«Часнок, цыбуля, агуркі, памідоры — усё пад вадой. Шкада працы!» Вёску ў Ельскім раёне затапіла
Жарты пра беларускую Венецыю і гандолы ў жыхароў вёскі Роза Люксембург у Ельскім раёне не выклікаюць усмешкі. Пад ваду сышлі прыватныя агароды і калгаснае поле. Плавае нават мэбля ў дамах. Вяскоўцы абвінавачваюць мясцовыя ўлады.
У некаторых месцах населенага пункта немагчыма прайсці нават у гумовых ботах. Некалькі відэа з вёскі Роза Люксембург на Ельшчыне выклаў у тыкток блогер, які пазначыў, што затапленне адбылося 13 чэрвеня. Найбольш папулярны ролік пачынаецца з таго, як мясцовая жанчына (аўтар называе яе баба Зіна) вельмі эмацыянальна размаўляе з кімсьці за кадрам — меркавана, з прадстаўніком Ельскага прадпрыемства меліярацыйных сістэм.
— Уся рэспубліка будзе ведаць, я размажу ваш Ельскі ПМС! — абураецца жанчына.
Нябачны суразмоўца спрабуе нясмела апраўдацца:
— Анатольеўна, вы думаеце, адны? Я ўчора з 6 раніцы да 9 вечара…
— Што вы там у кабінетах? І бухгалтэрыі граблі дайце, хай грабуць!
Вяскоўцы з жалем і сумам глядзяць на затопленыя гароды. Тая сама баба Зіна спрабуе прайсці па найбольш затопленых месцах, але кажа, што далей не пойдзе, бо вады вышэй за калена.
— Ну а што рабіць, што рабіць? Усё прападзе, — безнадзейна ўздыхае жанчына. — Працы шкада, столькі ж уклалі. Часнок, цыбуля, агуркі, памідоры — усё пад вадой. Душа баліць.
Жанчына дадае, што калгаснае поле — збожжавыя, кукуруза — таксама затоплена. У тым, што адбылося, мясцовыя абвінавачваюць Ельскае ПМС. У каментарыях аўтар відэа тлумачыць, што былі дажджы, абводныя каналы засмеціліся, службы іх не чысцілі і чамусьці не адчынялі шлюзы для таго, каб вада сцякала ў раку.
За дзень ролік набраў больш за 700 тысяч праглядаў.
Год таму была падарваная Кахоўская ГЭС. Што цяпер адбываецца на гэтых тэрыторыях ва Украіне і якая будучыня іх чакае?
У доме на Альшэўскага ў Мінску затапіла дзесяць кватэр — вада лілася нават з разетак
У затапленні дарогі ў Мінскай вобласці вінаватыя бабры — МНС
У Мінскай вобласці затапіла дарогу і размыла абочыны
Каментары