Лукашэнка абвясціў 2023-ці «годам міру і стварэння» і заклікаў шанаваць людзей у пагонах
«Калі мы хочам жыць у міры і бяспецы, то перш за ўсё павінны паважаць і шанаваць працу людзей у пагонах», — сказаў Аляксандр Лукашэнка ў навагоднім тэлезвароце.
«Наступны год мы аб'яўляем Годам міру і стварэння. Гэта адпавядае і духу часу, і памкненням нашых сэрцаў», — абвясціў ён.
Нагадаем, што 2021 год быў абвешчаны Годам народнага адзінства, але менавіта ў той год былі разгорнутыя масавыя рэпрэсіі. 2022 год быў абвешчаны Годам гістарычнай памяці, але ў гэтым годзе дайшло да забароны сфармуляванага Янкам Купалам дэвіза «Жыве Беларусь!».
Зварот Аляксандра Лукашэнкі транслявалі ўсе лукашэнкаўскія тэлеканалы і СМІ.
Зварот быў па-руску. Ëн быў запісаны на фоне вялізнага пустога Палаца Незалежнасці.
Вось яго тэкст.
«Дарагія суайчыннікі!
Госці Беларусі!
Вось і настала навагодняя ноч, самая доўгачаканая і самая скарацечная ў годзе.
Дома, у асяроддзі сяброў, на працоўным месцы або ў дарозе ўсе мы цяпер глядзім на гадзіннік і бачым, як імкліва ляцяць і адыходзяць у гісторыю хвіліны, набліжаючы нас да новага 2023 года.
І праз імгненне ўжо адыходзячы год — Год гістарычнай памяці — таксама стане часткай мінулага, а яго падзеі запоўняць чарговую главу летапісу жыцця беларускага народа.
Многія задаюцца пытаннем, якім адыходзячы год застанецца ў нашай памяці.
Няпростым, супярэчлівым, часам напружаным. Але галоўнае — для нас ён быў мірным.
Мы, магчыма, нават у большай ступені, чым раней, адчулі пагрозу спакойнаму і бяспечнаму жыццю, да якога прывыклі.
Мацней сталі непакоіцца за сваіх дзяцей, родных, блізкіх і нават задумаліся пра будучыню чалавецтва. Вастрэй усвядомілі каштоўнасць міру на роднай зямлі, які стаў для нас галоўным дасягненнем года.
Адыходзячы 2022-і стаў годам палітычнага выбару.
Беларусы адказалі адзінствам дзеля абароны сваёй гістарычнай памяці, сваіх прынцыпаў і традыцый. Кожны, хто душой балее за лёс роднай краіны, узяў удзел у абмеркаванні новай Канстытуцыі, вызначыўшы будучыню Беларусі.
І, вядома, 2022-і ўвайшоў у гісторыю як год плённай працы.
Мы сабралі рэкордны ўраджай хлеба — больш за тону на жыхара краіны. Забяспечылі сябе ўдосталь прадуктамі і накармілі мільёны жыхароў планеты, атрымаўшы за экспарт прадуктаў харчавання больш за 20 мільярдаў рублёў.
Пабудавалі новыя паліклінікі, бальніцы, школы, дзіцячыя сады, масты і дарогі — больш за 50 маштабных аб'ектаў.
Умацавалі энергетычную бяспеку. Беларусам не давядзецца аддаваць апошні рубель за святло і цяпло, якія становяцца раскошай для нашых суседзяў.
Мы захавалі працоўныя месцы і сацыяльную накіраванасць эканомікі — дапамогу атрымалі ўсе, хто мае патрэбу.
Амаль 50 тысяч беларускіх сем'яў сустракаюць Новы год у новых кватэрах.
Вядома, не ўсё, што задумалі, паспелі зрабіць, але працавалі шмат і плённа.
Дзякуй усім вам за гэты год!
Усім, хто выхоўвае нашых дзяцей, вучыць школьнікаў і студэнтаў, лечыць нас і дапамагае адзінокім людзям.
