Čerhi z fur na vyjezd ź Biełarusi mocna skaracilisia. Ale heta nie pazityŭnaja navina dla vašych kašalkoŭ

Pazityŭnyja ličby, jakija nie radujuć

Pa stanie na 1 kastryčnika, vyjezdu ź Biełarusi ŭ susiednija krainy ES čakali bolš za 2700 hruzavikoŭ. Najbolšaje skapleńnie było na miažy z Polščaj — 900-950 fur. Na litoŭskim kirunku — 700 u «Kamiennym Łozie» i 650 u «Bieniakoniach». Vyjezdu ŭ Łatviju čakali 425 hruzavikoŭ.

Za miesiac situacyja z čerhami kardynalna źmianiłasia. 1 listapada vyjezdu ź Biełarusi ŭ ES čakała ŭsiaho 640 hruzavikoŭ, suprać 2700 miesiac tamu.

Najbolšaje skapleńnie na łatvijskim kirunku — 260 fur, na miažy ź Litvoj u «Bieniakoniach» stajała 240 hruzavikoŭ, u «Kamiennym Łozie» — 150.

Na miažy z Polščaj čarhi z hruzavikoŭ niama ź siaredziny miesiaca.

Čamu tak adbyvajecca?

Na skaračeńnie čerhaŭ na miažy ź ES paŭpłyvali jak sankcyi ES, tak i kontrsankcyi, uviedzienyja biełaruskim bokam.

Novy pakiet sankcyj ad Jeŭrasajuza byŭ pryniaty jašče 29 červienia 2024 hoda, ale, za niekatorymi vyklučeńniami, abaviazki pa kantraktach, zaklučanych da 1 lipienia 2024 hoda, mahli vykonvacca da 2 kastryčnika 2024 hoda.

Praz heta imparciory namahalisia ŭvieźci ŭ krainu jak maha bolš tavaraŭ padčas pierachodnaha pieryjadu. Kali sankcyi zapracavali napoŭnicu, śpis dazvolenych tavaraŭ skaraciŭsia, što pryviało da źnižeńnia tavaraabarotu i adpaviedna čerhaŭ na miažy.

Jany pastupova źmianšalisia pa miery taho, jak fury, jakija pryjechali da 1 kastryčnika, vyhružalisia i viartalisia ŭ ES.

Ale na jeŭrapiejskich sankcyjach abmiežavańni nie skončylisia. U adkaz na abmiežavańni z boku Jeŭrasajuza Biełaruś uviała kontrsankcyi, zabaraniŭšy ŭvoz u našu krainu šerahu tavaraŭ z «niesiabroŭskich» krain.

Hetyja abmiežavańni zapracavali z 15 kastryčnika 2024 hoda. U śpis trapili jak pazicyi, jakija i biez kontrsankcyj nielha było vyvozić ź ES u Biełaruś, tak i novyja. Naprykład, sumki i valizki, papiera, padhuźniki i pialonki.

Pavialičyć

Ci traplaje sankcyjonka ŭ Biełaruś?

Jak i ŭ papiarednija časy, značnuju častku sankcyj pry žadańni možna abyjści. Asabliva, kali heta abmiežavańni źniešnija, a nie ŭnutrybiełaruskija.

Tym nie mienš, kožnyja ruchi pa abychodzie sankcyj upłyvajuć na kančatkovy košt tavaru.

Pazicyi, jakija ciapier nielha naŭprost zavozić ź ES u Biełaruś, ciapier dastaŭlajuć u našu krainu alternatyŭnym šlacham — čaściej za ŭsio praz Turcyju.

Praz heta, pa słovach imparcioraŭ, sabiekošt sankcyjonnych tavaraŭ ź Jeŭropy vyras na 10-20% u zaležnaści ad kankretnych pazicyj.

Pryčym, jak adznačajuć biznesmieny, ciapier mienavita Biełaruś, a nie Rasija bolš adčuvaje na sabie ŭpłyŭ ad hetych sankcyj, bo kali dastaŭka ažyćciaŭlajecca paŭdniovym šlacham, hruz spačatku traplaje ŭ Rasiju. U vyniku atrymlivajecca, što dastavić sankcyjonku ŭ Maskvu krychu tańniej, čym u Hrodna ci Brest, jakija znachodziacca pobač z krainami ES. A Krasnadarski kraj dyk naohuł ciapier našmat bližej dla dastaŭki tavaraŭ ź ES, čym Biełaruś.

Što kažuć pieravozčyki

Upłyŭ ad novych sankcyj adčuvajuć na sabie taksama i pieravozčyki. Praz toje, što dastaŭlać ź ES u Biełaruś ciapier mała što dazvolena, fury časam davodzicca adpraŭlać zahružanymi tolki napałovu. Takim čynam taryf na dastaŭku hruzaŭ ź Jeŭropy ŭ Biełaruś padaje, ale jość niuans.

Pavialičyć

Biznesmien, jaki zajmajecca impartam tavaraŭ z Polščy, padzialiŭsia nazirańniami, što kali zamaŭlaješ dastaŭku praz łahistaŭ, to taryfy ahučvajuć tyja samyja, što i 2-3 miesiacy raniej, kali situacyja była inšaja.

«Ale kali damaŭlacca naŭprost z kampanijami pieravozčykami, to staŭki za fracht užo pajšli ŭniz na 20-30%. Vyhladaje, što łahisty prosta sprabujuć trymać toj samy taryf dla hruzaadpraŭlalnikaŭ i adnačasova panižać dla pieravozčykaŭ, kab samim zarablać bolš», — dzielicca nazirańniami imparcior.

Staŭki ŭpali, ale nie dla kančatkovaha pakupnika

Padobnuju situacyju sa staŭkami na dastaŭku možna nazirać i ŭ aŭtamabilnaj halinie, kali kampanii-pasiaredniki praciahvajuć ahučvać svaim klijentam raniejšyja rascenki.

Pavialičyć

«U ich usio stabilna, jakija byli dla klijentaŭ ceny, takija i zastalisia, choć sami jany za pieravozku daŭno ŭžo nam płaciać mienš, čym było na piku, kali ŭsie mašyny jechali praź Biełaruś. Naprykład, viasnoj nam kampanii-pasiaredniki płacili pa 800-900 jeŭra za dastaŭku z Kłajpiedy ŭ Minsk, a ciapier płaciać pa 500-600 jeŭra.

Pry hetym, kali pahladzieć taryfy na sajtach, pa jakich jany dastaŭlajuć aŭto klijentam, to tam ničoha nie źmianiłasia», — tłumačyć pieravozčyk.

Što ŭ vyniku?

Praz novyja abmiežavańni častka tavaraŭ na pryłaŭkach padaražeje, niekatoryja całkam źniknuć praź niemetazhodnaść dastaŭlać ich alternatyŭnymi šlachami abo praź niemahčymaść impartu ŭžo pa pryčynie kontrsankcyj.

Pavialičyć

Niepadsankcyjnyja tavary ŭ teoryi mohuć krychu patańnieć za košt bolš tannaj łahistyki ź ES u Biełaruś. Ale, jak pakazvaje praktyka, ceny rastuć chutka i rehularna, a voś padajuć sa skrypam, navat tady, kali dla hetaha jość pieradumovy.

Upłyvać na ekanomiku Biełarusi budzie taksama toje, što ŭ krainie zastaniecca našmat mienš kampanij i ludziej, jakija dziakujučy sankcyjnamu dysparytetu pamiž Biełaruśsiu i Rasijaj mahli zarablać časam davoli vialikija hrošy.

• 0
• 0
• 0
• 0
• 0
• 0
• 0
• 0