskamu Bi-bi-si.
Jon źviartaje ŭvahu na niedastatkovuju padrychtoŭku kamandnaha składu USU, niedachopy kiravańnia i vajskovaj arhanizacyi. Niekatoryja pytańni ŭžo vyrašajucca ŭnutry armii, ale kab naładzić sistemu, patrebnyja aktyŭnyja dziejańni z boku palityčnaj ułady.
Ci mahčyma ŭ takich umovach utrymać Pakroŭsk i Kurachava ad akupacyi?
«Kali kazać pra karotkaterminovuju pierśpiektyvu, to heta mahčyma za košt prymianieńnia apieratyŭnych i stratehičnych reziervaŭ», — adznačaje Sunhuroŭski.
«Ale jany pakul nie ŭsie i nie ŭ poŭnaj stupieni hatovyja, a pa-druhoje, ja tak razumieju, što jany stvaralisia, skažam tak, dla zimova-viasnovaha kontrnastupleńnia i nie vielmi chočacca ich mienavita ciapier vykarystoŭvać, tamu što heta paŭpłyvaje na dalejšyja płany USU».
Krynica Bi-bi-si ŭ palityčnym kiraŭnictvie Ukrainy pryznaje, što situacyja na froncie «vielmi drennaja». Ale spadziajecca, što, pa-pieršaje, rasijski nastup zatarmozić niepahadź va Ukrainie ŭ pačatku listapada, a pa-druhoje, mnohaje ŭ płanie dalejšych pierśpiektyŭ stanie zrazumieła paśla prezidenckich vybaraŭ u ZŠA.
«Situacyja vielmi drennaja, ale nie katastrafičnaja. Padkreślivaju, heta jašče nie katastrofa», — skazaŭ čynoŭnik.
Jon nie vyklučyŭ padzieńnia Pakroŭska i Kurachava ŭ najbližejšyja miesiacy, ale padkreśliŭ: hałoŭnaja meta — nie prosta zachavać Ukrainu jak dziaržavu, ale i nie stracić bolš nivodnaha abłasnoha centra.
Vidavočna, havorka moža iści pra Chierson i Zaparožža, jakija Uładzimir Pucin publična nazyvaje «rasijskaj terytoryjaj» i patrabuje vyvadu ŭkrainskich vojskaŭ z hetych abłasnych centraŭ.
Ukraina praspała dronavuju revalucyju? Čamu optavałakonnyja drony mianiajuć mnohaje na poli boju
Źniasilenyja vajnoj. Zachad jašče dapamahaje Ukrainie trymacca, ale ŭžo nie dapamahaje pieramahać
ZŠA vydzialajuć novuju dapamohu Kijevu na fonie dałučeńnia da vajny vajskoŭcaŭ KNDR
Źjaŭleńnie paŭnočnakarejskich vojskaŭ va Ukrainie — krok da Treciaj suśvietnaj?
Na sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?7
Kamientary