Спорт33

Сціплы геній з іспанскай вёскі. Хто такі Карлас Алькарас — малады пераможца Уімблдана

20-гадовы Карлас Алькарас — новы трыумфатар Уімблдана і наймаладзейшая першая ракетка свету. На шляху да трафея іспанец вынес самога Новака Джокавіча з яго пераможнай серыяй, ды заадно стаў наймаладзейшым тэнісістам, які ўзяў і Уімблдан, і іншы знакавы турнір — US Open. Што ж гэта за новы талент?

Алькарас на корце Уімблдана. Фота: AP Photo / Kirsty Wigglesworth

Пра Алькараса ўпершыню загаварылі яшчэ летась. Тады 19-гадовы хлопец узяў кубак прэстыжнага турніру US Open, выбіўшы ў фінале нарвежца Каспера Руўда, і ўварваўся на першы радок у сусветным тэнісным рэйтынгу. На пачатку 2023-га Карлас прапусціў Australian Open праз траўму нагі, і Джокавіч зноў вярнуўся на першае месца ў свеце, але цяпер іспанскі вундэркінд зноў у лідарах.

Алькарас родам з Мурсіі — гэта рэгіён на паўднёвым усходзе Іспаніі. Хлопца назвалі ў гонар бацькі.

Карлас Алькарас-старэйшы таксама быў тэнісістам і нават выйграў на пачатку 90-х чэмпіянат Іспаніі сярод 15-гадовых спартоўцаў. Але падвялі абставіны: каб развівацца далей, хлопцу трэба было пераязджаць у тэнісную акадэмію Луіса Бругеры ў прадмесці Барселоны. Навучанне ў акадэміі каштавала 40 тысяч песет (каля 250 еўра) на месяц, і бацькі Карласа-старэйшага не мелі такіх грошай. Таму ён застаўся ў роднай вёсцы Эль-Пальмар і там развіваў тэніс.

Будучы пераможца Уімблдана родам са шматдзетнай сям’і — у яго трое братоў, кожны з іх таксама ў нейкай ступені цікавіцца тэнісам. Калі хлопчыку было тры гады, бацька падарыў яму тэнісную ракетку. Як кажа Алькарас, «я нарадзіўся з тэнісам у крыві».

Але не тэнісам адзіным — у дзяцінстве Карлас гуляў у міні-футбол. Любоў да мяча ён захаваў дагэтуль, хлопец падтрымлівае футбольны клуб «Рэал Мадрыд». Ён таксама прызнаецца ў любові да шахмат: «Неабходнасць канцэнтравацца, гуляць супраць кагосьці іншага, стратэгія — неабходнасць думаць загадзя. Думаю, усё гэта дужа падобнае да тэніснага корта».

Да 12 гадоў Карлас выйграў усе дзіцячыя турніры ў роднай правінцыі, у той жа час у падлетка з’явіўся свой агент. У 15 ён паступіў у тэнісную акадэмію Equelite і пачаў працаваць з трэнерам Хуанам Карласам Ферэра — былой першай ракеткай свету і пераможцам «Ралан Гароса».

Неўзабаве хлопец атрымаў статус прафесіянала і стаў падбірацца да вялікшых турніраў. Статус чэмпіёна Еўропы па тэнісе, дэбют у асноўнай сетцы ATP (Асацыяцыя тэнісістаў-прафесіяналаў) і месца ў топ-250 рэйтынгу ATP, траплянне ў асноўную сетку Australian Open і першы тытул ATP — усё гэта прымусіла тэнісных экспертаў гаварыць пра Алькараса як пра новую зорку. А вось шырокую вядомасць ён атрымаў пасля US Open — 2021, дзе дайшоў да чвэрцьфіналу і сышоў з дыстанцыі толькі праз траўму.

