U Litvie zahinuŭ były rasijski nieanacyst «Kazak», jaki byŭ suprać Pucina
Nieanacyst Dźmitryj Novikaŭ za svaju dziejnaść pravioŭ u turmie 14 hadoŭ. Kali ŭ 2019 hodzie vyzvaliŭsia, to ŭciok z Rasii va Ukrainu. A apošnija hady žyŭ u Litvie.
Jak pišuć rasijskija telehram-kanały, 23 kastryčnika ŭ Litvie niedaloka ad vioski Jaŭniškies, na trasie Ryha — Šaŭli — Taŭrohi — Kalininhrad hruzavik źbiŭ mužčynu, jaki ad atrymanych traŭm pamior na miescy. Jak vyśvietliłasia paźniej, achviaraj staŭ adzin ź viadomych u minułym aktyvistaŭ nieanacysckaha ruchu ŭ Tatarstanie Dźmitryj Novik pa mianušcy «Kazak».
Za svaje nieanacysckija pohlady Novikaŭ pravioŭ za kratami 14 hod. Pieršy termin — 4 hady — jon atrymaŭ va ŭzroście 21 hoda, kali ździejśniŭ napad z nažom na svajho idejnaha voraha — aktyvista levych pohladaŭ. Paśla vyzvaleńnia ŭ 2008 hodzie Novikaŭ stvaryŭ moładzievuju nieanacysckuju hrupoŭku «Kazanskaja dyvizija», jakaja arhanizoŭvała tak zvanyja «biełyja patruli», padčas jakich źbivalisia ludzi niesłavianskaj źniešnaści.
U 2010 hodzie jaho znoŭ zatrymali za hrupavyja napady na antyfašystaŭ, što pryviało da novaha terminu źniavoleńnia — jašče 3,5 hoda. Da jakoha nieŭzabavie dadali hod za stvareńnie ekstremisckaj hrupoŭki.
Navat u turmie Novikaŭ praciahvaŭ kiravać «Kazanskaj dyvizijaj» i navat padbuchtorvaŭ svaich prychilnikaŭ da sproby padpału budynka ŭsietatarskaha hramadskaha centra ŭ Kazani.
Siłavikam udałosia pierachapić pierapisku i praduchilić padpał. U vyniku Novikavu dadali jašče čatyry hady. Sam ža jon u intervju litoŭskim žurnalistam śćviardžaŭ, što sprava była sfabrykavanaja.
U 2014 hodzie, pa słovach samoha Novikava, jamu prapanoŭvali napisać prašeńnie ab pamiłavańni i adpravicca ŭ zonu bajavych dziejańniaŭ u Danieckaj i Łuhanskaj abłaściach. Ale jon admoviŭsia. Adnamu ź litoŭskich vydańniaŭ Novikaŭ raskazvaŭ, što ŭ kałonii padviarhaŭsia katavańniam i psichičnamu ŭździejańniu.
Apošniuju sudzimaść — 2,5 hoda kałonii za ekstremizm u internecie — Novikaŭ atrymaŭ nieŭzabavie paśla vyzvaleńnia. Mužčyna śćviardžaŭ, što jaho abvinavacili ŭ repoście niejkich vykazvańniaŭ, jakija jon nie rabiŭ.
Urešcie Novikaŭ źjechaŭ va Ukrainu i paprasiŭ tam palityčny prytułak. Śćviardžaŭ, što «adnym ź pieršych vykazvaŭsia, što Pucin i jaho čynoŭniki — hałoŭnyja vorahi Rasii», pravodziŭ mitynhi, a taksama padtrymlivaŭ «Azoŭ».
Kali ž u prytułku było admoŭlena, to ŭ sakaviku 2021 hoda Novikaŭ praź Biełaruś pierabraŭsia ŭ Litvu. Pa jahonych słovach, tudy jon trapiŭ nielehalna pa bałotach.
U intervju litoŭskamu vydańniu ŭ 2021 hodzie Novikaŭ raskazvaŭ, što, znachodziačysia va Ukrainie jon zajmaŭsia arhanizacyjaj pratestaŭ u abaronu Alaksieja Navalnaha, davaŭ intervju i raskazvaŭ pra toje, što adbyvajecca ŭ kałonii va Uładzimiry.
23 kastryčnika 2024 hoda Novikaŭ pry zahadkavych abstavinach trapiŭ pad koły fury.
Pamior dzied Koli Łukašenki — były viazień HUŁAHa, asudžany za dapamohu «banderaŭcam»9
Kamientary