У Кангрэс ЗША ўпершыню абралі трансгендара

Па выніках выбараў у Кангрэс стала вядома, што Сару Макбрайд, якая была сенатарка ў асамблеі штата Дэлавэр, абралі ў Палату прадстаўнікоў ЗША. Яна ўпэўнена абышла свайго апанента ад Рэспубліканскай партыі.

Макбрайд нарадзілася ў 1990 годзе ў Уілмінгтане — самым вялікім па колькасці насельніцтва горадзе маленькага штата Дэлавэр. Шлях у палітыку пачала ў 16 гадоў, калі далучылася да выбарчага штаба Дэмакратычнай партыі ў сваім штаце.

У 2008 годзе яна брала ўдзел у кампаніі па выбарах губернатара штата, а праз два гады — у кампаніі Бо Байдэна, сына Джо Байдэна, які тады балатаваўся на пасаду генпракурора штата — сям'я Байдэнаў жыве ў Дэлавэры.

У прэсе адзначаецца, што Макбрайд адыграла важную ролю ў фарміраванні поглядаў прэзідэнта Джо Байдэна на пытанні LGBTQ. Прэзідэнт Байдэн напісаў прадмову да мемуараў Макбрайд Tomorrow Will Be Different, якія выйшлі ў 2018 годзе.

У кнізе жанчына апісвае свой асабісты шлях, у тым ліку сустрэчу са сваім мужам, трансгендарным актывістам Эндру Крэем, з якім яна пазнаёмілася на мерапрыемстве па правах LGBTQ у Белым доме ў 2012 годзе. Крэй памёр ад раку ў 2014 годзе, усяго праз некалькі дзён пасля іх вяселля.

Вядома, што свой камінг-аўт як трансгендарнай асобы Макбрайд здзейсніла ў 2012 годзе, калі апублікавала артыкул у студэнцкай газеце Амерыканскага ўніверсітэта, дзе на той час вучылася і была старшынёй студэнцкай рады. Пазней гэты артыкул перадрукавалі іншыя выданні, сярод якіх і некамерцыйная арганізацыя Лэдзі Гагі Born This Way Foundation.

У 2012 годзе МакБрайд прайшла стажыроўку ў Белым доме. У наступным годзе яна стала штатнай супрацоўніцай арганізацыі Equality Delaware, якая змагаецца за правы LGBTQ у штаце Дэлавэр. 

Некалькі гадоў Макбрайд працавала прэс-сакратаром у адной з найбуйнейшых арганізацый ЗША, якая ставіць сваёй мэтай абарону правоў лесбіянак, гомасэксуалаў, бісексуалаў і трансгендараў, — Human Rights Campaign.

Праз чатыры гады пасля свайго публічнага камінг-аўту як трансгендарнай асобы Макбрайд стала першай трансгендарнай асобай, якая выступіла з прамовай на нацыянальным партыйным кангрэсе ў ЗША. Гэта адбылося на канвенцыі Дэмакратычнай партыі ў 2016 годзе.

У 2020 годзе Макбрайд стала першай адкрытай трансгендарнай асобай, абранай у Сенат штата ЗША.

На апошніх выбарах яна перамагла ў барацьбе за месца ў Палаце прадстаўнікоў Кангрэса ЗША.

Як піша BBC, абранне Макбрайд адбылося ў той момант, калі рэспубліканцы, у тым ліку многія з яе будучых калегаў на Капіталійскім пагорку, актыўна выступаюць за законы, якія забараняюць непаўналетнім доступ да гендарных медыцынскіх працэдур і крытыкуюць удзел трансгендарных спартоўцаў у гендарна раздзеленых спаборніцтвах.

Таму тое, што Макбрайд здолела перамагчы на канкурэнтных выбарах, звяртае на сябе ўвагу.

• 6
• 4
• 3
• 6
• 0
• 0
• 1
• 0