U Abchazii pierakryli darohi, patrabujučy vyzvalić zatrymanych aktyvistaŭ apazicyi. Što viadoma
Uviečary ŭ paniadziełak apazicyja ŭ Abchazii, što adkałołasia ad Hruzii, pačała akcyi pratestu z patrabavańniem vyzvalić zatrymanych raniej aktyvistaŭ, a taksama admianić pahadnieńnie ab rasijskich inviestycyjnych prajektach u Respublicy, piša Bi-bi-si.
Što adbyłosia
U paniadziełak la budynka Słužby dziaržbiaśpieki ŭ Suchumi prajšła akcyja pratestu, udzielniki jakoj patrabavali vyzvalić aktyvistaŭ, jak miarkujecca zatrymanych paśla sutyčki z adnym z deputataŭ kala budynka miascovaha parłamienta. Paviedamlałasia taksama pra bojku padčas akcyi.
Jak paviedamiŭ staršynia apazicyjnaj partyi «Forum narodnaha adzinstva Abchazii» Asłan Barcic, byli zatrymanyja piać aktyvistaŭ — Amar Smyr, eks-deputaty parłamienta Hary Kakaja i Ałmaschan Ardzinba, Ramaz Džapua i Asłan Hvaramija.
«Jany viartalisia sa schodu hramadskaści ŭ Hudauckim rajonie, pryśviečanym niadaŭna padpisanamu rasijska-abchazskamu pahadnieńniu ab inviestycyjnaj dziejnaści, ich zatrymali», — skazaŭ Barcic.
Na jaho dumku, heta źjaŭlajecca pieraśledam pa palityčnych matyvach. Adnak ułady zajaŭlajuć, što apazicyjanieraŭ zatrymali za «supraćpraŭnyja dziejańni» ŭ dačynieńni da adnaho z deputataŭ.
«Hrupaj asob, jakija znachodziacca ŭ dvary budynka parłamienta respubliki Abchazija, byli ŭčynienyja supraćpraŭnyja dziejańni ŭ dačynieńni da deputata parłamienta, jakija supravadžalisia niecenzurnaj łajankaj», — paviedamiŭ hienprakuror Abchazii Adhur Ahrba.
U miascovych telehram-kanałach publikujucca videa mierkavanaj sutyčki z deputatam, a taksama nastupnaha zatrymańnia apazicyjanieraŭ bajcami SACHR. Apazicyja śćviardžaje, što zatrymańnie było niezakonnym i niesuraźmiernym tamu, što adbyłosia.
«Sam styl zatrymańnia byŭ takim, jak byccam zatrymlivalisia asabliva niebiaśpiečnyja złačyncy. Kali b ich chtości zaprasiŭ na hutarku ŭ SHB, jany sami b tudy pryjechali», — zajaviŭ adzin ź lidaraŭ apazicyi Adhur Ardzinba.
Jak piša miascovy telehram-kanał «Respublika», da zatrymanych nie dapuskajuć svajakoŭ, infarmacyi ab ich stanie taksama niama.
U noč na aŭtorak pratestoŭcy pačali źbiracca na płoščy Svabody ŭ Suchumi, a taksama pierakryli Humiścinski i Kadorski masty.
Prezident Abchazii Asłan Bžanija pravioŭ ekstrannaje pasiadžeńnie, na jakim pradstaŭniki siłavych struktur paviedamili ab tym, što adbyvajecca ŭ Respublicy.
Jak zajaviŭ hienprakuror Adhur Ahrba, padčas pratestaŭ svajaki zatrymanych i pradstaŭniki apazicyi sprabavali niezakonna praniknuć u budynak SHB, adnak hetuju sprobu spynili supracoŭniki pravaachoŭnych orhanaŭ.
Kiraŭnik SHB Dźmitryj Kučubieryja nazvaŭ toje, što adbyłosia, «masavymi biesparadkami». Pavodle jaho słoŭ, adzin z udzielnikaŭ akcyi sprabavaŭ prymianić siłu da supracoŭnikaŭ viedamstva, a taksama prataranić varoty.
Kiraŭnik abchazskaha MUS Robiert Kiut, u svaju čarhu, nazvaŭ toje, što adbyłosia raniej z deputatam parłamienta napadam. Ułady nie nazyvajuć jaho imia, adnak, pavodle źviestak praŭładnych telehram-kanałaŭ, padčas incydentu «byŭ źbity» deputat Ałmas Akaba.
Adzin ź lidaraŭ apazicyi Adhur Ardzinba zajaviŭ, što jaho paplečniki byli zatrymanyja, pakolki adstojvajuć nacyjanalnyja intaresy.
«My budziem damahacca nie tolki ich vyzvaleńnia. Heta pahadnieńnie, jakoje chočuć ratyfikavać — dać aliharcham biaźmiernyja lhoty i zialonaje śviatło na rasprodaž Abchazii, budzie spyniena», — zajaviŭ jon.
«Tut niama nivodnaha čałavieka, jaki b pajšoŭ na takija miery z zadavalnieńniem. Tyja, chto sočać za dziejańniami apazicyi ŭsie piać hadoŭ, viedajuć, što my nikoli nie padtrymlivali padobnyja akcyi. Ale siońnia heta vymušanyja miery», — dadaŭ Ardzinba.
Što za pahadnieńnie?
Havorka idzie pra pahadnieńnie pamiž Rasijaj i Abchazijaj, u adpaviednaści ź jakim rasiejskija kampanii mohuć realizoŭvać svaje inviestycyjnyja prajekty na terytoryi Respubliki.
Pahadnieńnie było padpisanaje ŭ Maskvie 30 kastryčnika i ciapier pavinna być ratyfikavanaje parłamientam Abchazii.
Hetaje pytańnie płanavałasia razhledzieć 15 listapada — u hety dzień aktyvisty apazicyi mieli namier pravieści akcyi pratestu ŭ respublicy z patrabavańniem admianić pahadnieńnie.
U paniadziełak na pazačarhovaj siesii parłamienta Abchazii razhladaŭsia zakonaprajekt ab budaŭnictvie šmatfunkcyjanalnych kompleksaŭ, jaki źjaŭlajecca častkaj ahulnaha pahadnieńnia.
Krynica ŭ parłamiencie paviedamiła ahienctvu RIA Naviny, što na pasiadžeńni dakumient byŭ pryniaty ŭ kančatkovym čytańni.
Kamientary