12 sakavika pačałasia kampanija ŭ padtrymku novaha vydańnia knihi vybitnaha mastaka, dyzajniera i paeta Michała Aniempadystava «Koler Biełarusi». Heta zachaplalnaje padarožža ŭ Biełaruś praz historyju i sučasnaść koleraŭ.
Dyzajnierski albom «Koler Biełarusi» staŭ apošniaj vialikaj pracaj Michała Aniempadystava. Jon spałučaje ŭ sabie vizualnuju i litaraturna-daśledčuju častku, stvarajučy efiekt poŭnaha pahružeńnia ŭ koleravy śviet Biełarusi.
Čamu ŭ biełaruskaj tradycyjnaj kultury amal niama apisańniaŭ zimovych krajavidaŭ i śniehu? Jak źviazany čyrvony koler z raźvićciom technałohij? Što jadnaje šery i zialony? Čamu «krasnym» u Biełarusi nazyvali zialony koler? I ŭrešcie - jakim jość koler Biełarusi?
Adkazy na hetyja pytańni - nie prosta zabaŭnyja cikavostki, heta padstavy dla prafiesijnaj pracy. Dla architektaraŭ, dyzajnieraŭ, mastakoŭ i krajaznaŭcaŭ heta novaja vieda. Jana daje mahčymaść uklučać svaju pracu ŭ histaryčny kantekst, prastoru kultury i miascovy łanšaft, čaho siońnia tak mocna brakuje ŭ stvareńni harmaničnaha asiarodździa. Ale hety albom nie tolki dla prafiesijanałaŭ, jon daje novy pohlad na našuju paŭsiadzionnajać i ŭpadabańni, na samich siabie i svaju kulturu.
Kniha stała zaviaršalnym etapam šmathadovaj pracy aŭtara i była vydadziena ŭ 2017 hodzie abmiežavanym nakładam, jaki adrazu razyšoŭsia siarod znaŭcaŭ i prychilnikaŭ tvorčaści Michała Aniempadystava.
U knizie apisanyja siem koleraŭ, jakimi «pafarbavanaja» biełaruskaja kultura: bieły, čorny, čyrvony, sini, šery, załaty i zialony. Kožny «encykłapiedyčny artykuł» prailustravany dziasiatkami fota, dzie zafiksavanaja prysutnaść kolera ŭ pryrodzie i ŭ materyjalnaj kultury.
Dyzajnierski albom užo paśpieŭ stać kaštoŭnym artefaktam sučasnaj biełaruskaj kultury, dzie ŭ niepaŭtornym styli aŭtara adbyvajecca pošuk Biełarusi. Hety styl my dobra viedajem i lubim pa kultavym «Narodnym albomie» i vobrazach šerahu ŭpłyvovych kulturnickich kampanij.
Hetaja kampanija daje mahčymaść usim žadajučym zamović knihu i stać uładalnikam unikalnaha vydańnia, stvoranaha hienijalnym sučaśnikam, jaki zaŭčasna pakinuj nas.
Kampanija pačałasia na kraŭdfandynhavaj płatformie Ulej.by. Płanujecca vydać knihu nakładam 500 asobnikaŭ. Kraŭdfandynhavaja kampanija pracuje pa pryncypie pieradzamovy: padtrymaŭšy prajekt, čytačy atrymajuć knihu pa nizkaj canie. Adzin asobnik budzie kaštavać 40 rubloŭ. Pry zamovie niekalkich asobnikaŭ cana budzie mienšaja. Da ŭdziełu zaprašajucca taksama asoby i kampanii, jakija hatovyja vystupić sponsarami, kab kniha mahła patrapić u biblijateki, kulturnickija ŭstanovy i publičnyja prastory.
Kampanija budzie iści da 25 krasavika.
Michał Aniempadystaŭ
naradziŭsia 16 sakavika 1964 hoda ŭ Minsku. Dyzajnier, fatohraf, hrafik, paet, publicyst. Šyroka viadomy jak adzin sa stvaralnikaŭ biełaruskaj rok-paezii 1990-ch. Aŭtar idei i tekstaŭ kultavaha muzyčnaha prajekta «Narodny albom» (1997). Pieśni na vieršy Aniempadystava — u repiertuary Źmitra Vajciuškieviča, hurtoŭ «Novaje Nieba», N.R.M., IQ48. U 2013 h. vydaŭ zbornik svaich vieršaŭ «Hłyboka, hłyboka, na dnie filižanki kavy». Byŭ aŭtaram vokładak i ilustracyj dla šmatlikich knih i časopisaŭ biełaruskich aŭtaraŭ. Stvaraŭ vokładki dla CD-dyskaŭ hurta «N.R.M.», Źmitra Vajciuškieviča. Viadomy jak vydatny płakatyst i aŭtar posteraŭ da rok-kancertaŭ.
23 studzienia 2018 hoda Michała Aniempadystava nie stała. Apošniaj jaho vialikaj pracaj staŭ vizualna-daśledčy prajekt «Koler Biełarusi».
«Jana nie ŭ turmie, a na śpiecdačy KDB!» Kanśpirołahi nakinulisia na Kaleśnikavu12
Kamientary