У 2022-м пайшлі перамогі на буйных турнірах. Спачатку адзначым Miami Masters, а потым Madrid Open, дзе юны іспанец паслядоўна абыграў топ-тры сусветнага рэйтынгу на той час: свайго куміра Рафаэля Надаля, Новака Джокавіча і Аляксандра Зверава. А потым быў чарговы US Open, пасля якога Карлас узляцеў на вяршыню сусветнага рэйтынгу. Ён увогуле дужа хутка яго скарыў: на канец 2019-га іспанец займаў 492-е месца ў рэйтынгу, праз год — 141-е, на канец 2021-га — 32-е і яшчэ праз год — першае. Здаецца, мала хто сумняваецца, што трыумфальны шлях Карласа на гэтым не скончаны.

Што ўнікальнага ў яго гульні? Карлас спалучае ў сябе смеласць на корце, здольнасць да ўдараў рознай дальнасці, гібкасць у тактыцы, стыль, моц і арыгінальнасць. Ён можа скакаць на корце, нібы на батуце, у яго цудоўная другая падача, дый проста ён гуляе так, што за гэтым цікава назіраць.

Зорныя супернікі Алькараса адгукаюцца пра яго вельмі камплементарна. Той жа Джокавіч, якога іспанскі геній скарыў на такім важным для яго «Уімблдане», адгукаўся пра маладзёна так: «Я ніколі не гуляў з такім гульцом, як ён. у Роджэра [Федэрэра] і Рафы [Надаля] ёсць свае моцныя і слабыя бакі. Карлас — дужа цэльны гулец. У ім ёсць найлепшыя элементы ад мяне, Рафы і Роджэра». А Надаль, дзіцячы кумір Алькараса, увогуле казаў, што хлопца «не спыніць»: «Ён мае ўсе складнікі для файнай кар'еры. Ён мае жаданне. Ён дастаткова сціплы, каб цяжка працаваць. Ён добры хлопец».

Першы коўч тэнісіста Хуан Карлас Ферэр асцярожнейшы ў ацэнках падапечнага: «Думаю, Карлас мае якасці, што даюць яму надта добрыя магчымасці быць адным з найлепшых у гісторыі. Гэта ясна для мяне. Але відавочна, што шмат чаго можа здарыцца. Ён малады. Ёсць шмат рэчаў, якія ён не бачыць. Мы ўсе ведаем, якія існуюць рызыкі: вечарыны, адцягванне ўвагі, адсутнасць канцэнтрацыі на тэнісе. Калі ты можаш сустракацца з багатымі і знакамітымі, лёгка страціць арыентацыю».

Малады іспанец расказваў, што працаваў з псіхолагам, і што гэта яму моцна дапамагло. Ён згадвае, як у веку 15-16 гадоў не быў здольны стрымліваць эмоцыі на корце: напрыклад, кідаў ракетку ці нават ламаў яе. Цяпер хлопец прызнаецца, што для яго важна прыходзіць на корт з усмешкай і шчаслівым, а яшчэ не паддавацца ціску і захоўваць расслаблены стан, атрымліваць задавальненне ад гульні.

Таленавіты юнак — не заўсёднік свецкай хронікі. Ён не трапляе ў скандалы, і дакладна невядома, што адбываецца ў яго асабістым жыцці. У лютым 2023-га Карлас упэўніваў, што ўжо 18 месяцаў ён адзіны: «Цяжка знайсці чалавека, які можа падзяляць з табой жыццё, калі вы заўсёды ў розных частках свету». У вольны час, акрамя спорту, маладзён вучыць англійскую мову і глядзіць фільмы, асабліва адзначае творы ў жанры саспенс і матывацыйныя стужкі — напрыклад, яго матывуе Сільвестр Сталонэ ў ролі Рокі.

Хлопец не абыходзіцца без капрызаў — ён збірае красоўкі ад Nike. Гэтая фірма дае Алькарасу экіпіроўку, так што, здаецца, праблем з красоўкамі быць не павінна. Аднак іспанец збірае вінтажныя найкі, тыя, што і каштуюць нямала, і якія няпроста знайсці. Станам на люты калекцыя тэнісіста складалася прыкладна з 20 пар.

