Выконваючы абавязкі прэзідэнта Абхазіі, спікер парламента Валерый Бганба накіраваў Аляксандру Лукашэнку ліст з просьбай разгледзець пытанне аб прызнанні Беларуссю суверэнітэту і незалежнасці Рэспублікі Абхазія.
«Сучасная Рэспубліка Абхазія ў адпаведнасці са сваёй Канстытуцыяй — суверэнная дзяржава, якая, дамогшыся фактычнай незалежнасці, прарабіла значны шлях яе юрыдычнага афармлення. Ключавым момантам зацвярджэння міжнароднай правасуб'ектнасці Рэспублікі Абхазія стала прызнанне яе незалежнасці Расійскай Федэрацыяй 26 жніўня 2008 года», — цытуе ліст абхазскае дзяржаўнае інфармагенцтва Апсныпресс.
Бганба адзначае, што суверэнітэт і незалежнасць Абхазіі прызнаны такімі краінамі — членамі ААН, як Нікарагуа, Венесуэла і Науру. «Кажучы пра станаўленне дзяржаўнасці Абхазіі, неабходна адзначыць, што прызнанне Рэспублікі Абхазія цалкам упісваецца ў сучасныя рэаліі міжнародных адносін», — лічыць в.а. прэзідэнта Абхазіі.
Пры гэтым ён адзначае гатоўнасць рэспублікі ў перспектыве далучыцца да Еўразійскага саюза. «Мы ўважліва сочым за дынамікай інтэграцыі паміж Рэспублікай Беларусь, Расійскай Федэрацыяй, Рэспублікай Казахстан і спадзяёмся, што ў святле падзей Рэспубліка Беларусь, Расійская Федэрацыя і Рэспубліка Казахстан ацэняць імкненне Рэспублікі Абхазія садзейнічаць інтэграцыйным працэсам, і з часам наша дзяржава будзе ўдзельнічаць у будаўніцтве Еўразійскага саюза», — піша Бганба.
Ён звяртае ўвагу на тое, што Беларусь і Абхазію «заўсёды звязвалі добрыя адносіны». «І сёння, нягледзячы на пэўныя цяжкасці, паміж намі існуюць сувязі ў эканамічнай і гуманітарнай сферах. У прыватнасці, трактары, мэбля, вырабы лёгкай прамысловасці, прадукты харчавання, вырабленыя на беларускіх прадпрыемствах, у нас карыстаюцца вялікім попытам, — гаворыцца ў лісце. — Многія грамадзяне Рэспублікі Абхазія ў савецкі час атрымалі адукацыю ў ВНУ вашай краіны, маюць роднасныя сувязі з грамадзянамі Беларусі».
Варта адзначыць, што гэта ўжо не першы зварот Абхазіі да ўлад Беларусі з просьбай аб прызнанні незалежнасці. Са свайго боку Аляксандр Лукашэнка неаднаразова заяўляў, што рашэнне аб прызнанні Абхазіі і Паўднёвай Асеціі павінен прымаць беларускі парламент.
У канцы 2008 года Абхазія і Паўднёвая Асеція афіцыйна звярнуліся ў Нацыянальны сход Беларусі з просьбай прызнаць іх незалежнасць. У лістападзе 2009-га група беларускіх парламентарыяў наведала Грузію, Абхазію і Паўднёвую Асецію для азнаямлення з сітуацыяй на месцы. Па выніках паездкі дэпутаты падрыхтавалі даклад для кіраўніцтва Беларусі, які так і не быў апублікаваны.
У кастрычніку 2013 года на прэс-канферэнцыі для расійскіх журналістаў Лукашэнка вярнуўся да гэтай тэмы, заявіўшы, што ў пытанні прызнання Абхазіі і Паўднёвай Асеціі Беларусь зведала націск Захаду. «Нам сказалі: на наступны дзень пасля прызнання Беларуссю Абхазіі і Паўднёвай Асеціі вы пазбавіцеся абмену валют, ніводзін банк з вамі працаваць не будзе», — сказаў беларускі кіраўнік.
Разважаючы на тэму, ці варта Беларусі цяпер прызнаваць Абхазію і Паўднёвую Асецію, Лукашэнка заявіў: «Цяпер мы прызнаем — адразу Грузія ўзрушыцца, узрушацца краіны, дзе ёсць тэрытарыяльныя прэтэнзіі. Адразу Захад узаб'ецца. Расіі гэта трэба? Мы проста станем каталізатарам гэтай непатрэбнай тэндэнцыі».
Ці здасць Трамп Украіну Расіі? Чаму дэмакраты разгромленыя? Да чаго прывядзе кантроль рэспубліканцаў над выканаўчай і заканадаўчай уладай адначасова?8282
Каментары