«Hrech Kaina». Jak Maskva straciła ciapier užo i ŭkrainskich pravasłaŭnych Maskoŭskaha patryjarchata

Ukraina — adna z kananičnych terytoryj Maskoŭskaha patryjarchata. Heta miesca, dzie znachodziacca važnyja dla Ruskaj carkvy abjekty, u tym liku try vialikija manastyry — Kijeva-Piačerskaja, Śviatahorskaja i Pačajeŭskaja łaŭry. Naturalna, što va ŭmovach vajny ŭkrainskija vierniki čakali padtrymki ad kiraŭnika svajoj carkvy, to bok ad patryjarcha Kiryła. Ale jany atrymali zusim inšuju reakcyju.

Chutka budzie miesiac, jak idzie ŭkrainskaja vajna, ale ž za ŭvieś hety čas Kirył nie skazaŭ ni słova spačuvańnia ŭkrainskamu narodu. Kali sačyć pa jaho publičnych vystupach, hłava Maskoŭskaha patryjarchata nibyta nie bačyć achviar rasijskich vojskaŭ u Kijevie, Charkavie, Maryupali, Bučy, Irpieni i šmatlikich inšych haradach, jakija, časam zdajecca, zachopnik choča ścierci ź ziamli. Zamiest hetaha Kirył paŭtaraje naratyŭ pra pakuty žycharoŭ Danbasa — ale ž jaho pastva žyvie nie tolki tam.

Uładzimir Pucin zrazumieła prademanstravaŭ u svaich pramovach, što jon nie vieryć u dziaržaŭnaść Ukrainy, i Kirył padtakvaje jamu. Jon robić heta, kali paŭtaraje ŭ svaich propaviedziach ideju pra «brackija» ruski i ŭkrainski narody. Patryjarcha, vidać, nie turbuje, što adzin z hetych narodaŭ pajšoŭ sa zbrojaj na inšy i prosta ciapier biaźlitasna bambić harady. Ci heta, na dumku Kiryła, robiać niejkija mifičnyja antyrasijskija siły? Chiba nie tyja, ad jakich rasijskaja armija mietadyčna začyščaje praz bambiožki mirnyja harady?

Jašče adzin niečakany tezis ad Kiryła — ideja pra toje, što Danbasu zaraz naviazvajuć niejkija nieprymalnyja kaštoŭnaści. Naprykład, 6 sakavika patryjarch paviedamiŭ, što vierniki Danbasa pakutavali praz toje, nibyta jany nie žadajuć prymać zachodnija kaštoŭnaści nakštałt hiej-paradaŭ.

Ale heta ŭsio haśnie ŭ paraŭnańni z žestam, jaki patryjarch zrabiŭ 13 sakavika. Paśla niadzielnaj słužby jon padaryŭ ikonu Aŭhustoŭskaj Božaj Maci Viktaru Zołatavu, kiraŭniku Rashvardyi, i dabrasłaviŭ jaho na słužeńnie Ajčynie. Nahadajem, što Rashvardyja — aktyŭny ŭdzielnik vajny va Ukrainie z rasijskaha boku.

Jašče adzin važny momant: u svaim publičnym vystupie ad 21 lutaha, za niekalki dzion da napadu na Ukrainu, Pucin zhadaŭ Ukrainskuju pravasłaŭnuju carkvu Maskoŭskaha patryjarchata. Pa jaho słovach, u Kijevie nibyta rychtavali raspravu nad hetaj carkvoj. Pucin spasyłaŭsia na zakony, što nibyta ŭščamlajuć pravy viernikaŭ Maskoŭskaha patryjarchata, i faktyčna vykarystaŭ carkoŭny raskoł jak adno z apraŭdańniaŭ uvarvańnia va Ukrainu.

Jak reahuje ŭkrainskaje pravasłaŭje

Kiraŭnik UPC Maskoŭskaha patryjarchata, mitrapalit Anufryj, u pieršy ž dzień napadu Rasii rezka jaho asudziŭ. Jon nazvaŭ hetuju vajnu paŭtareńniem hrachu biblejskaha Kaina — to bok bratazabojstvam.

Z samaha pačatku ŭvarvańnia ŭsio bolš klirykaŭ UPC MP prybiahajuć da važnaha žesta — admaŭlajucca zhadvać (paminać) imia patryjarcha Kiryła za bohasłužeńniem. Reč tym, što paminańnie imia hałoŭnaha jepiskapa carkvy (jakim dla RPC źjaŭlajecca Kirył) — heta simvał malitoŭnaha adzinstva ŭsich viernikaŭ, što naležać da hetaj carkvy. Adpaviedna, kali niedzie takoha jepiskapa nie paminajuć, kali za jaho nie molacca, možna havaryć pra krok u kirunku carkoŭnaha raskoła.

Siońnia jak minimum ŭ 19 z bolš čym 50 jeparchij UPC MP nie paminajuć Kiryła na bohasłužeńniach. Cikava, što ŭžo praz try dni paśla pačatku vajny heta pierastali rabić navat častka śviataroŭ Kijeva-Piačerskaj Łaŭry — adnoj z najbolš značnych apor Ruskaj pravasłaŭnaj carkvy va Ukrainie. Za jaje prykładam pajšła i Pačajeŭskaja łaŭra — inšaja ćviardynia pramaskoŭskaha pravasłaŭja.

Heta tolki tyja jeparchii, kiraŭniki jakich aficyjna dazvolili svaim śviataram nie paminać Kiryła. Jość danyja, što i ŭ inšych jeparchijach jość śviatary, što admaŭlajucca paminać Kiryła, i kiraŭnictva UPC MP nijak na heta nie reahuje.

