Rasśledavalniki vinavaciać samaha bahataha kandydata ŭ prezidenty Litvy ŭ handli ź Biełaruśsiu ŭ abychod sankcyj
Kandydata ŭ prezidenty Litvy Ihnasa Viehiele padazrajuć u abychodzie sankcyj suprać Biełarusi. Kampanija kandydata Vilpra rezka naraściła ekspart kandycyjanieraŭ u Kyrhyzstan paśla abmiežavańnia handlu z RB. Kyrhyzstan adkazvaje, što stolki kandycyjanieraŭ jany nie atrymlivali.
Sumiesnaje rasśledavańnie «Biuro», Laisvės TV, Sienas i pakazvaje, što ŭ siamiejnym biznesie kandydata ŭ prezidenty Ihnasa Viehiele jość prykmiety mahčymaha abychodu sankcyj.
Danyja, sabranyja daśledčykami, pakazvajuć, što kampanija Vilpra, padkantrolnaja siamji Viehiele, prykładna za paŭhoda ekspartavała kandycyjanieraŭ amal na miljon jeŭra z ukazańniem u jakaści krainy pryznačeńnia Kyrhyzstan.
Adnak fakty vyklikajuć sumnieŭ, ci pajšli kandycyjaniery mienavita tudy. Kyrhyzstan zajaviŭ, što impartavaŭ značna mienš. Žurnalisty miarkujuć, što heta byŭ handal ź Biełaruśsiu, kudy nieŭzabavie paśla napadu Rasii na Ukrainu ES zabaraniŭ ekspart kandycyjanieraŭ.
Vilpra kateharyčna admaŭlaje svaju datyčnaść da mahčymaha miechanizmu abychodu sankcyj. Kandydat u prezidenty adkazvaje na pytańni abvinavačańniami ŭ «zamoŭnym rasśledavańni».
Da 2022 hoda Kyrhyzstan nie vyłučaŭsia ŭ jakaści bujnoha źniešniehandlovaha partniora Litvy. Adnak pa miery taho, jak sankcyjnyja pakiety Jeŭrasajuza pačali dziejničać adzin za adnym, i Litva, i inšyja krainy pačali aktyvizavać handal z hetaj krainaj. I nieŭzabavie vyśvietliłasia, što značnaja častka hetaha handlu — falšyŭka.
Źviestki, atrymanyja žurnalistami, pakazvajuć, što Vilpra intensiŭna handlavała z Kyrhyzstanam ź vieraśnia 2022 hoda pa sakavik 2023 hoda. Za hety pieryjad, zajaviła Litva, kraina ekspartavała kandycyjanieraŭ bolš čym na 2,3 miljona jeŭra. Abjom ekspartu Vilpro skłaŭ kala 40% hetaj sumy.
Kyrhyzstan paviedamiŭ statystyčnamu ahienctvu AAN, što za hety pieryjad impartavaŭ ź Litvy kandycyjanieraŭ usiaho prykładna na 370 tysiač dołaraŭ.
Pavodle dekłaracyi ab majomaści i dachodach, jakuju juryst Ihnas Viehiele padaŭ jak kandydat u prezidenty, letaś jon mieŭ majomaść na 1,5 miljona jeŭra. Na rachunku kandydat mieŭ 256 tysiačaŭ jeŭra, u 2023 hodzie jon zarabiŭ 170 tysiač jeŭra. Jon samy bahaty z 8 kandydataŭ, jakija ŭdzielničajuć u sioletnich prezidenckich vybarach, dadaje «Svaboda».
Padčas niadaŭnich teledebataŭ ź inšymi kandydatami Viehiele zajaviŭ, što dačynieńni Litvy z Rasijaj pavinny być «vielmi prahmatyčnyja», a staŭleńnie da Biełarusi paśla 2020 hodu nazvaŭ «pamyłkaj». Pavodle jaho słoŭ, Litva zhubiła «bufiernuju zonu» praź niepradumanyja rašeńni, i ciapier u Litvy «faktyčna jość miaža z Rasiejaj za 40 kiłamietraŭ ad Vilni».
Kamientary