Жыхары вуліцы Мірашнічэнкі самі аднавілі памятную шыльду герою Вялікай Айчыннай вайны
Жыхары вуліцы дамоў 47—49 па вуліцы Мірашнічэнкі адзначылі дзень нараджэння героя Савецкага Саюза, у гонар якога названая іх вуліца. Свята такога маштабу на гэтай дваровай тэрыторыі праводзілася ўпершыню, на футбольны стадыён паміж дамамі былі запрошаныя і жыхары суседніх двароў.
Далучыліся да свята і музыкі — на стадыён завітаў гурт Laudans. Музыкі выступілі з гадзінным жывым канцэртам, шмат размаўлялі з публікай.
«Зараз канцэрты ладзяцца амаль ва ўсіх мінскіх дварах, у нас жа ён адбыўся ўпершыню. Даведаўшыся, што ў гэтую суботу дзень нараджэння героя вайны, у гонар якога названая нашая вуліца, мы вырашылі адзначыць гэтую дату — людзі, якія да сённяшняга дня не ведалі нават імёнаў адно аднаго, літаральна за тыдзень самі ўсё арганізавалі і зладзілі сапраўднае свята», — распавялі мясцовыя жыхары.
Пасля канцэрту гараджане праслухалі лекцыю пра подзвіг Пятра Мірашнічэнкі — ва ўзросце 22 гадоў ён закрыў сабой амбразуру варожага ДЗВК, — а кульмінацыяй вечара стала ўрачыстае адкрыццё новай шыльды з яго імем, хвіліна маўчання і ўскладанне кветак да новага мемарыяла.
«Шыльда пра тое, у гонар каго і чаму названая вуліца, ёсць амаль усюды. І ў нас такая была на адным з дамоў, але падчас работ добраўпарадкавання раёна яе знялі і не вярнулі назад, лёс яе не вядомы. Мы вырашылі аднавіць народную памяць пра героя вайны», — распавялі жыхары вуліцы Мірашнічэнкі.
Пётр Афанасьевіч Мірашнічэнка (1922—1944) — удзельнік Вялікай Айчыннай вайны, камандзір узвода пешай разведкі 717-га стралковага палка 170-й стралковай дывізіі 48-й арміі 1-га Беларускага фронту, лейтэнант. Герой Савецкага Саюза (1944).
Нарадзіўся 10 кастрычніка 1922 года ў вёсцы Заполле (цяпер ў Жытомірскай вобласці) у сям'і селяніна.
У ноч на 1 студзеня 1944 года стралковы полк атрымаў загад выбіць фашыстаў з займаных пазіцый і вызваліць сяло Печышча Гомельскай вобласці, якое было адным з важных апорных пунктаў праціўніка. Подступы да яго прыкрываліся некалькімі ДЗВК. Лейтэнант Мірашнічэнка атрымаў баявое заданне — сваім узводам блакаваць два варожыя ДЗВК і пасля іх знішчэння заняць частку населенага пункта.
Пасля пачатку атакі па ўзводу быў адкрыты кулямётны агонь. Лейтэнант кінуў у ДЗВК гранату, і атрымаў цяжкае раненне, не мог больш весці агонь. Дабегшы да ДЗВК, закрыў яго сваім целам.
Пахаваны ў брацкай магіле ў горадзе Светлагорск.
Пасмяротна прысвоена званне Героя Савецкага Саюза.
Кубракоў адправіў на мяжу з Украінай АМАП і ўнутраныя войскі — «каб не дапусціць прарыву УСУ»15
Каментары