Vykonvajučy abaviazki prezidenta Abchazii, śpikier parłamienta Valeryj Bhanba nakiravaŭ Alaksandru Łukašenku list z prośbaj razhledzieć pytańnie ab pryznańni Biełaruśsiu suvierenitetu i niezaležnaści Respubliki Abchazija.
«Sučasnaja Respublika Abchazija ŭ adpaviednaści sa svajoj Kanstytucyjaj — suvierennaja dziaržava, jakaja, damohšysia faktyčnaj niezaležnaści, prarabiła značny šlach jaje jurydyčnaha afarmleńnia. Klučavym momantam zaćviardžeńnia mižnarodnaj pravasubjektnaści Respubliki Abchazija stała pryznańnie jaje niezaležnaści Rasijskaj Fiederacyjaj 26 žniŭnia 2008 hoda», — cytuje list abchazskaje dziaržaŭnaje infarmahienctva Apsnypriess.
Bhanba adznačaje, što suvierenitet i niezaležnaść Abchazii pryznany takimi krainami — členami AAN, jak Nikarahua, Vieniesueła i Nauru. «Kažučy pra stanaŭleńnie dziaržaŭnaści Abchazii, nieabchodna adznačyć, što pryznańnie Respubliki Abchazija całkam upisvajecca ŭ sučasnyja realii mižnarodnych adnosin», — ličyć v.a. prezidenta Abchazii.
Pry hetym jon adznačaje hatoŭnaść respubliki ŭ pierśpiektyvie dałučycca da Jeŭrazijskaha sajuza. «My ŭvažliva sočym za dynamikaj intehracyi pamiž Respublikaj Biełaruś, Rasijskaj Fiederacyjaj, Respublikaj Kazachstan i spadziajomsia, što ŭ śviatle padziej Respublika Biełaruś, Rasijskaja Fiederacyja i Respublika Kazachstan aceniać imknieńnie Respubliki Abchazija sadziejničać intehracyjnym pracesam, i z časam naša dziaržava budzie ŭdzielničać u budaŭnictvie Jeŭrazijskaha sajuza», — piša Bhanba.
Jon źviartaje ŭvahu na toje, što Biełaruś i Abchaziju «zaŭsiody źviazvali dobryja adnosiny». «I siońnia, niahledziačy na peŭnyja ciažkaści, pamiž nami isnujuć suviazi ŭ ekanamičnaj i humanitarnaj śfierach. U pryvatnaści, traktary, mebla, vyraby lohkaj pramysłovaści, pradukty charčavańnia, vyrablenyja na biełaruskich pradpryjemstvach, u nas karystajucca vialikim popytam, — havorycca ŭ liście. — Mnohija hramadzianie Respubliki Abchazija ŭ saviecki čas atrymali adukacyju ŭ VNU vašaj krainy, majuć rodnasnyja suviazi z hramadzianami Biełarusi».
Varta adznačyć, što heta ŭžo nie pieršy zvarot Abchazii da ŭład Biełarusi z prośbaj ab pryznańni niezaležnaści. Sa svajho boku Alaksandr Łukašenka nieadnarazova zajaŭlaŭ, što rašeńnie ab pryznańni Abchazii i Paŭdniovaj Asiecii pavinien prymać biełaruski parłamient.
U kancy 2008 hoda Abchazija i Paŭdniovaja Asiecija aficyjna źviarnulisia ŭ Nacyjanalny schod Biełarusi z prośbaj pryznać ich niezaležnaść. U listapadzie 2009-ha hrupa biełaruskich parłamientaryjaŭ naviedała Hruziju, Abchaziju i Paŭdniovuju Asieciju dla aznajamleńnia ź situacyjaj na miescy. Pa vynikach pajezdki deputaty padrychtavali dakład dla kiraŭnictva Biełarusi, jaki tak i nie byŭ apublikavany.
U kastryčniku 2013 hoda na pres-kanfierencyi dla rasijskich žurnalistaŭ Łukašenka viarnuŭsia da hetaj temy, zajaviŭšy, što ŭ pytańni pryznańnia Abchazii i Paŭdniovaj Asiecii Biełaruś źviedała nacisk Zachadu. «Nam skazali: na nastupny dzień paśla pryznańnia Biełaruśsiu Abchazii i Paŭdniovaj Asiecii vy pazbaviciesia abmienu valut, nivodzin bank z vami pracavać nie budzie», — skazaŭ biełaruski kiraŭnik.
Razvažajučy na temu, ci varta Biełarusi ciapier pryznavać Abchaziju i Paŭdniovuju Asieciju, Łukašenka zajaviŭ: «Ciapier my pryznajem — adrazu Hruzija ŭzrušycca, uzrušacca krainy, dzie jość terytaryjalnyja pretenzii. Adrazu Zachad uzabjecca. Rasii heta treba? My prosta staniem katalizataram hetaj niepatrebnaj tendencyi».
Haračy viečar u Varšavie — minskaje «Dynama» nie vytrymała nacisku «Lehii». Ale samaje cikavaje adbyvałasia nie na poli, a na trybunach FOTAREPARTAŽ3
Haračy viečar u Varšavie — minskaje «Dynama» nie vytrymała nacisku «Lehii». Ale samaje cikavaje adbyvałasia nie na poli, a na trybunach FOTAREPARTAŽ
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary