«Sioleta 90% pojduć u vojska». Vypusknikoŭ vajskovych kafiedraŭ masava pryzyvajuć słužyć
Vydańniu Devby.io paskardziŭsia student BDUIR: jon pajšoŭ vučycca na vajskovuju kafiedru, bo mierkavaŭ, što heta harantavana zabiaśpiečvaje ad słužby ŭ vojsku paśla zakančeńnia VNU. Ale jaho pryjaciela, jaki vučyŭsia na starejšym kursie, «pryzvali jak aficera — i admovicca było niamožna». Devby.io kinuŭ klič u pošukach padobnych vypadkaŭ, i vyjaviłasia, što na heta vypuskniki hetaha hoda narakajuć masava.
«Mieniedžar sprabavaŭ dakazać, što im nieabchodny supracoŭnik. Skłali chadajnictva — nie spracavała»
Alaksiej (imiony hierojaŭ źmienienyja) — vypusknik BDUIR, jaki prajšoŭ dva hady padrychtoŭki na vajskovaj kafiedry i atrymaŭ zvańnie lejtenanta zapasu.
«Ale varta było tolki atrymać dypłom, jak pačaŭ tuzać vajenkamat. Spačatku kazali, što, moža, nie spatreblusia, ale treba było ŭvieś čas da ich jeździć.
Zatym u mianie adbyłosia sumoŭje z pradstaŭnikami čaści — i tyja biezumoŭna zabrali na słužbu.
Nakolki ja viedaju, z hetaha hoda vypusku zabirajuć usich. Ani mahistratura, ani chadajnictva z pracy nie dapamahajuć.
Alaksiej kaža, što miedahlad budučyja aficery zapasu z BDUIR prachodzili jašče ŭvosień na čaćviortym kursie — «kab dakumienty byli hatovyja da zakančeńnia VNU». I jašče da ŭručeńnia dypłoma im razdali pieršyja pozvy ŭ vajenkamat.
«A tam užo pačali «karmić» novymi — raz na paru tydniaŭ: pryjechać z dypłomam, padpisać niešta, davieźci dakumienty niejkija i h. d. Potym raptam sumoŭje z pradstaŭnikami čaści, pra jakuju ja ŭžo zhadvaŭ. Na im na słovach daviali: chto ŭ jakoj častcy, jakija pasady i inšaje».
Darečy, cikavy fakt: pozvy zaŭsiody słali na pracu, a nie pa adrasie pražyvańnia.
Małady čałaviek adznačaje, što mieniedžar ź jahonaj kampanii razmaŭlaŭ pa telefonie z kimści z vajenkamata, «sprabavaŭ davieści, što im nieabchodny taki supracoŭnik, jak ja». Zatym kampanija skłała chadajnictva — ale jano nie spracavała. Alaksiej nieŭzabavie idzie słužyć.
«Nam skazali, što pryzyvajuć 998 čałaviek zamiest 100—300 zvyčajnych»
Jan skončyŭ sioleta FPMI BDU. Na «vajenku» jon i jaho adnakurśniki «išli, kab nie iści ŭ vojska», ščyra pryznajecca junak. A ŭ vyniku amal usiu hrupu «pryzvali pozvami adrazu pry kancy navučańnia».
«Nam skazali, što sioleta pryzyvajuć 998 čałaviek zamiest zvyčajnych 100-300 — na słužbu aficeraŭ zapasu.
Kožny z nas źjaviŭsia ŭ vajenkamat, i tam paviedamili, što ŭ nas amal 100% šancy pajści słužyć, bo pryjarytet — na hety hod vypusku. Vydali vajskovy bilet i pozvu na kamisiju. Tam sabrałasia kala 20 čałaviek roznych śpiecyjalnaściaŭ i hadoŭ vypusku. Kahości razabrali miascovyja čaści, niekatorym (i mnie) dali pozvu na kaniec žniŭnia.
U vyniku z druhoj sproby mianie abraŭ pradstaŭnik čaści. Jak adbyvajecca vybar: pa sutnaści, heta ankietavańnie, u ankiecie jość u tym liku pytańni pra žadańnie słužyć i miesca słužby, jakoje samomu chaciełasia b. Z majoj hrupy pryzvali 16 čałaviek z 21, asnoŭnyja miescy — Lepielski rajon, Piečy i Minsk. Jość infarmacyja, što tolki ŭ Zasłonava viasnoj pryzvali bolš za 2 tysiačy čałaviek.
Jašče nam skazali, što ni pašpart RR (pašpart hramadzianina, jaki aformiŭ vyjezd na pastajannaje miesca žycharstva za miažu — zaŭv. red.), ni listy z pracy nie paŭpłyvajuć ni na što — i ŭ nas tak i vyjšła. My bačyli śpis z umovami adterminovak — u asnoŭnym heta chvoryja baćki (žonka, dzieci)».
«Sioleta pryzyvajuć amal usich vypusknikoŭ — 90% pojduć u vojska»
Arsień nie zachacieŭ raskazvać pra siabie: kaža, advučyŭsia ŭ VNU, prajšoŭ dva hady padrychtoŭki na vajskovaj kafiedry — «a ciapier pahražaje vojska».
Maładzion kaža, što «sioleta pryzyvajuć amal usich vypusknikoŭ — 90% pojduć u vojska». Infarmacyja hetaja ad adnakłaśnikaŭ, siabroŭ i znajomych, a ich u Arsienia šmat: u BDU, BDUIR i BNTU.
«Kaho pozvaj na dom vyklikajuć, kaho — z dapamohaj sms-apaviaščeńnia. Ale bolšaść atrymała pozvy pierad dypłomam, biez hetaha nie padpisvajuć abchadnoha lista. I kožny vizit u vajenkamat zakančvajecca novaj pozvaj», — raskazvaje maładzion.
Arsień taksama pasprabavaŭ varyjant ź listom ad pracadaŭcy — «nie dapamahaje». «Adziny varyjant «adkasić» — pašpart PP, nu abo suviazi», — miarkuje surazmoŭca.
«Lepš harantavana pajści na paŭhoda, čym mieć ryzyku być pryzvanym na hod»
Jaŭhien užo adsłužyŭ 6 miesiacaŭ terminovaj słužby. Jon skončyŭ BDUIR letam 2023 hoda i ŭ jaho za śpinaj — hod padrychtoŭki na vajskovaj kafiedry, to-bok kurs padrychtoŭki małodšych kamandziraŭ. Čamu nie dva, jon tłumačyć tak:
«U BDUIR na peŭnych śpiecyjalnaściach možna advučycca hod na vajskovaj kafiedry i pajści, skaraciŭšy sabie terminovuju słužbu na paŭhoda.
Albo pajści na druhi hod kafiedry i paśla zakančeńnia atrymać aficerskaje zvańnie — adpaviedna ciabie nie pryzavuć jak «sałdata terminovaj słužby». Ale mohuć pryzvać jak aficera — z zarobkam, ale biez prava admovicca ad hetaj pracy.
Raniej pa takoj schiemie mnohija nie traplali ŭ vojska zusim, bo aficerami pryzyvali nievialikuju kolkaść ludziej. Ale, jak ja razumieju, u apošnija hady situacyja źmianiłasia — i voś užo dva hady padrychtoŭki na «vajency» nie abaraniajuć ad pryzyvu, jak raniej.
Surazmoŭca «paličyŭ, što lepš harantavana pajści na paŭhoda, čym mieć ryzyku być pryzvanym na hod, chaj i na «pracu». «U lubym vypadku ž vypadaješ sa zvykłaha žyćcia», — dadaje jon.
«Tym bolš, što raniej było tak: tyja, kaho pryzvali jak aficera paśla dvuch hadoŭ vajskovaj kafiedry, prachodzili pa inšaj hrafie prydatnaści pa zdaroŭi. To-bok šancaŭ vyjavicca «nie prydatnym» da słužby było mienš, čym kali b ciabie pryzvali na zvyčajnuju terminovuju słužbu. A ŭ mianie na toj momant jašče byŭ šaniec nie pajści pa stanie zdaroŭja — pakul u 2023 hodzie nie źmianili patrabavańni da prydatnaści.
U cełym, hledziačy na adnahrupnikaŭ, jakija skardziacca, što paśla dvuch hadoŭ kafiedry ich ciapier mohuć pryzvać jašče na hod, ja razumieju, što zrabiŭ usio pravilna. A ciapier pryzyvajuć u tym liku vypusknikoŭ tych śpiecyjalnaściaŭ, jakich raniej «nie čapali».
Jaŭhien chacieŭ słužyć u IT-rocie — paśla sumoŭja jamu navat paabiacali, što voźmuć adrazu paśla kursa maładoha bajca.
«Ale ŭžo pad kaniec kursa mnie paviedamili, što pryzvali zanadta šmat prahramistaŭ i mianie nie buduć razhladać, bo ja pryjšoŭ usiaho tolki na paŭhoda, a ŭ ich u pryjarytecie — tyja, chto na hod. Voś taki prank atrymaŭsia».
Surazmoŭca kaža, što «słužyŭ, jak i ŭsie, ale aficery ličyli, raz ja prahramist, značyć «nie durań», — i zamiest zvyčajnych naradaŭ mnie było možna davać pracu z dakumientami na kampjutary».
I ŭsio ž Jaŭhien adznačaje, što pryzyŭ paśla vajskovaj kafiedry — «heta nie terminovaja słužba, kudy biaruć usich prydatnych».
«Jość šaniec i nie pajści, bo ŭ ich peŭny płan naboru: to-bok źbirajuć u vajenkamacie ŭmoŭna 20 aficeraŭ i kažuć, što pryzavuć 15 ź ich. I potym hutarać z kožnym, vyrašajuć, u kaho jość važkija pryčyny nie iści ŭ vojska, a kaho možna zabrać».
Ci majuć słužyć vypuskniki vajskovych kafiedraŭ?
Studenty, jakija prajšli prahramu padrychtoŭki małodšych kamandziraŭ — h. zn. hod na vajskovaj kafiedry, — mohuć pryzvacca ŭ dobraachvotnym paradku na vajskovuju słužbu pa kantrakcie terminam na 2 hady albo na terminovuju vajskovuju słužbu terminam na 6 miesiacaŭ na vajskovyja pasady ŭ adpaviednaści z atrymanaj vajskovaj ulikovaj śpiecyjalnaściu.
Studenty, jakija prajšli prahramu padrychtoŭki aficeraŭ zapasu — h. zn. 2 hady na vajskovaj kafiedry, — mohuć pryzvacca na aficerskija vajskovyja pasady ŭ dobraachvotnym paradku albo pa pryzyvie terminam na 1 hod u adpaviednaści z atrymanaj vajskovaj ulikovaj śpiecyjalnaściu. Na terminovuju vajskovuju słužbu jany nie pryzyvajucca.
Kamientary
z.y. Podavlajuŝieje čisło iz moich znakomych oficierov iz vs rb uvoliłoś v 2010ch ili pośle otrabotki 5 let ili dažie nie dožidajaś, poetomu ja nie udivlen, čto ostro nie chvavatajet mładšich oficieroju.