Dzie Navumaŭ? Dzie Šejman?

Vosieńniu 2008 hoda Jeŭrasajuz zamaroziŭ vizavyja sankcyi ŭ dačynieńni amal usich biełaruskich čynoŭnikaŭ, što ŭvachodzili ŭ śpis nievyjaznych. Pa‑raniejšamu nie mohuć trapić na Zachad tolki staršynia CVK Lidzija Jarmošyna, a taksama čaćviora padazravanych u hučnych źniknieńniach (Viktar Šejman, Jury Sivakoŭ, Dźmitry Paŭličenka i Uładzimir Navumaŭ). Jaki los napatkaŭ hetych asobaŭ?

Pa zahadzie Šejmana

7 maja 1999 h. źnik były ministr unutranych spravaŭ Jury Zacharanka. Potym u vieraśni raptoŭna prapali palityk Viktar Hančar i biźniesmien Anatol Krasoŭski, jašče praz hod — teleapieratar Dźmitry Zavadski.

U vyniku śledstva hienierał‑major milicyi Mikałaj Łapacik pradstaviŭ rapart na imia ministra ŭnutranych spravaŭ Uładzimira Navumava. U zapiscy Łapacik, na asnovie materyjałaŭ, sabranych śledčymi, abvinavaciŭ Viktara Šejmana ŭ tym, što toj daŭ zahad na źniščeńnie Juryja Zacharanki. A zahad vykonvaŭ Dźmitry Paŭličenka pry dapamozie Juryja Sivakova, jaki zabiaśpiečyŭ hrupu pistaletam PB‑9, časova zabranym ź minskaha SIZA №1.

Paŭličenka navat apynuŭsia pa spravie ŭ izalatary, ale chutka byŭ adtul vyzvaleny. U ordery adznačałasia, što «Paŭličenka źjaŭlajecca arhanizataram i kiraŭnikom kryminalnaj struktury, jakaja mieła dačynieńnie da vykradańnia i zabojstva ludziej».

U červieni 2001 hoda, napiaredadni prezidenckich vybaraŭ, novuju infarmacyju pa spravie źnikłych dali byłyja śledčyja respublikanskaj prakuratury Dźmitry Pietruškievič i Aleh Słučak.

Jany zajavili, što ŭ krainie isnuje tak zvany «eskadron śmierci», jaki byŭ stvorany ministram unutranych spravaŭ Juryjem Sivakovym pa zahadzie sakratara Rady biaśpieki Viktara Šejmana. Pa infarmacyi śledčych, bryhadu ŭznačalvaŭ Dźmitry Paŭličenka. Paśla adstaŭki Sivakova «eskadron» nibyta pierajšoŭ pad kantrol Uładzimira Navumava. Pietruškievič i Słučak paviedamili, što hrupaj było ździejśniena blizu 30 zabojstvaŭ.

Paśla dakłada kiprskaha deputata Rady Jeŭropy Chrystasa Purhurydesa zhadanym dziaržaŭnym asobam byŭ zabaronieny ŭjezd u krainy Jeŭropy.

Viktar Šejman

Pasadu dziaržsakratara Rady biaśpieki Viktar Šejman straciŭ paśla minskaha vybuchu na Dzień Respubliki ŭ 2008 hodzie. Da hetaha jon byŭ faktyčna druhim čałaviekam u krainie.

«Nie dumaju, što Vy pavinny zastavacca na hetaj pasadzie paśla incydentu. Vy vinavatyja, pierš za ŭsio! Vy pavodle daručeńnia prezidenta nie adzin hod, a dziesiać hadoŭ arhanizujecie padobnyja mierapryjemstvy. I ničoha nie zrabili!» — emacyjna vykazvaŭsia tady Łukašenka.

I Šejmanu daviałosia pakinuć svoj kabiniet. Pavodle nieaficyjnaj infarma¬cyi, vyrašalnuju rolu ŭ adstaŭcy ŭsiemahutnaha Šejmana syhraŭ časovy chaŭrus miž ministram unutranych spravaŭ Navumavym (jon zaŭsiody niedalublivaŭ Šejmana) i Viktaram Łukašenkam. Jany abvinavacili ŭ vybuchu jakraz kiraŭnika Rady biaśpieki.

