У шэрагу артыкулаў Крымінальнага кодэкса зʼявіцца пакаранне, не звязанае з пазбаўленнем волі. Прастытуткам будзе палёгка
У шэрагу артыкулаў Крымінальнага кодэкса плануецца ўвесці альтэрнатыўнае пазбаўленню волі пакаранне. Аб гэтым паведаміў старшыня Вярхоўнага Суда Валянцін Сукала па выніках нарады ў Лукашэнкі.
Валянцін Сукала распавёў, што Вярхоўны Суд прааналізаваў санкцыі за менш цяжкія і негвалтоўныя злачынствы і прыйшоў да высновы, што яны маюць патрэбу ў карэкціроўцы — у першую чаргу трэба ўвесці альтэрнатыўныя пазбаўленню волі віды пакарання.
«Калі ў санкцыях артыкула за менш цяжкія і негвалтоўныя злачынствы няма нічога, акрамя пазбаўлення волі, вядома, судам вельмі складана выконваць такія неабходныя прынцыпы назначэння пакарання, як суразмернасць, індывідуальнасць і справядлівасць, — сказаў старшыня ВС. — Каб аблегчыць работу судоў, ВС прапанаваў адкарэкціраваць гэтыя санкцыі, прадугледзець у іх абавязковыя альтэрнатыўныя пазбаўленню волі віды пакарання».
Паводле Сукалы, аналіз паказаў, што ў КК ёсць 35 артыкулаў за менш цяжкія, негвалтоўныя злачынствы, у санкцыях якіх адсутнічаюць альтэрнатыўныя віды пакарання, — толькі пазбаўленне волі.
«Я не лічу, што ў кожнай з іх трэба ўводзіць альтэрнатыўныя санкцыі, там ёсць і складаныя, грамадска небяспечныя злачынствы», — заўважыў Сукала.
На яго думку, альтэрнатыўныя санкцыі могуць быць уведзены па 24 складах злачынстваў з 35.
Напрыклад, адзін з артыкулаў, якіх гэта можа закрануць, — арганізацыя занятку прастытуцыяй або ўцягненне ў занятак прастытуцыяй (арт.171 КК), але толькі ў першай яе частцы, калі адсутнічаюць абцяжарваючыя акалічнасці.
«У адпаведнасці з санкцыямі артыкула назначалася рэальнае пазбаўленне волі, але з улікам абставін суды знаходзілі магчымасць прымяніць адтэрміноўку рэальнага пазбаўлення волі з выпрабавальным тэрмінам. І асуджаныя гэту адтэрміноўку апраўдвалі, як правіла», — адзначыў Валянцін Сукала.
Пры гэтым кіраўнік Вярхоўнага Суда падкрэсліў, што будучыя змяненні крымінальнага заканадаўства ў частцы ўвядзення альтэрнатывы пазбаўленню волі не будуць датычыцца цяжкіх і асабліва цяжкіх злачынстваў.
Каментары
Прастытуткамі не кожны дзень нараджаюцца. Можна вабнай жанчыне паабяцаць добры заробак, для чаго няма аніякіх падстаў. І вось гандляр-кансультант ужо шукае сабе спонсара ў VK.
Уладальніка прыватнай крамы як прыцягнуць за падман з заробкам?