«Проста атрымалася нейкая накладка». Лукашэнка сустракаецца з групай замежных журналістаў
Гэтая сустрэча раней не анансавалася.
«Шчыра і сумленна — незапланаваная сустрэча. Прэс-сакратарка мне далажыла, што ў нас такая магутная «армія», асабліва замежных журналістаў (расіян я не прылічваю да гэтай колькасці). Я падумаў, што будзе, напэўна, негасцінна з беларускага пункту гледжання, калі мы хаця б на некалькі хвілін з вамі не перасячомся», — сказаў Аляксандр Лукашэнка.
Раней планавалася, што 14 лютага адбудзецца «Вялікая размова з прэзідэнтам» — зрэжысіраванае тэлешоу, на якое запрашаюць і журналістаў, але пасля яно з нейкіх прычын было адмененае. У той жа час стала вядома, што 17 лютага, у пятніцу, Аляксандр Лукашэнка чарговы раз сустракаецца з Пуціным.
Сустрэча з журналістамі 16 лютага папярэдне не анансавалася.
На сустрэчу з Лукашэнкам, акрамя беларускіх журналістаў, прыбылі прадстаўнікі СМІ Аўстрыі, Азербайджана, Вялікабрытаніі, Катара, Расіі, Саудаўскай Аравіі, ЗША, Францыі, Японіі і міждзяржаўнай тэлерадыёкампаніі «Мір».
«Паглядзеўшы на склад сённяшняй нашай сустрэчы, я бачу тут даўніх сваіх знаёмых», — сказаў Аляксандр Лукашэнка.
БелТА ў сваім паведамленні асобна акцэнтуе ўвагу на прысутнасці журналіста Бі-Бі-Сі Стывена Розэнберга, які ў лістападзе 2021 года ўзяў вострае інтэрв'ю ў Аляксандра Лукашэнкі.
«Думаю, што ў дынаміцы паглядзець на тыя праблемы, якія іх хвалявалі і якія яны так настойліва спрабавалі мне паставіць у віну, — гэта яшчэ адна такая цікавая фішка сённяшняй сустрэчы», — адзначыў Лукашэнка.
Аляксандр Лукашэнка таксама звярнуў увагу на тое, што сённяшняя сустрэча з журналістамі не адмяняе правядзенне анансаванай раней «Вялікай размовы».
«Проста атрымалася нейкая накладка. У нас літаральна праз некалькі тыдняў адбудзецца Пасланне народу і парламенту. Два мерапрыемствы, адно за адным, будуць некаторыя паўтарэнні, — растлумачыў ён. — Мы рыхтуем пасланне абсалютна адкрыта, будзе рэакцыя на ўсе пытанні, і трошкі наперад мы пастараемся зазірнуць у рамках гэтага паслання».
Тэлевізійшчыкі паказалі жахлівую яўку на ўчастку, дзе галасаваў Лукашэнка19
Каментары