Za hod mašyna straciła amal pałovu cany. Ułaśniki elektramabilaŭ skardziacca, što ich mašyny imkliva tańniejuć
Ułaśniki elektrakaraŭ u Biełarusi kažuć, što patrymanyja «elektryčki» nie karystajucca vialikim popytam i mocna hublajuć u canie. Pahladzieli na statystyku.
Tesla tańnieje na vačach?
Tesla model 3 2020 hoda vypusku ŭ śniežni 2023 hoda ŭ Biełarusi ŭ siarednim kaštavała $32 tysiačy. Praz hod siaredni košt źniziŭsia da 23 tysiač dalaraŭ.
Tesla model Ch 2020 hoda za hod patańnieła z 62 tysiač dalaraŭ (śniežań 2023 hoda) da 52 tysiač dalaraŭ. Ale kali brać bolš praciahły pieryjad, to padzieńnie budzie jašče bolš zaŭvažnym.
Tak, naprykład, čatyrochhadovyja (2018 h.v) Tesla model Ch u Biełarusi ŭ śniežni 2022 hoda pradavalisia ŭ siarednim za 70 tysiač dalaraŭ. Ciapier ža čatyrochhadovuju (2020 h.v) Tesla model Ch addajuć u siarednim za 55 tysiač, a mašyna 2020 hoda vypusku za dva hady patańnieła roŭna ŭ 2 razy.
Admietna, što ŭ papiarednija hady sama Tesla nieadnarazova źnižała ceny na novyja aŭto, kab rabić ich bolš kankurentazdolnymi. Kampanija Iłana Maska mahła sabie heta dazvolić, bo pačatkovy pracent maržy byŭ davoli vysokim. Ličycca, što marža Tesla zastajecca adnoj z samych vysokich u aŭtamabilnaj pramysłovaści.
Takija pavodziny amierykanskaha aŭtavytvorcy vyklikali abureńni pakupnikoŭ, jakija paśpieli nabyć aŭto pa starych cenach, bo heta aŭtamatyčna aznačała, što ich mašyny taksama hublajuć u canie dadatkovyja paru tysiač dalaraŭ. Nie ŭ zachapleńni ad rehularnych dyskontaŭ ad Tesla taksama lizinhavyja kampanii i ŭłaśniki aŭtaprakataŭ, bo astatkavy košt hetych mašyn źnižajecca nadta mocna.
«Kitaj» taksama nie ŭtrymaŭ ceńnik
Z kitajskimi «elektryčkami» situacyja vyhladaje jašče bolš dramatyčna.
Naprykład, narabiŭšy šumu ŭ aŭtamabilnym asiarodździ, Zeekr 001 u traŭni 2023 hoda pradavaŭsia novym za 74-75 tysiač dalaraŭ. Ciapier ceny na novy Zeekr 001 u zaležnaści ad kamplektacyi vahajucca ŭ miežach 43-57 tysiač dalaraŭ.
Hadavałyja aŭto z prabieham ciapier pradajuć pa cenach ad 36 300 da 45 500 dalaraŭ.
Inšy jaskravy prykład — BYD Song Plus EV. Viasnoju 2023 hoda hetyja elektryčnyja parkietniki pradavalisia pa cenach ad 39 da 41 tysiačy dalaraŭ.
Ciapier novyja BYD Song Plus EV dastupnyja pa cenach ad 24 500 da 29 500 dalaraŭ.
Admietna, što patrymanych BYD Song Plus EV amal niama ŭ prodažy. A ceny na hadavałyja aŭto z prabieham pačynajucca z 20 tysiač dalaraŭ, što krychu bolš za 50% ad cany, jakuju treba było zapłacić za hetaje aŭto hod tamu, kali jano było novaje.
Usie elektramabili tańniejuć, ale nie ŭsie tak chutka
Tak, naprykład, elektryčnyja Nissan Leaf 2020 hoda vypusku za hod zhubili kala 15%. U śniežni 2023 hoda za takija aŭto ŭ siarednim prasili $20 638, a ciapier $17 750.
A što z aŭto na tradycyjnym palivie?
BMW 5 sieryi 2019 hoda ŭ śniežni 2023 hoda kaštavała ŭ siarednim 35 680 dalaraŭ. Praz hod cana na nie tolki nie źmienšyłasia, a navat krychu padrasła. Ciapier siaredni košt takich mašyn składaje 36 162 dalary.
BMW X3 2020 hoda vypusku za hod straciła ŭ canie ŭsiaho 6%. Letaś u siarednim za hetu mašynu prasili 43 650 dalaraŭ, a ciapier 41 089.
Admietna, što elektryčnyja BMW i3 hublajuć u canie kudy bolš aktyŭna, čym aŭto toj ža marki z ruchavikami ŭnutranaha zharańnia.
Tak, naprykład, BMW i3 2019 hoda vypusku straciła za hod 14% ad letašniaj cany — 23 600 dalaraŭ suprać 20 322.
Nie hublajuć u canie takija aŭto, jak Ford Mustang. Hod tamu siaredniaja cana na Mustang 2019 hoda vypusku składała 29 077 dalaraŭ. Za hod mašyna pastareła i vyrasła ŭ canie, ciapier za ich u siarednim prosiać $32 657.
Što moža spynić hety praces?
Dla taho, kab patrymanyja elektramabili pierastali chutka tańnieć, jak minimum pavinny pierastać źnižacca ceny na novyja aŭto ŭ hetym siehmiencie.
Pa-druhoje, pavinien być dobry popyt na takija aŭto na druhasnym rynku, što taksama pad pytańniem, asabliva, kali havorka idzie pra mašyny kitajskich brendaŭ. Kitajskija aŭtavytvorcy chutkimi tempami vypuskajuć novyja madeli i robiać restajlinh praz 2-3 hady znachodžańnia na kanviejery. Pryčym novaja ci abnoŭlenaja madel, jak praviła, pačynaje pradavacca tańniej, čym papiaredniaja. Naturalna, što heta budzie niehatyŭna adbivacca na košcie patrymanych mašyn.
Taćciana Zareckaja bolš nie estonskaja startapierka. Ciapier jana sprabuje stać pasiarednicaj inviestaraŭ u Saudaŭskaj Aravii13
Kamientary
Pasprabujcie kamu-niebudź zhadnlavać batareiku paśla 2 hadoŭ užyvańnia )
Tiepieŕ budut jezdiť i diełať vid, čto im nravitsia ibo s probiehom etot šłak nikomu i za poł cieny nie nužien