Расійскі баксёр і дэпутат Валуеў прыехаў у Жабінку і паблытаў Беларусь з Бранскай вобласцю
Экс-чэмпіён свету па боксе, а зараз дэпутат і актыўны прапагандыст вайны супраць Украіны пагутарыў з выхаванцамі баксёрскай школы ў Жабінцы.
Валуеў прыехаў у Жабінку ў байцы з расійскім сцягам і з надпісамі «Радзіма» і «Вялікая Святая Русь» чамусьці па-англійску.
Экс-чэмпіён свету расказаў юным беларускім спартсменам, як прыйшоў у бокс, паразважаў, у чым сакрэт поспеху і сэнс жыцця, а таксама паказаў ім некалькі прыёмаў. Пасля гутаркі Валуеў фатаграфаваўся з дзецьмі, некаторым, акрамя чырвона-зялёных, далі расійскія сцяжкі.
Цікава, што ў відэа для сваіх сацсетак Валуеў дапусціў агаворку:
«Дзякуй вялікі ўсім арганізатарам, школе бокса і, вядома, федэрацыі бокса Бранскай… ой, прабачце, Беларусі за запрашэнне».
На заканчэнне старшыня мясцовага райвыканкама Андрэй Кузьміч уручыў Валуеву «сімвалічны падарунак, які падкрэслівае сяброўства і адзінства Беларусі і Расіі».
Дарэчы, Валуеў раней заяўляў, што «саюз Беларусі і Расіі непарушны», а беларусы і рускія — «адзін народ, змацаваны агульнай гісторыяй».
Валуеў пабудаваў паспяховую баксёрскую кар'еру, быў чэмпіёнам свету ў цяжкай вазе. Пасля таго, як кінуў спорт, ён быў акцёрам, тэлевядучым, потым падаўся ў палітыку. Валуеў з'яўляецца дэпутатам Дзярждумы ад «Адзінай Расіі» і актыўным прыхільнікам Уладзіміра Пуціна.
За публічную падтрымку вайны супраць Украіны ён унесены ў санкцыйныя спісы Еўрасаюза і ЗША.
Хтосьці стварыў фальшывы сайт КДБ і цішком збіраў даносы1
Каментары