Жыхары Кукшавіч высмеялі прадпрымальніка, які напісаў зварот Лукашэнку пра дарогу. Прадпрымальнік: «Землякі зайздросныя»
Прадпрымальнік з Дзяржынскага раёна Яўген Чуеўскі — прыхільнік Лукашэнкі. Ён перакананы, што ўсе яго землякі падтрымліваюць дзейную ўладу, а таму ім абавязаныя адрамантаваць вясковую дарогу. Вяскоўцы ж кажуць, што дарогу разбілі грузавікі, якія рамантуе прадпрымальнік у сваёй майстэрні. Што да «падтрымкі Лукашэнкі», то «знаем мы, хто яго падтрымлівае», іранізуюць яны.
Яўген Чуеўскі ў вёсцы Кукшэвічы мае майстэрню тэхнічнага абслугоўвання грузавых аўтамабіляў. У паселішчы, якое за 3 кіламетры ад Дзяржынска і за 35 ад Мінска, у 2022 годзе было прапісана 138 чалавек, піша праект «1906».
Відэазварот да Лукашэнкі бізнэсовец называе «клічам душы» і паказвае ў ім разбітую вясковую дарогу. Да вёскі не можа даехаць школьны аўтобус, каб забраць дзяцей, і яны выходзяць на шашу брудныя, сцвярджаў ён. Таксама на дарозе ламаюцца машыны, даводзіць прадпрымальнік.
Чуеўскі заяўляе, што ўсе жыхары вёскі галасавалі ў 2020 годзе за Лукашэнку і нават малыя дзеці «трымалі за яго кулачкі».
«Аляксандр Рыгоравіч, калі ласка, разбярыцеся, дапамажыце нам. Надышоў час, калі вы нам павінны дапамагчы. Спадзяюся, што вы нас пачуеце, бо тут проста страшна», — просіць прадпрымальнік.
Зварот Чуеўскага ў інтэрнэце прабыў нядоўга і неўзабаве па апублікаванні быў выдалены аўтарам.
«На тое былі прычыны», — сказаў ён праекту «1906».
Па яго словах, эфект ад звароту ёсць, бо дарогу рамантавалі.
«Цяпер яна падсыпаная і больш-менш усіх задавальняе. Луж няма і ўсё добра. Будзе надвор'е — утрамбуем. Гэта ж не аўтабан з падагрэвам, але і мы не шэйхі. У нас жа тут няма свідравін нафтавых», — кажа прадпрымальнік.
Чуеўскі лічыць, што «ўлада адрэагавала, бо «зверху» таксама людзі і іх трэба прасіць па-добраму, па-людску».
«А калі здзекліва, з прэтэнзіямі, пальцы гнуць, то, вядома, яны адрэагуюць інакш. Калі ў вас будуць пытанні, то звяртайцеся, я вас навучу», — раіць прадпрымальнік.
Прадпрымальнік расказвае, што раней працаваў за наяўны разлік, а потым легалізаваўся, атрымаў дзяржаўную субсідыю на падтрымку прадпрымальніцтва, якую называе «прэзідэнцкай дапамогай для развіцця малога і сярэдняга бізнэсу». На яе купіў неабходнае абсталяванне і цяпер мае падтрымку дзяржаўных арганізацый.
«Сёння ў нас паспяховае прадпрыемства. Пабудавалі сваіх 220 квадратаў памяшкання. Здалі яго ў эксплуатацыю. Зацвердзіла яго санстанцыя, экалогія, працуюць людзі, у нас паспяховыя кліенты, перавозчыкі…» — хваліцца Чуеўскі.
Землякі ж прадпрымальніка сказалі, што дарогу разбілі машыны, якія прыязджаюць да Чуеўскага рамантавацца.
«На станцыю прыязджаюць машыны, і вялікія, таму, мабыць, трэба ў яго спытаць, чаму дарога такая ў вёсцы? І гэты кліч да Лукашэнкі не больш, чым спроба падмазаць для бізнэсу халяўны асфальцік. Ніякія там аўтобусы школьныя ні пры чым, толькі скурны інтарэс», — мяркуюць вяскоўцы.
Сам Чуеўскі такія закіды тлумачыць людской зайздрасцю. Паводле прадпрымальніка, гэтак жа ставяцца да Лукашэнкі нязгодныя з яго палітыкай.
«На яго нясуць усялякія дурасці і гэтак жа на тых, хто за яго заступаецца і падтрымлівае. І хто ў яго верыць. У мяне нават на каналізацыю ёсць праект, зацверджаны ў экалогіі. Вось, уявіце, наколькі ў мяне ўсё легалізавана, усё празрыста і прыгожа. Прыязджайце, вам дакументы пакажу. Мне няма чаго баяцца», — даводзіць ён.
На пытанне, адкуль яму вядома, што ўсе ў вёсцы прагаласавалі за Лукашэнку, адказвае, што вяскоўцы адно аднаму ўсё расказваюць.
«Гэта не так, як у горадзе, дзе ўсе злыя. А ў нас усе дружныя і спакойныя. Праходзіць свята вёскі. На яго ўсе збіраюцца, гавораць, пытанні ўздымаюць. Раз на год збіраемся і адно аднаму ўсё расказваем», — тлумачыць ён.
Пытанне пра галасаванне Чуеўскаму не спадабалася, і ён заявіў, што далей яго інфармацыя будзе платнай.
«Калі вы гатовыя са мною гаварыць, то трэба пералічыць на наш рахунак крыху грошай, і я адкажу на наступныя вашы пытанні», — удакладніў ён і назваў суму такой здзелкі ў «1 мільён даляраў»…
У той жа час некалькі жыхароў Кукшавіч сказалі нам, што ў паселішчы Лукашэнку падтрымлівае мала хто.
«Усе за Лукашэнку? Знаем мы, хто за Лукашэнку», — сказаў нам адзін мужчына. «Вы і самі знаеце хто», — адказаў ён на просьбу ўдакладніць сваю думку.
«У Кукшавічах ёсць людзі, якіх затрымлівалі за ўдзел у пратэстах, якія пацярпелі. Камусьці выехаць прыйшлося нават», — расказала іншая жанчына.
«Наша Нiва» — бастыён беларушчыны
ПАДТРЫМАЦЬ«Тут проста страшна». Жыхар вёскі пад Мінскам у звароце да Лукашэнкі распавёў, што ўся вёска за яго галасавала, хоць яны і патанаюць у гразі
Пачула заклік уладаў і паехала падымаць малую радзіму. Цяпер звяртаецца да Лукашэнкі, бо да астатніх ужо звярталася
«Для нас, старых, гэта адзіная забаўка». Як аўталаўка аб'язджае маленькія вёскі
На сустрэчы Снапкова з бізнэсам адзін з запрошаных заклікаў зняць відэазварот «Надо!» Як адрэагавалі астатнія?12
Каментары
агурковым альшанскім пратэстантам прывет