Finlandyja hatovaja da ŭdaru Rasii i ŭpeŭnienaja, što pieramoža

U listapadzie hetaha hoda Finlandyja z udziełam sajuźnikaŭ pa NATA praviała vajskovyja vučeńni Dynamic Front 2024 — samyja bujnyja artyleryjskija vučeńni ŭ historyi aljansu i pieršyja takoha charaktaru na svajoj terytoryi. Niekalki tysiač sałdat z 28 krain adpracoŭvali ŭzajemadziejańnie ŭ płanavańni i kiravańni artyleryjskim ahniom na terytoryi Łapłandyi ŭsiaho za sto kiłamietraŭ ad Rasii.

Jak piša Welt.de,

Finlandyja, jakaja ŭstupiła ŭ NATA ŭ krasaviku 2023 hoda, adrazu stała ŭ aljansie adnym z hałoŭnych jastrabaŭ.

«Važna razumieć, što my nie možam być vinavatymi ŭ abvastreńni situacyi, bo dziejničajem stroha ŭ miežach mižnarodnaha prava», — cytuje vydańnie słovy ministarki zamiežnych spraŭ Finlandyi Eliny Vałtanien.

Pavialičyć

Z samaha pačatku poŭnamaštabnaj vajny Rasii suprać Ukrainy Finlandyja padtrymlivaje Kijeŭ pastaŭkami zbroi biez usialakich abmiežavańniaŭ i zaklikaje inšych zachodnich partnioraŭ demanstravać Rasii siłu.

Kraina ŭžo zrabiła pastaŭki ŭzbrajeńniaŭ Ukrainie na sumu kala 2,5 miljarda jeŭra, što ŭ praporcyi da VUP robić Finlandyju adnym ź lidaraŭ padtrymki Ukrainy. Na ŭłasnuju abaronu Chielsinki patracili ŭ hetym hodzie kala 2,4% VUP i źbirajucca ŭ dalejšym tolki pavialičvać hety pakazčyk.

«Biaśpieka kaštuje doraha, ale vy pačynajecie canić jaje jašče bolš, kali vy jaje hublajecie. Heta nieabchodnyja inviestycyi», — pryvodzić vydańnie słovy kiraŭnika analityčnaha centra Instytuta zamiežnaj palityki Finlandyi Chiski Chaŭkała (Hiski Haukkala).

Jak zaŭvažajuć analityki, palityka Finlandyi adnosna Rasii źjaŭlajecca jaskravym prykładam jastrabinaha padychodu da biaśpieki, jaki praduhledžvaje ŭ jakaści strymlivalnaha faktaru ahresii naroščvańnie vajskovaha patencyjału i ćviorduju pazicyju adnosna palityki biaśpieki.

Pavialičyć

Finlandyja nikoli nie admianiała abaviazkovuju słužbu pa pryzyvie i tamu maje adnu z najbolšych armij na jeŭrapiejskim kantyniencie. Z prykładna 900 tysiač reziervistaŭ (pry ahulnaj kolkaści nasielnictva 5,6 miljona) pry patrebie tracina moža stać pad ružžo imhnienna.

Finlandyja taksama maje raźvity vajskova-marski fłot i zvyš 60 sučasnych źniščalnikaŭ — lepšych za rasijskija, u tym liku supiersučasnyja F-35. U jaje na ŭzbrajeńni staić bolš artyleryi, čym u Hiermanii i Francyi razam uziatych.

U krainie vielmi dobra raźvitaja hramadzianskaja abarona. Nasielnictvu dastupnyja zvyš 50 tysiač bunkieraŭ pa ŭsioj krainie. Tolki ŭ stalicy naličvajecca kala 5500 bambaschoviščaŭ (kali ŭličvać stancyi mietro i padziemnyja aŭtastajanki), jakija zdolnyja źmiaścić 900 tysiač čałaviek, što na tracinu bolš za kolkaść žycharoŭ horada.

Štohod ułady drukujuć instrukcyi, u jakich apisvajecca, jak padrychtavacca i pavodzić siabie ŭ mahčymych kryzisnych situacyjach. 

U nasielnictva taksama vialikaja vola da abarony krainy. Pavodle danych sacapytańniaŭ, 80% finaŭ hatovyja sa zbrojaj u rukach abaraniać svaju krainu ŭ vypadku napadu. U Hiermanii hety pakazčyk napałovu mienšy.

Vialikuju papularnaść paśla pačatku vajny va Ukrainie ŭ Finlandyi nabyli strałkovyja kursy dla žančyn, jakija dziejničali i da hetaha. Jak raskazała žurnalistam adna z arhanizatarak, zdarajecca, što miescy na ich raźbirajuć za ličanyja chviliny. Urad Finlandyi abviaściŭ pra namier adkryć dadatkova 300 novych strelbiščaŭ dla pavyšeńnia abaranazdolnaści krainy.

Bolšaść nasielnictva adnaznačna padtrymlivaje dapamohu Ukrainie, choć heta doraha abychodzicca biudžetu i skaračaje vydatki na sacyjalnyja patreby. Dla taho, kab zrazumieć, čamu tak adbyvajecca, treba zhadać historyju krainy. Jak viadoma, u vyniku saviecka-finskaj vajny 1939—1940 hadoŭ kraina straciła paŭdniova-ŭschodniuju častku.

Pavialičyć

Vopyt toj «Zimovaj vajny» da hetaj pary farmiruje finskuju palityku biaśpieki. U metach uzmacnieńnia ŭłasnaj biaśpieki ŭ krasaviku 2023 hoda Finlandyja ŭstupiła ŭ NATA.

U 2023 hodzie ŭ adkaz na pasyłańnie mihrantaŭ u Finlandyju Chielsinki imhnienna pryniaŭ rašeńnie zakryć pamiežnyja pierachody z Rasijaj, a ŭ lipieni 2024 hoda kraina de-fakta dazvoliła tak zvany push back («viartańnie mihrantaŭ») na miažy z Rasijaj niahledziačy na toje, što takija dziejańni parušajuć zakon ES ab nadańni prytułku. Svaje pavodziny kraina tłumačyć vykarystańniem mihrantaŭ aficyjnaj Maskvoj u jakaści srodku hibrydnaj vajny.

Kiraŭnica MZS Finlandyi adkryta krytykavała rašeńnie kanclera Hiermanii patelefanavać Pucinu ŭ siaredzinie listapada, nie paraiŭšysia z sajuźnikami. Jak jana ličyć, adzinym varyjantam dla Jeŭropy źjaŭlajecca zachavańnie ćviordaha kursa adnosna Rasii.

«Nam para pastaleć. Heta ŭklučaje ŭ siabie sumiesnaje stvareńnie strymlivalnaha faktaru. Nie dla taho, kab vieści vajnu, a kab praduchilić jaje», — cytuje vydańnie słovy Eliny Vałtanien.

• 50
• 1
• 0
• 1
• 0
• 0
• 0
• 5