Minskaje «Dynama» prezientavała hulca prapahandysckaj ahitkaj, jakuju redahavaŭ ministr sportu VIDEA
14 krasavika minskaje «Dynama» prezientavała svajho navička — 36-hadovaha abaroncu Alaksandra Sačyŭku. Videa atrymałasia pa-sapraŭdnamu histaryčnym — nikoli raniej u biełfutbole spartsmien u prezientacyjnym roliku nie ŭschvalaŭ režym Łukašenki, nie kazaŭ pra toje, jak dziaržava raźvivaje sport, i nie zakranaŭ temu patryjatyzmu (žadańnie «z radaściu adstojvać intaresy svajoj krainy na spartyŭnych arenach»).
Pikantnaści situacyi nadaje toje, što paśla vybaraŭ 2020-ha Sačyŭka apublikavaŭ u siabie ŭ Instagram storys ź niedvuchsensoŭnaj zajavaj «My nie narodziec! My vialiki narod! Žyvie Biełaruś!» (adsyłka da słoŭ Łukašenki, jaki nazyvaŭ biełarusaŭ «narodcam»). U vieraśni hulec źniaŭsia ŭ videazvarocie z kalehami, u jakim jany asudzili hvałt u Biełarusi.
«Trybuna» daviedałasia padrabiaznaści taho, jak stvarałasia videa, jakoje, padobna, stanie hałoŭnaj viachoj u bijahrafii Sačyŭki-futbalista.
Chto aŭtar zakadravaha tekstu i jak naohuł rabiŭsia hety rolik? «Trybuna» pahutaryła na temu z dosyć vialikaj kolkaściu ludziej ź biełaruskaha futboła — z tymi, chto niepasredna źviazany z vyšejšaj lihaj, a taksama tymi, chto viadzie spravy ŭ kalafutbolnym asiarodździ.
Reakcyja surazmoŭcaŭ adnolkavaja — usie ŭ šoku.
Nichto nie čakaŭ ubačyć toje, što vypuściła «Dynama». I hałoŭnaja pryčyna ździŭleńnia kryjecca ŭ tym, što hierojem rolika staŭ Sačyŭka — futbalist, jaki nie padpisaŭ praŭładny list i nikoli nie vykazvaŭsia ŭ padtrymku režymu Łukašenki. Chutčej, jaho pazicyja była dyjamietralna procilehłaj.
Chtości z surazmoŭcaŭ abmiažoŭvaŭsia frazaj «Što ž, heta jaho [Sačyŭki] vybar». Ale byli i bolš radykalnyja pohlady: «Dla mianie takoha čałavieka bolš nie isnuje» i «Paśla ŭsiaho hetaha «Dynama» spadziajecca, što na matčy pojduć zaŭziatary?», «Usio maje svaju canu — 30 srebranikaŭ». U cełym nichto nie moh da kanca zrazumieć matyvaŭ, jakija prymusili daśviedčanaha futbalista pajści na taki krok.
Dla pačatku varta jašče raz uspomnić, što ŭ 2020 hodzie abaronca źniaŭsia ŭ videa, u jakim futbalisty vystupili suprać hvałtu. Tady Alaksandr hulaŭ za «Šachcior». Nijakich sankcyj za ŭdzieł u zdymkach nie było, spartoviec praciahnuŭ vystup za «harniakoŭ» i hulaŭ až da kanca siezona-2021. Ale zimoj kłub, hałoŭny sponsar jakoha «Biełaruśkalij», z-za nakładzienych ES sankcyj pačaŭ adčuvać finansavyja prablemy — i vystaviŭ Sačyŭku, a taksama bramnika Alaksandra Hutara i paŭabaroncu Ihara Stasieviča na tranśfier.
«Harniaki» ŭžo nie ciahnuli finansavyja abaviazacielstvy pierad futbalistami, plus u novych realijach patrabavałasia adpaviadać stoli zarobkaŭ (choć ciapier «Šachcior» spakojna abychodzić ŭkazy źvierchu). Tamu ź vieteranami było vyrašana rasstacca. Tak Sačyŭka staŭ svabodnym ahientam.
Niahledziačy na ŭzrost, jon prosta znajšoŭ by ŭ Biełarusi novy kłub, adnak u kancy minułaha hoda z padačy Ministerstva sportu źjaviŭsia śpis niepažadanych hulcoŭ i trenieraŭ — tych, chto ŭ svoj čas nie pabajaŭsia vystupić suprać hvałtu i chto zajaviŭ ab tym, što vybary ŭ 2020-m byli adkryta sfalsifikavanyja.
