Ministr zamiežnych spraŭ Ukrainy zaklikaŭ Niamieččynu nie paŭtarać pamyłku Mierkiel
Kali b Ukraina ŭžo była čalcom NATO ŭ 2014 hodzie, anieksii Kryma, vajny na Danbasie i ŭvarvańnia na terytoryju ŭsioj krainy nie adbyłosia b.
Ministr zamiežnych spraŭ Dmytro Kuleba zaklikaŭ niamiecki ŭrad nie paŭtarać pamyłku byłoj kanclerki Anhieły Mierkiel, pieraškadžajučy ŭstupleńniu Ukrainy ŭ NATO. Pra heta Kuleba zajaviŭ u intervju niamieckamu vydańniu Bild, jak piša «Ukrainskaja praŭda».
«Nie paŭtarajcie pamyłku kanclerki Mierkiel, jakuju jana zrabiła ŭ Buchareście ŭ 2008 hodzie, kali była suprać luboha prahresu na šlachu da členstva Ukrainy ŭ NATO», — skazaŭ Kuleba.
Na jaho dumku, tahačasnaja pastanova Aljansu «adkryła dźviery dla ŭvarvańnia Pucina ŭ Hruziju i ŭ vyniku niezakonnaj anieksii Kryma». Kali b Ukraina ŭžo była čalcom NATO ŭ 2014 hodzie, to anieksii Kryma, vajny na Danbasie i ŭvarvańnia na terytoryju ŭsioj krainy nie adbyłosia b.
Adnak, sa słoŭ Kuleby, Kijeŭ nie čakaje pryjomu ŭ NATO padčas vajny.
«Ale paśla vajny dla Jeŭropy było b samahubstvam nie pryniać Ukrainu ŭ NATO», — skazaŭ jon.
«Adziny sposab zakryć dźviery rasijskaj ahresii suprać Jeŭropy i Jeŭrapiejska-atłantyčnaj prastory — heta pryniać Ukrainu ŭ NATO», — padkreśliŭ ministr.
Jon rastłumačyŭ, što Rasija nie navažycca znoŭ napaści na Ukrainu, jakaja budzie čalcom NATO. I tady Ukraina vyzvalić Niamieččynu i inšyja zachodnija krainy NATO ad ciažaru abarony svajho ŭschodniaha fłanha.
«My voźmiem hety ciažar na svaje plečy», — skazaŭ Kuleba.
***
Na Bucharesckim samicie NATO 2008 hoda Hiermanija i Francyja zabłakavali atrymańnie Ukrainaj, a taksama Hruzijaj Płana dziejańniaŭ pa členstvie ŭ NATO, bajučysia eskałacyi z boku Rasii.
Paśla poŭnamaštabnaha ŭvarvańnia RF va Ukrainu Mierkiel admoviłasia pryznać, što taja jaje pastanova mahła pryvieści da rasijskaj ahresii.
U mai 2023 hoda hienieralny sakratar NATO Jens Stołtenbierh zajaviŭ, što niezaležna ad pastanovy samitu Aljansu ŭ 2008 hodzie, dzie Ukraina nie atrymała Płan dziejańniaŭ členstva, napad Rasii na Ukrainu — heta ničym nie apraŭdanaje parušeńnie mižnarodnaha prava.
Orban: Pryjdzie čas, kali słabyja narody zahinuć, a mocnyja vyžyvuć
Abama nie ličyć, što ŭ 2014 hodzie śviet niedastatkova stroha adreahavaŭ na anieksiju Kryma
«Ideja, što Ukraina razvalicca za try dni, była nie tolki rasijskaja». Historyk Cimaci Snajder pra toje, jak Rasija zrabiła pryvabnaj svaju impierskuju rytoryku
Zdajuć u arendu katedž zahinułaha chakieista Cypłakova ŭ Drazdach. Voś interjery FOTY14
Kamientary