ЗША падоўжылі тэрмін дзеяння закону, які абмяжоўвае гандаль з Беларуссю
Да 17 жніўня 2013 года.
Прэзыдэнт ЗША Барак Абама падоўжыў да 17 жніўня 2013 году дзеяньне фэдэральнага закону, які абмяжоўвае гандлёвыя адносіны з шэрагам краін, у ліку якіх Беларусь.
Як вынікае з дакумэнту, разьмешчанага на афіцыйным сайце Белага дому, гэты закон быў прыняты ў кастрычніку 1977 «па прычыне экстраардынарнай пагрозы нацыянальнай бясьпецы, зьнешняй палітыцы і эканоміцы ЗША» пры гандлі зь некаторымі краінамі. Дзеяньне дакумэнту падаўжаецца тэхнічна, але сьпіс краін, якія падпадаюць пад санкцыі, пэрыядычна карэктуецца.
Беларусь была ўключана ў гэты пералік у 2006 годзе — «за разбурэньне дэмакратычных інстытутаў» і ў 2011-м — «пасьля агрэсіі ўладаў у дачыненьні да грамадзянскіх асоб». У сьпісе краін, гандлёвыя адносіны зь якімі абмяжоўваюцца законам, фігуруюць таксама Іран, Бірма, Судан, Зімбабвэ, Сырыя, Паўночная Карэя, Лібія і Расея. Апошняя была ўключаная ў сьпіс у 2000 годзе «ў мэтах прадухіленьня экспарту высокаўзбагачанага ўрану».
Два месяцы таму Барак Абама таксама працягнуў на год санкцыі ў дачыненьні да беларускіх чыноўнікаў, уведзеныя 16 чэрвеня 2006 году яго папярэднікам Джорджам Бушам. Такое рашэньне прынятае ў сувязі з тым, што ўладамі Беларусі «зроблены крок назад у разьвіцьці дэмакратычнага кіраваньня і павагі да правоў чалавека», паведамляе БелаПАН.
Палітычны аглядальнік Паўлюк Быкоўскі камэнтуе для «Свабоды» рашэньне ЗША падоўжыць тэрмін дзеяньня закону, які абмяжоўвае гандаль з Беларусьсю: «З аднаго боку, гэта, канечне, руціннае рашэньне, бо падаўжаецца статус-кво. З другога боку, можна было б зьдзіўляцца, калі б ЗША сёлета перамянілі палітыку адносна Беларусі ў бок паляпшэньня. Бо нейкіх станоўчых тэндэнцыяў не было зафіксавана.
На мой погляд, прысутнасьць Беларусі ў такім сьпісе „восі зла“ зьяўляецца вельмі кепскім і з пункту гледжаньня зьнешняй палітыкі Беларусі, і зьнешнеэканамічнай дзейнасьці Беларусі. Але гэта цягнецца ўжо даволі працяглы час. І можна толькі казаць, што палітыка ЗША ў гэтым кірунку зьяўляецца пасьлядоўнай. А вось нейкіх станоўчых зьменаў для Беларусі чакаць не даводзіцца».
«Дамоклаў Меч». Канал «Белорусскій сіловік» настолькі прарасійскі, што многія меркавалі, што гэта расіяне яго вядуць. Не, за ім стаіць суперагент Лукашэнкі25
Каментары