«Дзіця пачало тузаць за футра са словамі: «Трэба ў разетку ўключыць!» Дзяды Марозы і Снягуркі расказваюць пра сваю працу
Навагоднія і калядныя святы — час зімовай казкі і цудаў, якія не абыходзяцца без галоўных чараўнікоў — Дзеда Мароза і Снягуркі. Але гэтыя казачныя героі таксама людзі, якія сустракаюць бой курантаў на працы і нават забываюцца на бараду на ранішніках у дзіцячых садах. Чараўнікі і чараўніцы расказалі «Нашай Ніве» пра свой адпачынак, а таксама пра смешныя выпадкі, што з імі здараліся.
«Аднойчы пасля нашага прыходу сямігадовае дзіця сказала маці: «Нейкі занадта сапраўдны Дзед Мароз»
Дзеду Марозу Уладзіміру 49 гадоў, яго дачцэ Снягурцы Аляксандры — 24. Уладзімір прыйшоў у аматарскі тэатр, калі яму яшчэ не было 18 гадоў, і з таго часу пачаў выступаць Дзедам Марозам. Такім чынам, стаж працы ўжо 30 гадоў.
«Мы з дачкой прафесійныя акцёры, вучыліся на акцёраў і працуем па спецыяльнасці, — кажа Дзед Мароз Уладзімір. — Спачатку выступаў у палацах культуры на нейкіх вечарынках. А потым пачаў выступаць на гарадскіх мерапрыемствах і так павялося і надалей».
Па словах Снягуркі Аляксандры, яна працаваць з бацькам не планавала. Трапіла выпадкова.
«Мяне ён стаў браць вымушана, калі можна так сказаць, — дзеліцца дзяўчына. — У мінулым годзе майго бацьку звольнілі з працы па палітычных матывах. Знайсці новую было вельмі складана. І я вырашыла тату дапамагчы. Напісала пост у сацсетках, у якім сказала, што мой бацька будзе рады напярэдадні Новага года прыйсці да вас на свята ў вобразе Дзеда Мароза.
Нечакана на пост адгукнулася адна з блогераў, размясціла маё паведамленне ў сябе. І паляцела вялізная колькасць заказаў. Тата жыве ў Гомлі, а я ў Мінску. Пасля такога водгуку бацька прыехаў у Мінск працаваць. Але паставіў мне ўмову: раз гэтую кашу заварыла, то павінна працаваць з ім. Я пагадзілася! Паспрабавала сябе ў ролі Снягуркі. Хаця, як мне тата нагадаў, першае маё выступленне ў вобразе было ў дзіцячым садку».
Салідарныя беларусы з кастрычніка мінулага года сталі замаўляць выступленні. Так за пяць дзён ва Уладзіміра назбіралася больш за пяцьдзясят заказаў.
«Мы пачыналі а 10-й раніцы і сканчалі а 10-й вечара, — гаворыць Аляксандра. — Летась людзі пастукаліся да нас у пачатку лістапада. Нам напісала сям’я, якая ў нас замаўляла выступленне яшчэ пазалетась».
Самым незвычайным, запамінальным і атмасферным выступам для Дзеда Мароза сталі сацыяльныя ёлкі для дзяцей з дзіцячых дамоў.
«Гэта такія добрыя ўспаміны, якія ёсць не ў кожнага Дзеда Мароза. Сам пісаў сцэнар для гэтых ёлак, — кажа Уладзімір. — Яшчэ былі ёлкі для мам, якія хацелі вярнуць сваіх дзяцей. Яны ў нас у выступах гралі персанажаў.
Былі і смешныя выпадкі. Адзін раз, калі прыйшоў час запальваць ёлку, мяне раптам за футра пачало тузаць дзіця са словамі: «Трэба ў разетку ўключыць!» Яны вось усё разумеюць, але вераць у казку і цуд.
Канешне, ёсць дзеці, якія не вераць у Дзеда Мароза. А ёсць тыя, што глядзяць і кажуць: «А вось ён у валёнках — значыць сапраўдны». У іх жа ідзе раздваенне асобы, бачаць шмат Дзядоў Марозаў і яны спрабуюць знайсці самага сапраўднага».
Водгукаў Дзеду Марозу Уладзіміру і Снягурцы Аляксандры прыходзіць шмат. У асноўным дзякуюць дзеці.
«Аднойчы пасля нашага прыходу сямігадовае дзіця сказала маці: «Нейкі занадта сапраўдны Дзед Мароз». Для нас гэта было вельмі прыемна. Нам яшчэ важна, каб дарослыя таксама пагрузіліся ў казачную атмасферу. І нам удаецца дастукацца да сэрцаў», — кажа Снягурка.
Уладзімір апошнія дзесяць гадоў працуе 31 снежня, адзначае Новы год — 2 студзеня. А вось Снягурка ў ноч з 31 на 1 студзеня не працуе.
