Hielmut Duz: velcom hatovy ŭklučyć 4G choć zaŭtra, kali dziaržava dazvolić

Apieratar velcom hatovy «choć zaŭtra» ŭklučyć u svajoj sietcy technałohiju LTE (4G) pry najaŭnaści adpaviednaha dazvołu dziaržavy. Pra heta 28 krasavika na pres-kanfierencyi ŭ Minsku zajaviŭ hienieralny dyrektar ZP «Vełkom» Hielmut Duz.

«Naša sietka ŭžo hatovaja da vykarystańnia technałohii LTE. Adnak ekskluziŭnaje prava na vykarystańnie hetaj technałohii dadziena apierataru beCloud», — skazaŭ Duz.

Jon źviarnuŭ uvahu, što ŭ sietcy hetaha apieratara kala 150 bazavych stancyj u Minsku. U svaju čarhu ŭ velcom u stalicy kala 700 bazavych stancyj, hatovych da vykarystańnia technałohii LTE.

Jak adznačyŭ Hielmut Duz, velcom hatovy da supracoŭnictva z beCloud. «My viadziem pieramovy z beCloud i sprabujem damahčysia ad ich harantyj vydzialeńnia dastatkovaha abjomu sietki dla našaha servisu», — rastłumačyŭ jon.

«Ale asabista sam ja vystupaju za kankurencyju, tamu što mienavita kankurencyja prymušaje ŭkaraniać lepšyja vidy i abjomy pasłuh, jakija pradastaŭlajucca. Suśvietny dośvied paćviardžaje, što manapolija ŭ telekamunikacyjnym biźniesie — heta nie samy lepšy varyjant», — dapoŭniŭ hiendyrektar ZP «Vełkom».

Sietku LTE Advanced (4G) u Biełarusi zapuścili ŭ kamiercyjnuju ekspłuatacyju 17 śniežnia 2015 hoda. Jaje budaŭnictvam zajmaŭsia pieršy infrastrukturny apieratar beCloud dla nastupnaha pradastaŭleńnia jaje ŭ karystańnie ŭsim zacikaŭlenym apierataram.

Na hety momant zacikaŭlenaść prajaviła tolki kampanija «MTS». Adnak u Minsuviazi raźličvajuć na chutkaje padklučeńnie ŭsich biełaruskich mabilnych apierataraŭ da stvaranaj sietki LTE Advanced. Na momant pačatku pracy LTE-pakryćcio zabiaśpiečvali 150 bazavych stancyj.

Na pačatak sakavika razhornutaj u Minsku sietkaj LTE Advanced karystalisia kala čatyroch z pałovaj tysiač abanientaŭ.

Pavodle dadzienych GSA (Global mobile Suppliers Association), na kaniec studzienia 2016 hoda ŭ 157 krainach było zapuščana 480 LTE-sietak (prahnoz da kanca hoda — 550), karystalnikami jakich stali bolš jak 156 miljonaŭ čałaviek.

«Vełkom» pačaŭ ažyćciaŭlać kamiercyjnuju dziejnaść pa pradastaŭleńni pasłuh i tavaraŭ mabilnaj suviazi 16 krasavika 1999 hoda. Ź listapada 2007 hoda velcom uvachodzić u skład chołdynhu Telekom Austria Group, adnaho ź viadučych telekamunikacyjnych pravajdaraŭ u Centralnaj i Uschodniaj Jeŭropie. Kolkaść abanientaŭ velcom pieravyšaje 5 miljonaŭ.

STAA «Biełaruskija vobłačnyja technałohii» (beCloud) — infrastrukturny apieratar, stvorany na padstavie ŭkaza prezidenta 19 śniežnia 2012 hoda. Dziejnaść beCloud zaklučajecca ŭ prajektavańni, budaŭnictvie, asnaščeńni i ekspłuatacyi nastupnych abjektaŭ: apornaj sietki pieradačy dadzienych dla Adzinaj respublikanskaj sietki pieradačy dadzienych; respublikanskaha centra apracoŭki dadzienych; sietki čaćviortaha pakaleńnia LTE; učastka tranzitnaj mahistrali sietki elektrasuviazi pa terytoryi Biełarusi.

• 0
• 0
• 0
• 0
• 0
• 0