«Vielmi dziŭnyja spravy» na miljony. Čamu varta pahladzieć novy siezon samaha rejtynhavaha šou Netflix u historyi?
U historyi stryminhavych servisaŭ nie fiksavałasia bolš papularnaha kantentu, čym sieryjał «Vielmi dziŭnyja spravy» (Stranger Things). Čaćviorty siezon šou vytvorčaści «Netfliks» nie tolki pabiŭ šerah rekordaŭ, ale ŭvajšoŭ u historyju kiniematohrafa. «Naša Niva» biez spojleraŭ raspaviadaje, čamu jaho varta pahladzieć.
Kaśmičnyja ličby prahladaŭ
Za čas svajho isnavańnia internet-płatforma stvaryła cełuju płyniu zvyšpaśpiachovych prajektaŭ. Pryčym aŭdytoryja zaškalvała, niahledziačy na palarnuju stylistyku stužak: fentezijny «Viadźmak» ciešyŭ vielizarnuju aŭdytoryju nastolki ž hodna, jak histaryčnaja navieła «Brydžartony» albo sacyjalnaja drama pra stasunki padletkaŭ «13 pryčyn čamu». Tym nie mienš, «Vielmi dziŭnyja spravy» navat siarod hetaj raznastajnaści vyłučalisia: efiektnaja žanravaja sumieś, niebanalnyja siužetnyja chady dy vybitny vizuał spravakavaŭ anamalnuju cikavaść aŭdytoryi.
Čaćviorty siezon pahladzieli bolš za 800 miljonaŭ čałaviek, što zrabiła prajekt samym zapatrabavanym siarod anhłamoŭnych šou ŭ historyi stryminhu.
Paćviardžaje papularnaść sieryjała i techničny niuans, jaki supravadziŭ premjeru finalnaj sieryi. Vielizarnaha napłyvu hledačoŭ nie vytrymali sierviery «Netfliks», z-za čaho prablemy z padklučeńniem uźnikli ŭ karystalnikaŭ pa ŭsim śviecie. Bolš za 14 tysiač skarhaŭ resurs zafiksavaŭ tolki za paŭhadziny da aficyjnaha pačatku tranślacyi. Pry hetym nie vybačyŭsia, a tolki vydaŭ reliz pra zmahańnie z prablemaj i paśpiachovaje jaje vyrašeńnie. Chacia varta było b niejak fanam adździačyć, bo hetaja supołka — samaja tryvałaja z usich na «Netfliksie».
Bolej za toje, mienavita za košt hledačoŭ servis płanavaŭ vypravić stanovišča paśla admieny karanavirusnych zabaron.
Jak tolki krainy pačali vychodzić z łakdaŭnu, a ludzi — atrymlivać šaniec bavić volny čas nie tolki la televizara, kolkaść padpisčykaŭ stryminhu skaraciłasia na 200 tysiač. Ekanamičny ž kryzis u Jeŭropie razam z błakavańniem servisu ŭ Rasii budzie kaštavać «Netfliksu» straty jašče dvuch miljonaŭ fanaŭ.
Tamu jak sami «Dziŭnyja spravy», tak i jaho śpin-of (scenar užo ŭ raspracoŭcy) stvaralniki razhladajuć nie tolki paśpiachovym tvorčym prajektam, ale i markietynhavym bustam dla ŭsioj płatformy.
Rekordny biudžet
Vytvorčaść sieryjała — sama pa sabie sprava, poŭnaja kłopatu. Adnak kali jon znachodzić aŭdytoryju, a paśla pavialičvaje kolkaść hledačoŭ, uzrastajuć i vydatki na zdymki. Bo płanka jakaści jak u dačynieńni da źmiestu, tak i da azdableńnia pavyšajecca z epizoda ŭ epizod.
«Dziŭnyja spravy» vyklučeńniem z praviłaŭ nie stali: kožnaja sieryja apošniaha siezona «paciahnuła» adrazu na 30 miljonaŭ dalaraŭ — sumu, da jakoj raniej stvaralniki i blizka nie daciahvali.
