Чарговая ганьба беларускага футбола. «Іслач» вылецела з еўракубкаў, прайграўшы камандзе з Сан-Марына
Беларуская каманда саступіла «Ля-Фіярыце» ў серыі пенальці ў першым раўндзе кваліфікацыі Лігі канферэнцый.
![](http://d3kcf2pe5t7rrb.cloudfront.net/img/w840d4webp1/photos/z_2024_07/san240718-rnplu.jpg.webp)
Тыдзень таму ў Сан-Марына беларускі клуб перамог з лікам 1:0. Праўда, у аўторак не змог вылецець у Венгрыю, дзе праводзіць хатнія паядынкі. Але «Іслач» прыехала ў Венгрыю а 6-й раніцы ў сераду, таму час на аднаўленне быў.
Сённяшні матч ішоў да нулявой нічыі, але пры канцы другога тайма сан-марынцы забілі і перавялі яго ў авертайм.
Дадатковы час галоў не прынёс, а ў серыі пенальці «Ля-Фіярыта» выйграла 4:2, прычым іх галкіпер адбіў два ўдары беларусаў, а самі сан-марынцы раз трапілі ў штангу.
«Іслач» следам за лідарам чэмпіянату Беларусі «Тарпеда-БелАЗам» вылятае з еўракубкаў ужо на першай стадыі.
«Ля-Фіярыта» — шасціразовы чэмпіён Сан-Марына па футболе, але каманда ніколі не праходзіла ў другую стадыю еўракубкаў. У каманды да сёння былі 22 паразы і тры нічыі. Але беларусы ўмеюць рабіць цуды.
Сёння ФІФА апублікавала свежы рэйтынг футбольных зборных. Зборная Сан-Марына там займае апошні 210-ы радок, у рэйтынгу еўрапейскіх чэмпіянатаў яны таксама апошнія.
У кваліфікацыі еўракубкаў у Беларусі засталіся два прадстаўнікі.
На наступным тыдні з другога раўнду кваліфікацыі Лігі канферэнцый уступае гродзенскі «Нёман». Яго супернікам будзе румынскі «Клуж».
Прайшло першую стадыю кваліфікацыі Лігі чэмпіёнаў мінскае «Дынама».
У другім раўндзе яго супернікам будзе балгарскі «Лудагорац», але нават калі «Дынама» прайграе, яно будзе мець другі шанец у кваліфікацыі Лігі Еўропы, а потым плэй-оф Лігі канферэнцый.
Каментары
Смачна есьці, панове!