Сам Карлас рэзюміруе свой шлях проста: «Я заўсёды быў таленавітым хлопцам. Але я і заўсёды цяжка працаваў. Бо калі ты таленавіты і не робіш намаганняў, ты нікуды не прыйдзеш». Цяпер ён мусіць не спыніцца на здабытых перамогах і падтрымліваць узровень далей, бо не так складана стаць нумарам адзін, як захоўваць лідарства. Працягваць імкнуцца да перамогі — вось што Алькарас лічыць дужа няпростым. 

Што ён плануе з гэтым рабіць? «Збіраюся працягнуць жадаць спраўджвання маёй мары, нават калі я яе ўжо спраўдзіў».

«Наша Нiва» — бастыён беларушчыны

ПАДТРЫМАЦЬ

Неймаверны ўдар у падзенні на Уімблдане расійскага тэнісіста ВІДЭА

У папулярным амерыканскім серыяле і новым «Аватары» сыграла дачка беларускай тэнісісткі

Як 21-гадовая полька з маленькага гарадка ўзляцела на вяршыню сусветнага тэніса — гісторыя новай першай ракеткі

Каментары3

  • Вольга
    17.07.2023
    Вось за такіх сціплых і прыемна заўзець, а не тое што розныя там Недасекавы ды Сабаленкі - такія хай гуляюць на кубку крамля ды раждзенствянскім турніры імя самі знаеце каго.
  • Угу
    17.07.2023
    Дагаварняк...
  • Што вам зрабіла Сабаленка?
    18.07.2023
    Вольга, трэба заўзець за сваіх, за беларусаў. Калі ня будзе сваіх спартоўцаў, то вам з Расеі ці Кітая прышлюць. Такога жадаеце? Сабаленка - другая ракетка Сьвету! Праслаўляе Беларусь, беларускі народ. Адное дрэнна, што на Уімбілдоне зазналася, што яна лепшая, як, дарэчы, і Джокавіч. І оба злілі!
    Ваша нянавісць к Сабаленке ды іншым нічога добрага для народа не нясе. Гэта тое самае як бесэнсоўныя санкцыі, ад якіх пакутвае ў першую чаргу народ (гэта Зянон сказаў).

Сілавікі просяць у беларусаў за мяжой паведаміць свой адрас ці выслаць дамову арэнды. Што вядома?19

Сілавікі просяць у беларусаў за мяжой паведаміць свой адрас ці выслаць дамову арэнды. Што вядома?

Усе навіны →
Усе навіны

Церцель заявіў, што Украіна адвяла войскі ад беларускай мяжы яшчэ 3—4 ліпеня1

«Ау! Куды вы зніклі?» Як мінчанка перайграла кватэрных аферыстаў

Без электрычнасці застаецца 851 населены пункт Гомельскай вобласці. У Мазыры няма святла, вады, не працуюць прадпрыемствы

Яшчэ адна ахвяра непагадзі: у Магілёўскім раёне загінула 5-гадовая дзяўчынка

На беларуска-літоўскай мяжы упершыню за доўгі час з'явілася чарга з аўтобусаў1

Рыжанкоў: Беларусь гатова да дыялогу з Польшчай па сітуацыі на мяжы20

У залатой буцы на Еўра-2024 адразу некалькі ўладальнікаў

Як адрозніваюцца ўмовы працы для ІП у Беларусі і Літве? 1

Анёл Смерці. Гісторыя беларускі, якая паведамляе родным загінулых каліноўцаў пра іх гібель3

больш чытаных навін
больш лайканых навін

Сілавікі просяць у беларусаў за мяжой паведаміць свой адрас ці выслаць дамову арэнды. Што вядома?19

Сілавікі просяць у беларусаў за мяжой паведаміць свой адрас ці выслаць дамову арэнды. Што вядома?

Галоўнае
Усе навіны →