Pavieličeńnie koštu taksama tłumačycca i vychadam prajekta na łahičny finiš. Pieršapačatkova ŭžo hetym letam fanaty mahli atrymać adkazy na ŭsie klučavyja pytańni šou. Adnak detalej, što patrabavali prapracoŭki, stanaviłasia ŭsio bolš. Tamu navat čaćviorty siezon atrymaŭsia manumientalnym: da siami viasieńnich sieryj dałučylisia dźvie letnija. Pryčym apošnija pa praciahłaści prabili stol u čatyry hadziny!..
MURRAY BAUMAN BRINGING THE pic.twitter.com/jijx2SecVR
Adnak i hetaha scenarystam nie chapiłam — pryjšłosia paćviardžać piaty siezon, pryznačany da relizu naprykancy 2023 hoda albo napačatku 2024-ha. Jon, darečy, taksama projdzie praź sieryjny padzieł, jaki charakterny dla prajektaŭ «Netfliks» apošnich časoŭ: 75-chvilinnyja «standartnyja» sieryi, dźvie kulminacyjnyja na 90 chvilin i hrand-finał praciahłaściu u 2,5 hadziny.
Ekstremalnyja łakacyi
Adnym z klučavych hieatehaŭ čaćviortaha siezonu źjaŭlajecca savieckaja turma na Kamčatcy. Dziei, što tam razhortvajucca, pradziusary prajektu nasamreč vyrašyli zdymać za kratami. Abrali dla placoŭki Łukišskuju viaźnicu ŭ Vilni. Pieravałačnuju kropku dla habrejaŭ, jakich fašysty vyvozili na rasstreł, navat pieratvarać u zmročnyja katakomby nie spatrebiłasia — dastatkova było kryšku azdobić anturaž sučasnymi pražektarami. Efiekt pieraŭzyšoŭ usie čakańni: dryžyki pa ciele pry «pieraniasieńni» za kraty adčuvali navat tyja, chto hladzieŭ sieryi na maleńkich ekranach smartfonaŭ.
Darečy, chodziać čutki, što Vilnia jak łakacyja dla zdymak zacikaviła «Netfliks» paśla pośpiechu kankurentaŭ z NVO. Tyja pieratvaryli rajon Fabijoniški ŭ Prypiać padčas zdymkaŭ dramy «Čarnobyl» — i damahlisia amal stoadsotkavaha padabienstva dekaracyj da realnaści. Varta pryznać, što paŭtornyja sproba zachodnich apierataraŭ adaptavać litoŭskuju stalicu pad patreby amierykanskaha scenara taksama atrymałasia vielmi ŭdałaj. Pryčym nastolki, što siońnia kamieru ŭ Łukiškach, dzie išli zdymki, miascovyja ekskursavody prapanujuć naviedać — praŭda, za hrošy — jak haradskuju vybitnaść.
Uchvalnaja skrupuloznaść
Kab pieradać niuansy epochi navat u drobiaziach, zdymačnaja hrupa źviartałasia pa dapamohu prafiesijanałaŭ u samych raznastajnych śfierach dy krainach.
Tak, kab damahčysia maksimalnaha padabienstva va ŭniformie, aktualnaj dla padziej na Kamčatcy, mastaki pa kaściumach naviedvali Polšču i kansultavalisia jak z vajskovymi ekśpiertami, tak i z dyzajnierami pa vopratcy 80-ch.
Tady jak sfarmiravać harderob hałoŭnych hierojaŭ šoŭraneram dapamahli kultavyja brendy minułaha stahodździa — Quicksilver, Vans, Converse. Darečy, vytvorcy abutku tak «zamaročylisia», što pašyli ŭnikalnyja krasoŭki dla hałoŭnych dziejnych asob, adnak całkam vytrymali stylistyku 80-ch.
MILLIE BOBBY BROWN & CONVERSE... #NEW pic.twitter.com/9revAya6kq
Dy što tam: navat humki dla vałasoŭ u kožnaha z hierojaŭ — ručnoha vyrabu. Pryčym kožnaja ź ich adpaviadaje koleravaj hamie vopratki. Kali ž pryhladziecca, to zaŭvažaješ, jak hety elemient vobrazu amal u kožnaha z hierojaŭ karektujecca jašče pad koler skury dy pad historyju sieryjała. Naprykład, humka Maks Mejfiłd stanovicca bolš brudnaj dy blakłaj, bo, adpaviedna z raźvićciom padziej, jana nosić upryhožvańnie bolš za hod.