Jak zdavałasia tady, Šejman paŭ. Ale nie dla taho hety čałaviek na praciahu mnohich hadoŭ staranna zavajoŭvaŭ upłyŭ i ŭładu, kab tak lohka jaje zdavać.

Choć Šejman i pazbaviŭsia svajoj asnoŭnaj pracy, ale pakinuŭ za saboj misiju ŭ biełaruska‑vieniesuelskaj sumiesnaj kamisii vysokaha ŭzroŭniu. Užo praz paru tydniaŭ paśla adstaŭki jon sustrakaŭ u aeraporcie «Minsk‑2» Uha Čavesa, a praź miesiac sam nakiravaŭsia ŭ Karakas.

Na biespartfielnaj pracy ŭradženiec Voranaŭskaha rajona prabyŭ amal paŭhoda. U studzieni letaś stała viadoma ab pryznačeńni Šejmana na pasadu pasła pa asablivych daručeńniach. Jahony novy kabiniet, choć i nie taki šykoŭny, jak papiaredni, mieścicca ŭ budynku Administracyi prezidenta pa adrasie vulica Karła Marksa, 38.

Cikava, što «asabliva važnyja daručeńni» Šejman atrymlivaje ŭ asnoŭnym na Łacinskuju Amieryku. U Vieniesuele hety čałaviek staŭ užo amal jak rodny.

Voś i zusim niadaŭna čynoŭnik viarnuŭsia z čarhovaha turne z toj častki płaniety. Padčas vizitu Šejman naviedaŭ Kubu, Ekvador, Baliviju i, kaniečnie ž, Vieniesuełu.

Darečy, z Łacinskaj Amierykaj źviazany i adzin skandał, u jaki trapiŭ Šejman. U mai 2008 hoda Interpoł paćvierdziŭ sapraŭdnaść noŭtbuka z elektronnym listom lidera kałumbijskich partyzanaŭ, u jakim toj havoryć, što vieniesuelski prezident Uha Čaves sprabuje ŭzbroić kałumbijskich paŭstancaŭ z dapamohaj Biełarusi.

Ispanskaja El Pais śćviardžała, što najlepšym siabram kałumbijcaŭ moh akazacca ŭžo były dziaržaŭny sakratar Rady biaśpieki Viktar Šejman. Mienavita jon byŭ adnym z tych, chto prabivaŭ kantrakty na pastaŭku zbroi ŭ Vieniesuełu.

Za apošni čas Šejman pafarbavaŭsia, staraŭsia źmianić imidž. Na sustrečach z Čavesam ci Maralesam Šejman časta apranaje vajskovuju formu, a taksama mnostva ordenaŭ i miedaloŭ.

Šejman znoŭ uzmacniaje svaje pazicyi i aŭtarytet. Pahavorvajuć, što jon znoŭ moža viarnucca va ŭładu. Prynamsi, jamu svatajuć pasadu staršyni Kamiteta dziaržakantrolu na miesca piensijaniera Łomacia. Ale ci advažycca Łukašenka viarnuć takoha paplečnika?

Viktar Šejman kursuje ŭ Amierycy ad stalicy da stalicy. 5 červienia jon sustrakaŭsia z prezidentam adnoj z najbiadniejšych krainaŭ kantynienta — Balivii — Maralesam.

Praz takoha pasłańnika Uha Čaves moža vyrašać samyja sakretnyja spravy.

Juryj Sivakoŭ

Sivakoŭ byŭ pieršym z padazravanych, chto syšoŭ u cień. U 2005 hodzie jaho źniali z pasady ministra sportu i turyzmu. Darečy, na hetaj pasadzie Sivakoŭ adznačaŭsia ci nie najbolšym demakratyzmam siarod svaich kaleh. Prynamsi, nikoli nie padzialaŭ žurnalistaŭ na «česnych i niačesnych», jak stali rabić jahonyja nastupniki.