Dy i sami ŭkrainskija śviatary vykazvajucca pra maskoŭskaha patryjarcha nie nadta pachvalna. Namieśnik kiraŭnika adździeła źniešnich carkoŭnych znosin UPC MP, śviatar Mikałaj Danilevič charaktaryzuje dziejańni Kiryła tak: «Uvohule zajavy i dziejańni patryjarcha Kiryła, i jaho acenka rasijska-ŭkrainskaj vajny, i napadu na Ukrainu, i adkrytaha ŭvarvańnia va Ukrainu, jana, miakka kažučy, dziŭnaja, a dakładniej, absalutna nieadekvatnaja. I jaho zajavy vyklikali luty supraciŭ. Nierazumieńnie, nieprymańnie i supraciŭ».

U pačatku sakavika ŭ siecivie źjaviŭsia videazvarot ukrainskich śviataroŭ da patryjarcha Kiryła i mitrapalita Anufryja. Rolik daŭžynioj u vosiem z pałovaj chvilin źmiaščaje zaklik da mitrapalita ab vychadzie z RPC. Aŭtary zvarotu śviedčać, što jany spynili paminać Kiryła padčas słužbaŭ, i kamientujuć jaho maŭčańnie ŭ adkaz na rasijskuju ahresiju: «My ličyli vas baćkam, ale vy akazalisia horšy za ajčyma». Na siońnia videa maje ŭžo bolš za 200 tysiač prahladaŭ.

Vierniki inšych terytoryj, padnačalenych RPC, taksama dystancyrujucca ad rytoryki pra «denacyfikacyju». 1 sakavika źjaviŭsia adkryty list dziasiatkaŭ śviataroŭ Maskoŭskaha patryjarchata z zaklikam da nieadkładnaha spynieńnia vajny i prymireńnia pamiž rasijskim i ŭkrainskim narodami.

Navat suśvietnyja pravasłaŭnyja lidary asudzili dziejańni Kiryła. Z adpaviednymi zajavami vystupili patryjarch Aleksandryjski Fieador II, patryjarch Rumynski Daniel, kiraŭnik pravasłaŭnaj carkvy Finlandyi archijepiskap Leŭ i mitrapalit Polskaj pravasłaŭnaj carkvy Sava.

Da maskoŭskaha patryjarcha źviarnułasia Suśvietnaja rada cerkvaŭ — upłyvovaja mižnarodnaja arhanizacyja, u jakuju ŭvachodzić i RPC. Śviatar Iaan Saŭka, vykanaŭčy abaviazkaŭ hiensakratara Savieta, u liście da Kiryła paprasiŭ taho «ŭmiašacca i stać pasiarednikam pamiž pradstaŭnikami ŭłady, kab spynić hetuju vajnu». Patryjarch u adkaz napisaŭ tamu pra siły, što «adkryta zajaŭlajuć pra svaje varožyja namiery da Rasii», jakija nibyta ščylna nablizilisia da jaje miežaŭ.

Mitrapalit Vilenski i Litoŭski Inakientyj, jaki taksama padparadkoŭvajecca RPC, taksama vystupiŭ za mir. Jon rašuča asudziŭ vajnu Rasii va Ukrainie i adznačyŭ, što ŭ Litvie nie zhodnyja z vykazvańniami patryjarcha Kiryła nakont hetaj vajny.

Što čakaje u takich umovach RPC va Ukrainie?

Siarod viernikaŭ hučać jak hałasy za aŭtakiefaliju, to bok samastojnaje isnavańnie ad RPC, tak i zakliki nie prymać takich važnych rašeńniaŭ u napružanych abstavinach.

Varta pamiatać, što va Ukrainie ŭžo jość svaja aŭtakiefalnaja carkva — PCU (Pravasłaŭnaja carkva Ukrainy). Jaje samastojnaść pryznanaja najvialikšaj u śviecie pravasłaŭnaj carkvoj— Kanstancinopalskim patryjarchatam, a taksama Aleksandryjskaj, Kiprskaj i Eładskaj pravasłaŭnymi cerkvami. Mahčyma, pierachod ukrainskich prychodaŭ RPC u skład PCU byŭ by technična lahčejšym rašeńniem, čym zasnavańnie novaj carkvy. 

I hety pierachod užo idzie. Niekalki dzion tamu stała viadoma pra toje, što ŭ PCU pierajšli mužčynski Vaskrasienski Navaafonski manastyr u Lvovie i prychod Śviata-Pakroŭskaha chrama ŭ Čyrvonahradzie.

Sama PCU taksama spryjaje hetaj kansalidacyi vakoł siabie. Jaje kiraŭnik, mitrapalit Jepifanij, adznačyŭ na adnoj z propaviedziaŭ: «Kožny z vas na svaim miescy ŭ toj ci inšaj abščynie moža zrabić vielmi karysnuju spravu: pryniać rašeńnie ab dałučeńni da Pravasłaŭnaj carkvy Ukrainy».

Zrazumieła adno: tak, jak raniej, ukrainskija prychody RPC bolš žyć nie buduć. Rasijskija bambardziroŭki źniščajuć chramy RPC, u zachoplenych chramach akupanty ładziać ahniavyja pazicyi, i vierniki Maskoŭskaha patryjarchata pakutujuć ad vajny hetak ža, jak i astatnija hramadzianie Ukrainy.

 «Pazvaniŭ paprasić lekaŭ ad vanitaŭ, padumali — u pałonie, a akazałasia, što myje ruskija tanki ad pareštkaŭ», — svajaki biełaruskaha sałdata

Maryupal: jak Rasija ściraje ź ziamli samy prarasijski horad Ukrainy

• 2
• 0
• 0
• 0
• 0
• 0
• 0
• 0