«Мой навагодні марафон пачынаецца 19 снежня і працягваецца да 7 студзеня. У дзень па тры-чатыры казкі здараецца, — расказвае яна. — Але большасць людзей, вядома, жадаюць у нас замовіць выступ на вечар 31 снежня. Самы папулярны запыт.
Але, чым раней сустрэнецеся з Дзедам Марозам і Снягуркай, тым хутчэй у вас з’явіцца навагодні настрой. Многія заказчыкі ўжо пераходзяць на такі фармат. У нас усяго тры праграмы. Кароткая — 10 хвілін, падыходзіць для маленькіх дзяцей. Стандартная — 15-20 хвілін. Ужо ёсць гульня, паўнавартасны карагод, песенька. І ёсць праграма «поўнае пагружэнне» — паўнавартасны інтэрактыў. Прыходзіць спачатку Снягурка, потым клічам Дзеда Мароза, ёсць некалькі гульняў, спяваем песні, ёсць сюрпрыз, загадваем жаданне».
Кошты на выступленне ў Дзеда Мароза Уладзіміра і Снягуркі Аляксандры сярэднія па рынку. Кароткая праграма — ад 50 рублёў, стандартная — 80, вялікая — у залежнасці ад месца знаходжання заказчыка.
«Нам важна, каб людзі маглі падарыць сабе магчымасць запрасіць Дзеда Мароза і Снягурку незалежна ад свайго статусу», — кажа дзяўчына.
«Звычайна знаходзіцца нехта з залі, хто хоча занесці Снягурку куды-небудзь»
Дзеду Марозу Максіму 27 гадоў, Снягурцы Алене таксама. Выступаюць яны ўжо 10 гадоў. Ідэя працаваць Дзедам Марозам і Снягуркай нарадзілася падчас вучобы ў ВНУ, дзе яны вучыліся на акцёраў.
«Вось неяк так і пачалі працаваць Дзедам Марозам і Снягуркай як з дарослымі на карпаратывах, так і з дзецьмі, — гаворыць Алена. — Звычайна Мінск пачынае гуляць з 10 снежня. І тады заказаў шмат. Праўда, летась з-за пандэміі іх было значна менш. У гэтым годзе ўжо прасцей».
31 снежня Дзед Мароз Максім і Снягурка Алена звычайна працуюць. І гэта для іх выдатны спосаб сустрэць Новы год.
«Святкуем з сям’ёй звычайна 1 студзеня. Куранты сустракаем ці на карпаратыве, ці на нейкай адкрытай пляцоўцы. Гэтымі эмоцыямі зараджаемся на цэлы год. Дарэчы, у нас самыя смешныя выпадкі адбываюцца на карпаратывах, успамінае пара. — Звычайна знаходзіцца нехта з залі, хто хоча занесці Снягурачку куды-небудзь.
А таксама быў яшчэ выпадак, калі ў Дзеда Мароза скралі кій і хацелі прымусіць яго шмат разоў адціскацца ці каб Снягурка села на шпагат. Мне вельмі пашанцавала, што ў маім жыцці былі танцы, таму я без праблем села на шпагат. І кій вярнулі. Але ніхто не чакаў, што я гэта зраблю. Мне здаецца, што людзі ў зале нават крыху працверазелі. Гэта адзін з самых яркіх момантаў!»
Арыенціровачна ў Алены і Максіма выступ на карпаратыве каштуе 150 рублёў, выступ для дзяцей — ад 40 рублёў, але 31 снежня кошт падвойваецца.
«Напярэдадні Новага года бывае па некалькі карпаратываў запар, збіваемся з рахунку. Атрымоўваецца, што працуем ад раніцы да раніцы», — кажа Алена.
«Дзед Мароз забыў бараду ў садку, прыехаў на карпаратыў без яе. Выйшаў і сказаў: «Джылет — лепш для мужчыны нет!»
Дзеду Марозу Алегу — 55 гадоў, яго жонцы Снягурцы Алесе — 41. Першы раз Алеся выступіла ў вобразе Снягуркі ў 2003 годзе, калі ёй было 22 гады.
«Мяне запрасілі ў творчы калектыў, прапанавалі ролю Снягуркі. Мне спадабалася і праз год я ўжо была дасведчанай у гэтай справе, — расказвае Алеся. — Мне ў пару тады паставілі Дзеда Мароза Алега. Так мы пазнаёміліся. Потым так здарылася, што я на год з’ехала ў ЗША, тамака расталася са сваім папярэднім мужам, і, калі я вярнулася, з Алегам у нас закруціўся раман.
Пакуль я была ў дэкрэтным адпачынку, у Алега разладзіўся свой бізнэс. І пасля гэтага мы вырашылі прафесійна займацца святамі. Працуем не толькі Дзедам Марозам і Снягуркай, у нас сваё святочнае агенцтва. Фактычна гэта такая справа для душы».