Дзякую рабочым і сялянам, брыгадзірам і майстрам, кіраўнікам прадпрыемстваў — усім, хто робіць жыццё больш камфортным, развіваючы сферу паслуг, дабаўляе яму яркія фарбы, рэалізуючы творчыя праекты, і ажыццяўляе бяспеку, цвёрда абараняючы граніцы і парадак у нашым агульным доме — Беларусі.
Ганаруся вамі — сапраўднымі гаспадарамі святой беларускай зямлі!
Дарагія беларусы!
Пагадзіцеся, нягледзячы на выпрабаванні адыходзячага года, з намі адбылося шмат добрага.
Мы стваралі новыя тавары і выходзілі на новыя рынкі ў той час, калі нас душылі санкцыямі.
Нам закрывалі граніцы, а мы нанава адкрылі для сябе нашу Беларусь. Многія паглядзелі на сваю краіну па-новаму, усвядомілі тыя багацці, якімі валодаем: прыгажосць прыроды, таямніцу гістарычнага мінулага, скарбы нацыянальнай культуры і традыцый. Больш даведаліся аб роднай зямлі і больш пранікліся гонарам за родны край.
Мы адказалі даверам і дружбай усім, хто адгароджваецца ад нас платамі. Сотні тысяч грамадзян Еўрасаюза прыехалі ў Беларусь без віз і перашкод.
Мы далі прытулак бежанцам з гарачых пунктаў, далі дах над галавой і працу. Прынялі ў сваю сям'ю новых грамадзян.
Звыш 7 тысяч іншаземцаў з 31 краіны ўжо сёння працуюць на карысць і працвітанне сваёй новай Радзімы. Большасць з іх — украінцы.
Беларусь была і застанецца гасціннай і дружалюбнай краінай. Краінай, адкрытай для ўсіх, хто сэрцам прыме нашы каштоўнасці і традыцыі, шчыра палюбіць яе і захоча назваць сябе беларусам.
Дарагія суайчыннікі!
У гэтым годзе мы ўбачылі, які цесны наш неабсяжны свет. Дастаткова распаліць канфлікт у адной краіне, як пачынае ліхаманіць усю планету.
Ведаю, больш за ўсё вы хочаце пачуць, што будзе далей. Ці застанецца Беларусь астраўком бяспекі? Упэўнены, што гэта пытанне стане і галоўным жаданнем, якое вы загадаеце апоўначы.
Адказ просты: усё ў нашым жыцці будзе залежаць ад кожнага з нас. І ад усіх нас разам.
Калі мы хочам жыць у міры і бяспецы, то перш за ўсё павінны паважаць і шанаваць працу людзей у пагонах, выхоўваць дзяцей патрыётамі сваёй краіны і выконваць закон.
Калі мы хочам жыць у міры і дастатку, то павінны шмат і добрасумленна працаваць.
Калі мы хочам жыць у свабоднай і незалежнай дзяржаве, то павінны берагчы і абараняць гістарычную памяць, духоўныя каштоўнасці і спрадвечныя традыцыі.
Наступны год мы аб'яўляем Годам міру і стварэння. Гэта адпавядае і духу часу, і памкненням нашых сэрцаў.
Я гэтак жа моцна, як і вы, жадаю міру і дабра роднай Беларусі.
Моцнага здароўя і дзіцячага смеху — кожнай сям'і.
Сяброўскага клопату і душэўнай цеплыні — кожнаму, хто адзінокі.
Сямейнага ладу і дабрабыту — у кожны дом.
Няхай нашы пажаданні здзейсняцца!
Будзьце шчаслівыя, беражыце сябе і сваіх блізкіх!
З Новым годам, дарагія беларусы!»
Лукашэнка хоча, каб кіраўнікі райвыканкамаў прызначалі і дырэктараў прыватных структур26
Каментары
А мы й паважаем. Працу людзей з пагонамі ЗСУ і шэўронамі палку Каліноўскага. І вельмі шануем.
Беларусам і ўкраінцам жадаю волі і міра.
А акупацыйнай кодле хочу ад усяго майго шчырага сэрца пажадаць у новым годзе таго што яны заслужылі. А чаго - яны й самі добра ведаюць.