Галоўнакамандуючы УСУ Аляксандр Сырскі ў ноч на суботу паведаміў аб вывадзе ўкраінскіх сіл з Аўдзееўкі ў Данецкай вобласці. Расіянам удалося акружыць частку ўкраінскіх войскаў і перарэзаць апошнюю вялікую трасу, па якой ажыццяўлялася забеспячэнне тых, хто абараняўся, піша BBC.
«Зыходзячы з аператыўнай абстаноўкі, якая склалася вакол Аўдзееўкі, каб пазбегнуць акружэння і захаваць жыццё і здароўе вайскоўцаў, прыняў рашэнне аб вывадзе нашых падраздзяленняў з горада і пераходу да абароны на больш выгадных рубяжах», — гаворыцца ў заяве Сырскага.
Расейскія войскі спрабавалі захапіць Аўдзееўку з самага пачатку поўнамаштабнага ўварвання ў лютым 2022 года. Маштабны наступ на яе вёўся з восені 2023-га.
Крыніцы, блізкія да расейскай улады, паведамлялі, што з Крамля паступіла ўказанне любой цаной захапіць гэты горад да сакавіцкіх прэзідэнцкіх выбараў, каб прадэманстраваць поспехі Уладзіміра Пуціна ў вайне супраць Украіны напярэдадні яго перавыбрання.
Сілы абароны Украіны доўга трымалі абарону, у канцы студзеня эксперты загаварылі аб крытычнай сітуацыі і неабходнасці выводзіць гарнізон, аднак гэтага не адбылося.
Аўдзееўка — невялікі прамысловы горад побач з Данецкам, захопленым прарасейскімі сепаратыстамі пры падтрымцы расейскіх войскаў амаль 10 гадоў таму — вясной 2014-га.
Усе гэтыя гады Аўдзееўку ўтрымлівалі ўкраінскія войскі, якія пабудавалі там магутныя абарончыя ўмацаванні.
Нягледзячы на блізкасць да лініі судакранання бакоў, да самага пачатку поўнамаштабнай вайны горад развіваўся і эканамічна рос.
Расейскае ўварванне ў лютым 2022 года ўсё змяніла. Спыніўся мясцовы завод, большасць жыхароў пакінула горад, ратуючыся ад штодзённых разбуральных бамбардзіровак.
Расейскае войска пераканалася, што пераадолець магутныя абарончыя лініі наскокам не атрымаецца, і перайшла да знішчэння горада авіяцыйнымі ўдарамі і штурмамі пяхоты.
Да цяперашняга моманту ад горада мала што засталося: у выніку інтэнсіўных бамбёжак і баявых дзеянняў амаль усе будынкі ў горадзе або разбураны дашчэнту, або значна пашкоджаны.
Для абодвух бакоў Аўдзееўка мела важнае палітычнае і ваеннае значэнне. Расея спрабавала адсунуць украінскія войскі на бяспечную адлегласць, каб Данецк не трапляў пад абстрэлы артылерыі УСУ.
Для Украіны Аўдзееўка важная як буйны чыгуначны вузел, магутны прамысловы цэнтр, а таксама як пастаянная патэнцыйная пагроза для Данецка.
За некалькі кіламетраў ад яе праходзіць дарога, якая злучае Данецк, Горлаўку і Луганск. Калі б яе ўдалося перарэзаць, гэта значна ўскладніла б лагістыку расейскіх войскаў.
10 кастрычніка расейская армія пачала магутны наступ на Аўдзееўку, спрабуючы выбіць украінскія сілы.
Паводле ацэнак Кіева, у наступленні ўдзельнічалі каля 40 тысяч расейскіх салдат, якія атакавалі з паўднёвага і паўночнага флангу, спрабуючы абысці Аўдзееўку і ўзяць яе ў кола.
Украінскія ўлады заявілі, што расейцы панеслі вялізныя страты — толькі за першы месяц наступу каля 10 тысяч байцоў. Незалежнага пацверджання даных Генштаба УСУ няма, але ў сацсетках ёсць шмат відэазапісаў, на якіх бачна знішчэнне калон расейскай бранятэхнікі каля Аўдзееўкі.
За чатыры месяцы баёў у Аўдзееўкі расейцам удалося прасунуцца на некалькі кіламетраў на поўначы і на поўдні. Яны захапілі вёскі Стэпнае і Бердзічы і наблізіліся да мясцовага коксахімічнага завода — аднаго з важных апорных пунктаў УСУ.
У студзені расейскія войскі здолелі ўвайсці ў горад і завязаць вулічныя баі. Набліжаліся яны і да галоўнай дарогі, па якой ішлі пастаўкі ўкраінскаму гарнізону.
У пачатку лютага сітуацыя стала крытычнай для абаронцаў горада, шэраг аглядальнікаў загаварылі аб пагрозе акружэння. Але Кіеў не даў каманду на адыход з Аўдзееўкі і накіраваў туды на падмацаванне адны з найбольш дасведчаных падраздзяленняў.
Гэта паўтарала сітуацыю з Бахмутам, аб чым перасцерагалі эксперты. Па стане на сярэдзіну лютага бяспечны калідор для выхаду салдат УСУ складаў усяго 4-5 кіламетраў.
Нягледзячы на вялікія страты, Крэмль дасягнуў сваіх мэт на гэтым кірунку. Упала апошняя абарончая лінія УСУ, якая не мянялася з 2014 года.
Наступнай значнай мэтай расейскай арміі можа стаць горад Селідава ў 30 км на захад ад Аўдзееўкі або размешчаны ў 12 км на паўночны захад ад Селідава горад Пакроўск.
Чытайце таксама:
Украінцы паведамілі, што збілі яшчэ адзін расейскі самалёт Су-34
«Таня, мы з табой!» Улады запусцілі флэшмоб у падтрымку жанчыны ў чырвона-зялёным ВІДЭА27
Каментары