Трох ласёў і аднаго мядзведзя збілі машыны за адну ноч на трасе М1 у адным раёне
Чатыры аварыі, у якіх загінулі тры ласі і адзін мядзведзь, здарыліся за адну ноч у Крупскім раёне, паведаміла УУС Мінскага аблвыканкама. Абышлося без чалавечых ахвяр.
Чатыры ДТЗ з удзелам дзікіх жывёл адбылося ноччу 25 мая на тэрыторыі Крупскага раёна.
У 22:55 на 468-м кіламетры аўтадарогі М1 «Брэст — Мінск — мяжа РФ» адбылося два ДТЗ запар. Аўтамабілі збілі двух ласёў.
У 01:20 на 490-м кіламетры быў збіты мядзведзь.
А яшчэ праз 50 хвілін на 478-м кіламетры адбылося чарговае ДТЗ — быў збіты лось.
ДАІ Крупскага РАУС папярэджвае: пачасціліся выпадкі ДТЗ з удзелам дзікіх жывёлаў, кіроўцам неабходна быць вельмі ўважлівымі на дарозе, асабліва ў цёмны час сутак.
Каментары