«Калі я прачнулася, у маёй похве былі два пальцы». Фігурыста Дзясятава вінавацяць у сэксуальным гвалце
Эстонская фігурыстка Сален Мазэнг сцвярджае, што ён скарыстаўся яе бездапаможным станам і цішком згвалціў, пакуль яна была пад снатворным.
Падрабязнасці сэксуальнага скандалу вакол 23-гадовага фігурыста Івана Дзясятава, які да 2021 года прадстаўляў Расію, затым выступаў за Беларусь, а з 2023 года перайшоў пад сцяг ЗША, расказвае французскае выданне Mediapart.
Дзясятаў разам са сваёй цяперашняй партнёркай па танцах на лёдзе і жонкай Ізабэлай Фларэнс заваяваў бронзу на турніры CS Golden Spin of Zagreb у снежні 2023 года. Менавіта падчас знаходжання ў Заграбе ён павёў сябе непрыстойна адносна сваёй калегі — фігурысткі, ураджэнкі Францыі Сален Мазэнг (Solène Mazingue), якая разам са сваім партнёрам па танцах Маркам Яўгеніем Гайдаенкам выступае за Эстонію. Да пачатку вайны Расіі ва Украіне пара трэніравалася ў Маскве.
У верасні гэтага года 21-гадовая Мазэнг апублікавала на сваёй старонцы ў інстаграме відэа, у якім заявіла, што перанесла сэксуальны гвалт з боку Дзясятава.
Праз два месяцы спартсменка падзялілася падрабязнасцямі з французскім выданнем.
Па словах дзяўчыны, у адзін з вечароў яна разам з Дзясятавым і аўстралійскай фігурысткай Холі Харыс павячэралі ў рэстаране гатэля Westin Zagreb, у якім спыніліся падчас спаборніцтваў. Пасля пасядзелак з іншымі спартсменамі бліжэй да апоўначы Мазэнг пайшла спаць. Харыс і Дзясятаў правялі дзяўчыну да яе нумара.
Па словах Салан, праз траўму галавы, якую яна атрымала ў канцы 2022 года, у яе ёсць праблемы са сном, таму яна пастаянна прымае снатворнае. Так было і ў той вечар.
Далей, як сцвярджае Мазэнг, каля трох гадзін ночы яна прачнулася, бо «адчула нешта ўнутры свайго цела». «Калі я ачомалася, то зразумела, што ў маёй похве як мінімум два пальцы», — цытуе французскае выданне словы з заявы спартоўкі ў паліцэйскі ўчастак Сэн-Жэрмэн-ан-Ле, якую яна падала ў красавіку 2024 года.
Па словах Мазэнг, па татуіроўцы яна пазнала Дзясятава, які быў побач поўнасцю голы. Пасля гэтага яна ўцякла ў ванны пакой і замкнулася ў ім. Іван спытаўся, ці ўсё з ёй у парадку, але не атрымаў адказу. Прыкладна праз гадзіну дзяўчына выйшла з ваннага пакоя. На той час Дзясятава ў нумары ўжо не было.
На наступны дзень Сален абмянялася з Іванам паведамленнямі ў сацыяльнай сетцы.
«Чаму ты апынуўся ў маім ложку?» — спытала дзяўчына. «Твае дзверы былі закрытыя, але не замкнёныя. І я не змог прымусіць сябе вярнуцца ў нумар», — адказаў мужчына. «Я памятаю, што твае рукі апынуліся ўнізе. Проста скажы праўду», — папрасіла Мазэнг. «Я зрабіў гэта. А потым ты прачнулася. Мне шкада», — адпісаў Дзясятаў. Пазней, па словах дзяўчыны, ён прапанаваў сустрэцца ўвечары, каб пагаварыць, але яна адмовілася.
Як сцвярджае спартсменка, пра тое, што з ёй адбылося, яна расказала былой эстонскай фігурыстцы Эміліі Арм, якая цяпер працуе суддзёй. Тая паабяцала перадаць інфармацыю ў эстонскую федэрацыю фігурнага катання. Аднак эстонская федэрацыя, атрымаўшы інфармацыю праз трэцюю асобу, не стала звязвацца з іншымі арганізацыямі без дазволу самой пацярпелай.
Акрамя Арм, Сален расказала пра ўсё маме і трэнеру Мары-Франс Дзюбрэ, якая, усведамляючы сур’ёзнасць сітуацыі, паабяцала падаць скаргу ў федэральную праграму Skate Safe, адказную за збор паведамленняў і сведчанняў аб сэксуалізаваным гвалце, і кіраўніцтву зборнай ЗША. Аднак у выніку яна гэтага не зрабіла. У выніку 16 верасня 2024 года Мазэнг сама падала скаргу. Праз месяц, 18 кастрычніка, Skate Safe адхіліла Івана Дзясятава ад выступленняў за «неналежныя паводзіны».
Беларускі фігурыст збірае 25 тысяч даляраў, каб выступаць за ЗША
Фігурыста, які раней выступаў за Беларусь, злавілі ў ЗША на сэксе з непаўналетняй
«Сказалі, да канца вайны нават не спрабаваць уехаць». Трэнерку беларускіх фігурыстаў не пусцілі ў Расію
Былога караля хіп-хопу P. Diddy усё больш мужчын абвінавачваюць у сэксуальным гвалце
Каментары