Tankist Sivakoŭ na niaprofilnaj dla siabie pasadzie sprabavaŭ razabracca z karupcyjaj, što kvitnieła ŭ jahonym viedamstvie. Z adstaŭkaj Sivakova hetaja baraćba zacichła.

Skłaŭ Sivakoŭ ź siabie taksama abaviazki staršyni rady Biełaruskaj asacyjacyi vieteranaŭ śpiecpadraździaleńniaŭ vojskaŭ MUS «Honar».

Hienierał Sivakoŭ pracuje prarektaram pryvatnaj VNU. U svabodny dostup vystaviŭ tolki voś hetaje soniečnaje fota.

Ciapier ža Jury Sivakoŭ zajmaje ścipłuju pasadu prarektara pa vychavaŭčaj pracy Minskaha instytuta kiravańnia — pryvatnaj VNU.

30 kastryčnika 2007 hoda rašeńniem VAK prysvojenaje vučonaje zvańnie «dacent prava». Z kalehami Sivakoŭ imkniecca trymać peŭnuju dystancyju.

Dźmitryj Paŭličenka

Pieršy kamandzir śpiecyjalnaha atrada chutkaha reahavańnia ŭnutranych vojskaŭ MUS pałkoŭnik Dźmitry Paŭličenka pajšoŭ u adstaŭku jašče ŭ sakaviku letaś.

Aficyjna Paŭličenka zvolnieny z vajskovaj słužby ŭ suviazi z chvarobaj.

Na jaje Dźmitry byŭ pryznačany ŭ listapadzie 2008 hoda. Pierad hetym kamandavaŭ bryhadaj śpiecyjalnaha pryznačeńnia ŭnutranych vojskaŭ MUS (v/č 3214, Uručča, Minsk).

Chadziła mnostva čutak, što Paŭličenka byŭ špitalizavany, što ŭ jaho byŭ insult. Ale niešmatlikija źjaŭleńni pierad žurnalistami dakazvali, što Paŭličenka ŭ dobrym stanie. Chvory čałaviek na Vadochryšča ŭ pałonku nie palezie.

Paŭličenka apošni raz źjaŭlaŭsia na publicy padčas vystavy ŚMI. U niaźmiennaj skurancy.

Apošni raz na publicy jon źjaviŭsia padčas vystavy «ŚMI ŭ Biełarusi».

Pra toje, što Paŭličenka moh trapić u apału, moža śviedčyć chacia b toj fakt, što ŭ sakaviku źjaviłasia infarmacyja ab aryšcie jahonaha rodnaha brata.

U MUS paćvierdzili, što brat Paŭličenki, doktar, zatrymlivaŭsia KDB praź źniknieńnie šerahu narkatyčnych srodkaŭ z Respublikanskaj turemnaj balnicy, jakaja padparadkoŭvajecca Departamientu vykanańnia pakarańniaŭ. Ale padrabiaznaści toj spravy nieviadomyja.

Uładzimir Navumaŭ

Były ministr unutranych spravaŭ Uładzimir Navumaŭ letaś spačatku zhubiŭ ministerski fatel, a potym i pasadu ŭ Fiederacyi chakieja.

U Minsku ŭparta chadzili čutki pra vykradańnie i aryšt Navumava.

Hienierał‑lejtenant Navumaŭ ciapier pracuje ŭ Maskvie na pasadzie daradcy Siarhieja Čemiezava, hienieralnaha dyrektara dziaržaŭnaj karparacyi «Rastechnałohii». Hetaja struktura znachodzicca pad asabistym kantrolem Uładzimira Pucina.

Kažuć, što Navumava źjechać u Maskvu faktyčna prymusili, u praciŭnym vypadku pahražajučy kryminalnaj spravaj i źniavoleńniem. Tym nie mienš, sam Navumaŭ kaža, što byvaje ŭ Minsku, choć «pa Radzimie jašče nie paśpieŭ zasumavać».

Cikava, što niadaŭna dypłamatyčnuju pasadu ŭ Ženievie straciŭ i syn Navumava Zachar.

• 0
• 0
• 0
• 0
• 0
• 0