Ukrainskija vojski pakinuli Aŭdziejeŭku. Jakoje heta maje značeńnie?
Hałoŭnakamandujučy USU Alaksandr Syrski ŭ noč na subotu paviedamiŭ ab vyvadzie ŭkrainskich sił z Aŭdziejeŭki ŭ Danieckaj vobłaści. Rasijanam udałosia akružyć častku ŭkrainskich vojskaŭ i pierarezać apošniuju vialikuju trasu, pa jakoj ažyćciaŭlałasia zabieśpiačeńnie tych, chto abaraniaŭsia, piša BBC.
«Zychodziačy z apieratyŭnaj abstanoŭki, jakaja skłałasia vakoł Aŭdziejeŭki, kab paźbiehnuć akružeńnia i zachavać žyćcio i zdaroŭje vajskoŭcaŭ, pryniaŭ rašeńnie ab vyvadzie našych padraździaleńniaŭ z horada i pierachodu da abarony na bolš vyhadnych rubiažach», — havorycca ŭ zajavie Syrskaha.
Rasiejskija vojski sprabavali zachapić Aŭdziejeŭku z samaha pačatku poŭnamaštabnaha ŭvarvańnia ŭ lutym 2022 hoda. Maštabny nastup na jaje vioŭsia z vosieni 2023-ha.
Krynicy, blizkija da rasiejskaj ułady, paviedamlali, što z Kramla pastupiła ŭkazańnie luboj canoj zachapić hety horad da sakavickich prezidenckich vybaraŭ, kab prademanstravać pośpiechi Uładzimira Pucina ŭ vajnie suprać Ukrainy napiaredadni jaho pieravybrańnia.
Siły abarony Ukrainy doŭha trymali abaronu, u kancy studzienia ekśpierty zahavaryli ab krytyčnaj situacyi i nieabchodnaści vyvodzić harnizon, adnak hetaha nie adbyłosia.
Aŭdziejeŭka — nievialiki pramysłovy horad pobač z Danieckam, zachoplenym prarasiejskimi sieparatystami pry padtrymcy rasiejskich vojskaŭ amal 10 hadoŭ tamu — viasnoj 2014-ha.
Usie hetyja hady Aŭdziejeŭku ŭtrymlivali ŭkrainskija vojski, jakija pabudavali tam mahutnyja abarončyja ŭmacavańni.
Niahledziačy na blizkaść da linii sudakranańnia bakoŭ, da samaha pačatku poŭnamaštabnaj vajny horad raźvivaŭsia i ekanamična ros.
Rasiejskaje ŭvarvańnie ŭ lutym 2022 hoda ŭsio źmianiła. Spyniŭsia miascovy zavod, bolšaść žycharoŭ pakinuła horad, ratujučysia ad štodzionnych razburalnych bambardzirovak.
Rasiejskaje vojska pierakanałasia, što pieraadoleć mahutnyja abarončyja linii naskokam nie atrymajecca, i pierajšła da źniščeńnia horada avijacyjnymi ŭdarami i šturmami piachoty.
Da ciapierašniaha momantu ad horada mała što zastałosia: u vyniku intensiŭnych bambiožak i bajavych dziejańniaŭ amal usie budynki ŭ horadzie abo razburany daščentu, abo značna paškodžany.
Dla abodvuch bakoŭ Aŭdziejeŭka mieła važnaje palityčnaje i vajennaje značeńnie. Rasieja sprabavała adsunuć ukrainskija vojski na biaśpiečnuju adlehłaść, kab Danieck nie traplaŭ pad abstreły artyleryi USU.
Dla Ukrainy Aŭdziejeŭka važnaja jak bujny čyhunačny vuzieł, mahutny pramysłovy centr, a taksama jak pastajannaja patencyjnaja pahroza dla Daniecka.
Za niekalki kiłamietraŭ ad jaje prachodzić daroha, jakaja złučaje Danieck, Horłaŭku i Łuhansk. Kali b jaje ŭdałosia pierarezać, heta značna ŭskładniła b łahistyku rasiejskich vojskaŭ.
10 kastryčnika rasiejskaja armija pačała mahutny nastup na Aŭdziejeŭku, sprabujučy vybić ukrainskija siły.
Pavodle acenak Kijeva, u nastupleńni ŭdzielničali kala 40 tysiač rasiejskich sałdat, jakija atakavali z paŭdniovaha i paŭnočnaha fłanhu, sprabujučy abyści Aŭdziejeŭku i ŭziać jaje ŭ koła.
Ukrainskija ŭłady zajavili, što rasiejcy panieśli vializnyja straty — tolki za pieršy miesiac nastupu kala 10 tysiač bajcoŭ. Niezaležnaha paćvierdžańnia danych Hienštaba USU niama, ale ŭ sacsietkach jość šmat videazapisaŭ, na jakich bačna źniščeńnie kałon rasiejskaj braniatechniki kala Aŭdziejeŭki.
Za čatyry miesiacy bajoŭ u Aŭdziejeŭki rasiejcam udałosia prasunucca na niekalki kiłamietraŭ na poŭnačy i na poŭdni. Jany zachapili vioski Stepnaje i Bierdzičy i nablizilisia da miascovaha koksachimičnaha zavoda — adnaho z važnych apornych punktaŭ USU.
U studzieni rasiejskija vojski zdoleli ŭvajści ŭ horad i zaviazać vuličnyja bai. Nabližalisia jany i da hałoŭnaj darohi, pa jakoj išli pastaŭki ŭkrainskamu harnizonu.
U pačatku lutaha situacyja stała krytyčnaj dla abaroncaŭ horada, šerah ahladalnikaŭ zahavaryli ab pahrozie akružeńnia. Ale Kijeŭ nie daŭ kamandu na adychod z Aŭdziejeŭki i nakiravaŭ tudy na padmacavańnie adny z najbolš daśviedčanych padraździaleńniaŭ.
Heta paŭtarała situacyju z Bachmutam, ab čym pieraścierahali ekśpierty. Pa stanie na siaredzinu lutaha biaśpiečny kalidor dla vychadu sałdat USU składaŭ usiaho 4-5 kiłamietraŭ.
Niahledziačy na vialikija straty, Kreml dasiahnuŭ svaich met na hetym kirunku. Upała apošniaja abarončaja linija USU, jakaja nie mianiałasia z 2014 hoda.
Nastupnaj značnaj metaj rasiejskaj armii moža stać horad Sielidava ŭ 30 km na zachad ad Aŭdziejeŭki abo raźmieščany ŭ 12 km na paŭnočny zachad ad Sielidava horad Pakroŭsk.
Čytajcie taksama:
Ukraincy paviedamili, što źbili jašče adzin rasiejski samalot Su-34
Kamientary