Алеся працавала Снягуркай прыкладна да 30 гадоў, а потым сышла і пачала пісаць казкі для спектакляў.
«У маім разуменні ў творчым вобразе Снягуркі ёсць пэўны ўзрост. І ты гэта не схаваеш пад грымам. Падрасла наша старэйшая дачка, яна зараз асвойвае гэтую ролю. А Алег працуе ўжо сямнаццаць гадоў Дзедам Марозам. З вопытам», — кажа Алеся.
Смешных выпадкаў у святочным агенцтве ў Алесі было шмат. Напрыклад, аднойчы адзін з Дзядоў Марозаў вырашыў накарміць у дзіцячым садку дзяцей лімонамі.
«У нас быў праект «Школа Дзядоў Марозаў і Снягурак». Адзін раз такі Дзед Мароз-навічок вырашыў правесці конкурс «Хто хутчэй з’есць лімон» сярод дзяцей. У яго ў мяшку ляжалі лімоны, і ён вырашыў іх даць дзецям, — успамінае Алеся. — А яшчэ адзін раз Дзед Мароз забыў ў садку бараду, прыехаў на карпаратыў без яе. Выйшаў і сказаў: «Джылет — лепш для мужчыны нет!» Публіка пазітыўна ўсё ўспрыняла».
У мінулым годзе Алеся і Алег адкрылі новы праект — «Домік Дзеда Мароза», дзе Дзед Мароз стаў прымаць сем’і з дзецьмі індывідуальна.
«Гэта не рэзідэнцыя, а канкрэтныя індывідуальныя сустрэчы сям’і з Дзедам Марозам.
Сёлета на адкрыццё гэтага доміка да нас запісалася восем дарослых жанчын без дзяцей. Я вельмі здзівілася. Аказалася, што летась адна з іх напісала ліст Дзеду Марозу і намарыла там нешта неймавернае. І ў яе за год абсалютна ўсё збылося!» — расказвае жанчына.
Падарункі, па словах Алесі, Дзед Мароз дорыць самыя розныя і незвычайныя. Але самым запамінальным за ўвесь гэты час стаў заручальны пярсцёнак.
«Летась была замова на Дзеда Мароза, які павінен быў прыйсці апоўначы і зрабіць прапанову дзяўчыне. Гэта быў самы незвычайны падарунак!», — кажа Алеся.
Заказы на Дзеда Мароза, па словах жанчыны, у іх пачынаюцца ў пачатку снежня і доўжацца да 7 студзеня.
«Да пандэміі за снежань мы маглі паказаць каля 100 казак, у мінулым годзе ўсяго 4. І ў гэтым годзе таксама. Яшчэ прыдумалі рабіць віншаванне анлайн ад Дзеда Мароза і прыйшла ідэя з домам Дзеда Мароза. Антыкавідны такі варыянт, — гаворыць Алеся. — Большасць людзей хочуць замовіць выступ Дзеда Мароза і Снягуркі 31 снежня, але Дзед Мароз не гумовы і браць усе заказы на гэты дзень не атрымліваецца.
Дзед Мароз Алег бывае ўжо поўнасцю распісаны па часе ў канцы кастрычніка. Некаторыя заказчыкі замаўляюць адразу пасля выступу на наступны год.
Самы насычаны час у нас з 20 снежня да 7 студзеня. 31 снежня мы працуем заўсёды. Калі я з’ехала ў ЗША, гэта быў адзіны раз, калі не працавала Снягуркай. Памятаю, што мне гэтага вельмі не хапала. Успамінала той драйв. Усё ж людзі больш шчаслівыя, калі даюць, а не калі бяруць.
А ў сямейным коле мы сядзім звычайна 1 студзеня. Мне зусім не сумна, што мы працуем 31 снежня, а наадварот. Сканчаем каля трох гадзін ночы і едзем дадому шчаслівыя».
Кошты на выступ у Дзеда Мароза Алега і Снягуркі вышэй за сярэднія. Алеся лічыць, што яны адпавядаюць якасці і прафесіяналізму акцёраў.
«Тут важна ўсё: і досвед, і голас, і касцюм, і нават барада. Цяпер пайшла нейкая тэндэнцыя з разраду Дзед Мароз выходзіць на выступ у футры і ў джынсах. Я прасоўваю ідэю ўсё ж класічнага Дзеда Мароза, — лічыць жанчына. — Для выступаў у рэстаране ў нас ёсць розныя прышпільныя вобразы, але з дзецьмі ў нас заўсёды класічны. Барада ў нас з воласа яка, і яна выглядае зусім інакш — па-сапраўднаму. Пад футра наш Дзед Мароз апранае белы спартовы касцюм. Усё прадумана».
Чытайце таксама: Дарэвалюцыйны, савецкі, нестандартны і незвычайны «Аліўе». Праверце, ці ёсць у спісе ваш хатні рэцэпт
«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць38
Каментары