Пры якіх умовах Украіна вызваліць Крым і што з Данецкам? Меркаванне Сахашчыка

Чаму ўкраінцам не ўдалося прарваць фронт падчас контрнаступу

Валер Сахашчык адзначае, што падчас контрнаступу атрымалася прарваць першую лінію абароны. Аднак для таго, каб дасягнуць большых поспехаў, «самага высокага баявога духу і патрыятызму мала».

«Неабходна авіяцыя, артылерыя, боепрыпасы да яе, ракеты. На жаль, ва ўсім гэтым Украіна вельмі абмежаваная. У авіяцыі магчымасці Украіны непараўнальна саступаюць расіянам. Увесь час ёсць дэфіцыт боепрыпасаў для артылерыі. І на агнявыя задачы, на якія пры наступленні прадугледжаны расход боепрыпасаў, напрыклад, 40 снарадаў, даводзіцца траціць чатыры, а часам і менш, — тлумачыць Сахашчык.

— Да таго ж неабходна аддаць даніну ворагу. Расіяне таксама вучацца. Яны далёка не слабакі і не дурні. Яны вельмі ўмела ваююць, стварылі вельмі магутную сістэму абароны з вельмі магутнай сістэмай мініравання, якую вельмі складана пераадолець, — дзеліцца сваім бачаннем палітык. — У комплексе гэта вылілася вось у такі вынік. Разам з тым наступ працягваецца».

Ці зможа Украіна выйсці да Азоўскага мора і вызваліць Крым

Адказваючы на гэта пытанне, Валер Сахашчык прыгадаў, што назіраў баявыя эпізоды з удзелам невялікіх тактычных падраздзяленняў, калі сітуацыя мянялася на працягу некалькіх хвілін:

«Напрыклад, група «начных паляўнічых» зрабіла засаду ў тыле пазіцый расіян і проста знішчыла падраздзяленне, якое ішло па ратацыі, каб змяніць падраздзяленне, якое знаходзілася на пазіцыі. Апошнія не дабеглі да акопаў літаральна 2-3 метры і былі забітыя нашымі снайперамі. Мы назіралі паніку, якая ўзнікла ў расійскага падраздзялення, якое сядзела на гэтай пазіцыі. Яны ўсё кінулі і ўцяклі».

Павялічыць

Другі важны фактар, які моцна ўплывае на ход ваенных дзеянняў, — баявы дух.

«У любой вайне перамога вызначаецца станам духу тых мас, якія на полі бою праліваюць сваю кроў, — цытуе Сахашчык Леніна і тлумачыць:

— Станам духу ўкраінцы непараўнальна вышэйшыя. Я сам асабіста не адзін раз бачыў вельмі нізкі стан баявога духу расійскіх падраздзяленняў. Я сам бачыў, як расійскае падраздзяленне захапіла нейкі аб'ект. Скажам так, шахту. І частка людзей засталася цэлаю і схавалася ў бетонных збудаваннях, а частка людзей засталася забітымі і параненымі на прасторы перад імі, якая прастрэльваецца.

Адлегласць паміж імі — 10 метраў. Да чалавека, які цяжка паранены, сам сабе дапамагчы не можа, крычыць, просіць аб дапамозе. За 10 метраў знаходзяцца яго пабрацімы. І яны не дапамагаюць яму.

Я думаў, што цяпер дзень і хіба што яны ноччу прыйдуць і эвакуююць яго. Ранкам з дронаў мы пабачылі памерлых хлопцаў. Бачылі і тых, хто спрабуе рухацца і поўзаць. Іх так ніхто і не эвакуяваў. Аб чым гэта гаворыць? Аб тым, што людзі проста знаходзяцца ў паніцы. Што стан духу вельмі нізкі. Што яны думаюць толькі пра сябе і ні пра што болей. Як выжыць самому. І ў прынцыпе, гэты стан можна ахарактарызаваць як страту чалавечага аблічча.

Таму я лічу, што можа быць адна паспяховая аперацыя ўкраінскай арміі, якая можа проста абрынуць фронт і прымусіць усё сыпацца. Я дапускаю такі варыянт, што ў гэтым годзе Украіна выйдзе да Азоўскага мора. Але для гэтага павінна нешта падобнае адбыцца».

Чаму немагчыма вызваліць Данецк

«Менавіта на Данецкім напрамку нават пэўная тэхнічная перавага ёсць у расіян. Асабліва па колькасці бранятэхнікі. Па колькасці артылерыі, боепрыпасаў для яе, патронаў, — тлумачыць Сахашчык сітуацыю з Данецкам.

— Мы там ваюем у складаных умовах. Я разумею, што ўкраінцы сканцэнтравалі свае намаганні на іншых участках фронту. Наша задача іншая — сцягнуць на сябе максімальную колькасць ворага. І мы гэтую задачу выконваем. Але наступаць і вызваляць Данецк нам у гэтай сітуацыі не ўяўляецца магчымым на сёння».

Валерый Сахашчык адзначыў, што сам ён імкнуўся б такія гарады, як Данецк, абыходзіць і ствараць умовы, пры якіх праціўнік пакіне іх сам, каб пазбегнуць акружэння.

«Таму што баі дзеля вызвалення буйнога горада — гэта вялізныя ахвяры сярод цывільнага насельніцтва, вялізныя разбурэнні інфраструктуры. Паўтараць тое, што зрабілі расіяне ў Марыупалі, мне здаецца, Украіна не будзе», — тлумачыць Сахашчык.

Глядзіце цалкам:

• 38
• 0
• 1
• 2
• 0
• 10
• 10
• 0