Ale lepiej za ŭsio skrupuloznaść usioj kamandy «Dziŭnych spraŭ» adlustruje videa z hrymam hałoŭnaha złodzieja siezona. Akcior, jaki ŭvasobiŭsia ŭ rolu Viekny, ažno siem (!) hadzin ciarpliva čakaŭ, pakul usie šnary dy muskuły stanuć adno da adnaho. Pry hetym mastaki kožny raz adnaŭlali šedeŭr ledźvie nie z kampjuternaj dakładnaściu. Adnak nivodnaj technałahičnaj pryłady ŭ spravu nie puskałasia — ludzi rabili cud rukami.
can't talk rn, i'm becoming vecna.
[brought to life by barrie gower] pic.twitter.com/1EYf7wcjIy
Šykoŭnaje kamiea
Čaćviorty siezon vytrymany ŭ stylistycy filma žachaŭ — i tamu adsyłki da kłasičnych choraraŭ praskokvajuć ledźvie nie ŭ kožnym epizodzie. Tut vam i zhadka pra słavutaha mańjaka Teda Bandzi, i adsyłki da kłasiki žanru, «Chełoŭin». Ale ž višańkaj na torcie vyhladaje epizadyčnaje źjaŭleńnie ŭ adnoj sa scen Robierta Inhłunda.
just how deeply is STRANGER THINGS 4 inspired by A NIGHTMARE ON ELM STREET?
not only is the creature design for #StrangerThings4 villain Vecna heavily influenced by Freddy Krueger, but actor Robert Englund trades finger knives for creepy eyes as Victor Creel in the new season pic.twitter.com/kMj1X89dha
Aktor, jaki ŭvasobiŭ na ekranie kultavuju postać Fredzi Kruhiera z «Kašmara na vulicy viazaŭ», zdoleŭ «zapalić» i ŭ suśviecie «Dziŭnych spraŭ», chaj sabie pradziusary adviali jamu zusim niamnoha času.
Lehiendarnaja muzyka
Atmaśfiera 1980-ch u siezonie vybitna pieradajecca i praz saŭndtreki. Skažam, pieśni Running Up That Hill u vykanańni Kiejt Buš sieryjał padaravaŭ druhoje žyćcio: papularnaść 1985-ha viarnułasia da kampazicyi nastolki imkliva, što ŭ 2022-m jana navat patrapiła ŭ brytanskija čarty dy ŭźniałasia na 37-je miesca.
Ale kudy bolš efiektna ŭ kantekst «Dziŭnych spraŭ» upisaŭsia rok. Dziakujučy piersanažu ŭ vykanańni Džo Kuina, hledačy nanoŭ zachapilisia hitarnymi ryfami dy kasuchami.
Cikava, što hieroja Kuina azdobili aryhinalnym mierčam hurta Dio, jaki byŭ pryśviečany vychadu płytki 1984 hoda The Last in Line. A adšukała dy pryniesła jaho zdymačnaj hrupie niepasredna ŭdava Roni Džejmsa Dzia.
Vartaja zhadki i scena, jakuju «ahučyli» trekam Master of Puppets — adnoj z samych paznavalnych «vizitovak» hurta Metallica.
Darečy, soła, jakoje padčas dziei vykonvaje piersanaž užo ŭzhadanaha Kuina, nasamreč zapisvaŭ u studyi Taj Truchilja. Chto nie viedaje, 17-hadovy padletak — syn basista Metallica Roba Truchilja. Tady jak kansultam usiaho pierfomansu vystupiŭ Kirk Chemiet, lidar hrupy i adzin z dynazaŭraŭ kłasičnaha mietał-śvietu.
Siastra Kaleśnikavaj prapanavała ŭ Bruseli try kroki, jakija treba zrabić dla vyzvaleńnia palitviaźniaŭ20
Kamientary