Užyvańnie psiłacybinavych hryboŭ moža dapamahčy pry daltaniźmie?

Psiłacybinavyja hryby, mahčyma, dapamahli palehčyć daltanizm prynamsi ŭ adnym vypadku. Gizmodo raspaviadaje pra dakład, apublikavany lekarami i daśledčykami z Cleveland Clinic u amierykanskim Ahajo i University of Alabama ŭ Birminhiemie. Artykuł, apublikavany ŭ časopisie Drug Science, Policy and Law, apisvaje čałavieka, u jakoha paśla adnoj dozy psiłacybinavych hryboŭ nazirajecca ścipłaje, praciahłaje palapšeńnie čyrvona-zialonaha zroku (to-bok zdolnaści adroźnivać čyrvonyja i zialonyja adcieńni ŭ kalarovaj hamie).

Psiłacybin źjaŭlajecca asnoŭnym aktyŭnym inhredyjentam šmatlikich hryboŭ. Jon i inšyja psichadeličnyja preparaty vyvučajucca zachodnimi navukoŭcami i daktarami dla patencyjnaha vykarystańnia ŭ miedycynskich metach, takich, jak, naprykład, dapamoha ŭ lačeńni depresii i posttraŭmatyčnaha stresavaha rasstrojstva.

Danyja niadaŭnich apytańniaŭ spažyŭcoŭ psichadelikaŭ taksama pakazvajuć, što apošnija mohuć palepšyć deficyt kalarovaha zroku. Ale, nakolki viadoma lekaram, jakija stajać za hetaj novaj spravazdačaj, da hetaha času nie było apublikavanych ekśpierymientalnych danych abo spravazdač ab hetaj novaj patencyjnaj karyści preparataŭ.

Pacyjent, pra jakoha idzie havorka, — 35-hadovy mužčyna z dejteranamalijaj, typam čyrvona-zialonaha daltanizmu (ci koleraślepaści). Paviedamlajecca, što ciaham mnohich hadoŭ jon čas ad času prymaŭ psichadeliki. Paśla niekatorych sieansaŭ jon zaŭvažyŭ palapšeńnie svajho čyrvona-zialonaha bačańnia, što ŭ kančatkovym vyniku natchniła jaho na praviadzieńnie ŭłasnaha ekśpierymientu.

Niepasredna pierad tym, jak prahłynuć adnu dozu sušanych psiłacybinavych hryboŭ, jon prajšoŭ test Išychara (Ishihara test), jaki zvyčajna vykarystoŭvajecca dla pravierki miery čyrvona-zialonaha daltanizmu. Zatym jon praciahvaŭ zdavać test praz rehularnyja pramiežki času na praciahu nastupnych čatyroch miesiacaŭ, praviarajučy adkazy tolki ŭ kancy ekśpierymientu. Daktary, jakim jon raspavioŭ pra svoj ekśpierymient, praviali paśla ŭłasny test — praz 436 dzion paśla jaho pieršapačatkovaha vykarystańnia psiłacybinu.

Pavialičyć

Aŭtary daśledavańnia pišuć, što adnarazovaje vykarystańnie psiłacybinu moža vyklikać efiekt častkovaha palapšeńnia niedachopu kalarovaha bačańnia, pryčym palapšeńnie praciahvajecca i paśla pieršapačatkovaha vostraha efiektu, niahledziačy na ​​​​toje, što sam stan daltanizmu zvyčajna źjaŭlajecca vynikam hienietyčnaha defiektu.

Jak i ŭ bolšaści vypadkaŭ, daltanizm mužčyny, vierahodna, była vyklikany hienietyčnymi mutacyjami ŭ kletkach kołbačak siatčatki. Małaimavierna, što psiłacybin ci inšyja psichadeliki mohuć niejkim čynam vypravić defiekty hetych kletak abo navat niepasredna ŭpłyvajuć na vočy.

Chutčej za ŭsio, miarkujuć daśledčyki, hetyja preparaty mohuć vyklikać novyja suviazi ŭ častkach mozhu, jakija ŭdzielničajuć u vizualnaj apracoŭcy najvyšejšaha ŭzroŭniu (asabliva što tyčycca našaha ŭsprymańnia koleraŭ). Aŭtary adznačajuć, što ludzi, jakija ŭžyvajuć psichadeliki, rehularna paviedamlajuć pra jarkija źmieny ŭ tym, jak jany bačać kolery, tamu hety fienomien moža być praciaham hetaha efiektu.

Viadoma, heta tolki adzinkavy vypadak, zasnavany ŭ asnoŭnym na samaspravazdačy adnaho čałavieka ź lohkaj formaj daltanizmu. Aŭtary kažuć, što dla paćviardžeńnia ich vysnoŭ buduć nieabchodnyja dalejšyja daśledavańni ź vialikaj kolkaściu ludziej.Tady daśledčyki zmohuć vyśvietlić, ci dapamohuć psichadeliki ludziam z bolš surjoznym daltanizmam i jak mienavita heta pracuje.

• 6
• 1
• 1
• 2
• 1
• 0