Рускі народны сабор на чале з патрыярхам Кірылам абвясціў вайну з Украінай «свяшчэннай»
Удзельнікі так званага «Сусветнага рускага народнага сабору» пад старшынствам патрыярха Кірыла прынялі «наказ», у якім апісалі расійскае ўварванне ва Украіну як «свяшчэнную вайну». Узгадалі і Беларусь. Дакумент апублікаваны на афіцыйным сайце Маскоўскай Патрыярхіі.
Сабор, які 27 сакавіка праходзіў у маскоўскім храме Хрыста Збавіцеля, назваў «спецыяльную ваенную аперацыю» (як расійскія ўлады называюць вайну ва Украіне) «новым этапам нацыянальна-вызваленчай барацьбы рускага народа супраць злачыннага кіеўскага рэжыму і калектыўнага Захаду, які стаіць за ім».
«З духоўна-маральнага пункту гледжання спецыяльная ваенная аперацыя з'яўляецца свяшчэннай вайной, у якой Расія і яе народ, абараняючы адзіную духоўную прастору Святой Русі, выконваюць місію «ўтрымліваючага», што абараняе свет ад націску глабалізму і перамогі Захаду, які ўпаў у сатанізм», — гаворыцца ў выніковым дакуменце, які называецца «наказ».
У ім таксама сказана, што «пасля завяршэння СВА ўся тэрыторыя сучаснай Украіны павінна ўвайсці ў зону выключнага ўплыву Расіі».
«Магчымасць існавання на дадзенай тэрыторыі русафобскага, варожага Расіі і яе народу палітычнага рэжыму, а роўна палітычнага рэжыму, кіраванага з варожага Расіі знешняга цэнтра, павінна быць цалкам выключана».
Такім чынам, прыняты з'ездам дакумент фактычна заклікаў да поўнага знішчэння Украіны як суверэннай краіны.
«Межы рускага свету як духоўнага і культурна-цывілізацыйнага феномену істотна шырэйшыя за дзяржаўныя межы як цяперашняй Расійскай Федэрацыі, так і вялікай гістарычнай Расіі», — не абмяжоўваючы сябе межамі, піша праваслаўны з'езд.
У выніковым дакуменце ўзгадалі не толькі ўкраінцаў, але і беларусаў, уз'яднанне з якімі рускія праваслаўныя абвясцілі прыярытэтам.
«Уз'яднанне рускага народа павінна стаць адной з прыярытэтных задач знешняй палітыкі Расіі. Расіі варта вярнуцца да існуючай больш за тры стагоддзі дактрыне трыадзінства рускага народа, згодна з якой рускі народ складаецца з вялікаросаў, маларосаў і беларусаў, якія з'яўляюцца галінамі (субэтнасамі) аднаго народа, а паняцце «рускі» ахоплівае ўсіх усходніх славян — нашчадкаў гістарычнай Русі», — заяўляюць удзельнікі нарады.
Чытайце таксама:
У Мінску затрымалі гісторыка царквы Іллю Вішнеўскага
Жыхарцы Магілёва пагражаюць крыміналкай за тое, што зняла ранішнюю чаргу ў рэгістратуру3
Каментары