U mahiloŭskaj kałonii pamior 22-hadovy palitźniavoleny Dźmitryj Šlethaŭer
Pravaabaroncy «Viasny» atrymali paćviardžeńnie, što ŭ mahiloŭskaj kałonii № 15 pamior hramadzianin Rasijskaj Fiederacyi palitviazień Dźmitryj Šlethaŭer. Pa papiaredniaj infarmacyi, heta zdaryłasia 11 kastryčnika 2024 hoda.
Dźmitryj Šlethaŭer prabyŭ u kałonii mienš za miesiac. Dakładnaja pryčyna jahonaj śmierci nieviadomaja.
Letam jaho asudzili da 12 hadoŭ kałonii va ŭmovach uzmocnienaha režymu za «špijanaž» (art. 358 KK) i «sadziejničańnie ekstremisckaj dziejnaści» (č. 1 art. 361-4 KK).
Z sacsietak stała viadoma, što Dźmitryju Šlethaŭeru 22 hady. Jon naradziŭsia ŭ rasijskim Słaŭharadzie ŭ Ałtajskim krai. U 2018 hodzie atrymaŭ biełaruski DNŽ. Chłopiec pracavaŭ u Kamiancy na pradpryjemstvie pa vytvorčaści palimiernaj pradukcyi i ŭpakoŭki.
Krychu mienš za hod palitviaźnia ŭtrymlivali za kratami. Pa infarmacyi pravaabaroncaŭ, taksama byŭ zatrymany i brat Dźmitryja, ale paźniej jaho departavali ŭ Rasiju.
Niekalki miesiacaŭ tamu nad Šlethaŭeram adbyŭsia sud pavodle dvuch artykułaŭ Kryminalnaha suda. Pakul adbyvalisia sudovyja pasiadžeńni, u jaho naradziłasia dzicia.
U raskładzie sudoŭ na sajcie Viarchoŭnaha suda nie było infarmacyi pra razhlad jaho kryminalnaj spravy — tolki data razhladu jaho apielacyjnaj skarhi. Apielacyja prajšła 30 žniŭnia, rašeńnie prymała sudovaja kalehija pad staršynstvam sudździ Edhara Marcirasiana.
Pa infarmacyi «Viasny», Dźmitryju pryznačyli 12 hadoŭ kałonii va ŭmovach uzmocnienaha režymu. Napačatku vosieni jaho nakiravali adbyvać termin u mahiloŭskuju kałoniju № 15. Niezadoŭha paśla etapu jaho znajšli pamierłym, ale dakładnaja pryčyna śmierci nieviadomaja.
Stała viadoma pra zatrymańnie 77-hadovaha Vasila Hustyra, adnaho z najlepšych ahraryjaŭ Biełarusi8
Kamientary