Źvierchu pryjšła ŭstanoŭka takich ludziej na pracu ŭ biełaruskija kłuby nie zaprašać, kantrakty — nie praciahvać.
U śpis niepažadanych trapili i futbalisty, jakija źnialisia ŭ videa suprać hvałtu, u tym liku Sačyŭka. Uzimku abaronca sprabavaŭ pracaŭładkavacca ŭ «Minsku», dzie hulaŭ z 2005-ha pa 2016-y hady, ale pierachod nie ŭchvaliła Minsportu — jak raz pa ideałahičnych pryčynach.
Zakančvać karjeru futbalist nie chacieŭ. I tut padviarnuŭsia varyjant z-za miažy — jaho pasłuhami zacikaviŭsia aŭtsajdar pieršaj lihi, rasijski «Tekstylščyk». Na pačatku viasny Sačyŭka adpraviŭsia ŭ horad Ivanava, dzie bazujecca kalektyŭ, ale da padpisańnia kantrakta sprava nie dajšła. Alaksandr, miakka kažučy, akazaŭsia nie ŭ zachapleńni ad taho, jak vybudavanaja praca ŭ kłubie, na jakim stadyjonie vystupaje kalektyŭ, dy i ŭmovy pražyvańnia ŭ Ivanavie pakidali žadać lepšaha. Praź niekalki tydniaŭ Sačyŭka viarnuŭsia ŭ Biełaruś, dzie za pačatkam novaha siezona pryjšłosia nazirać z boku.
Tym nie mienš, sychodzić z futboła Sačyŭka nie śpiašaŭsia — była nadzieja, što ŭsio ž taki ŭdasca ŭlicca ŭ ČB. Dy i padzarabić u kancy karjery — taksama žadańnie zrazumiełaje. U vyniku paśla doŭhich čakańniaŭ i pošukaŭ namalavaŭsia adzin, pa sutnaści, apošni varyjant — ź minskim «Dynama».
Z «bieła-błakitnymi» Sačyŭka zaklučyŭ pahadnieńnie da 31 śniežnia 2022 hoda. Z vysokaj dolaj vierahodnaści možna vykazać zdahadku, što «Dynama» stanie apošnim kłubam u karjery hulca. Alaksandr pahadziŭsia na ŭsie ŭmovy, vysunutyja staličnym kłubam. Adnoj ź ich byŭ udzieł u roliku, jaki my ŭsie i ŭbačyli. Sačyŭka svoj vybar zrabiŭ.
Jak udałosia daviedacca «Trybunie», tekst dla abaroncy pisała pres-słužba «Dynama». A jaje, nahadajem, ź minułaha hoda ŭznačalvaje Kaciaryna Antonava — žonka zaŭziataha prychilnika Łukašenki Alaksandra Bahdanoviča, eks-vieślara, a ciapier staršyni fiederacyi chakieja.
Ale, viadoma, nie tolki jana prykłała ruku da scenaryja. Uvieś praces padrychtoŭki rolika — ad tekstu da vyniku — kantralavaŭsia asabista ministram sportu Siarhiejem Kavalčukom. «Dynama» ciapier dziejničaje vyklučna z dazvołu hetaha čynoŭnika: i zarpłaty hulcam vyznačaje, i pravodzić tranśfiery.
Kali tekst dla videa z udziełam Sačyŭki byŭ zrobleny, jaho vizavaŭ ministr. Pavodle infarmacyi «Trybuny», videašerah u roliku taksama byŭ uchvaleny Kavalčukom.
Choć, jak udałosia daviedacca, jon vystupaŭ za toje, kab vynikovy pradukt byŭ napoŭnieny jašče vialikaj kolkaściu ideałahičnych kadraŭ, a tekst byŭ bolš «patryjatyčnym». Ale bakam udałosia znajści kampramis i źlohku źnizić hradus ideałohii ŭ roliku. Zrešty, i biez hetaha atrymałasia histaryčnaja ahitka.
Izrailski biznesmien staŭ iranskim špijonam dziela darahoj va ŭtrymańni biełaruski. Chto hetaja fatalnaja łedzi?9
Kamientary