Беларуса, затрыманага ў Славакіі, пастанавілі вызваліць з закрытага лагера для іншаземцаў
Адміністрацыйны суд у Кошыцэ (Славакія) пастанавіў вызваліць з «Цэнтра ўтрымання іншаземцаў» беларуса Дзмітрыя Лукомскага 25 лістапада. Раней ён знаходзіўся ў адкрытым лагеры і прасіў прытулку ў Славакіі, але 18 кастрычніка Лукомскага там затрымала паліцыя, піша «Радыё Свабода».
У 2020 годзе жыхар Гомеля Дзмітрый Лукомскі неаднаразова трапляў у ізалятар часовага ўтрымання з палітычных прычын. Пасля ён з'ехаў з Беларусі і жыў ва Украіне.
У 2024 годзе вырашыў пераехаць у Славакію. Там разам са сваёй сяброўкай Віялетай Майшук яны падалі заяву на прытулак. Пару ўтрымлівалі ў адкрытым лагеры. Дзмітрый быў незадаволены ўмовамі ў лагеры — харчаваннем, рэжымам, абмежаваннямі — і пісаў скаргі. Урэшце 18 кастрычніка яго затрымала паліцыя і змясціла ў «Цэнтр утрымання іншаземцаў».
Беларус палічыў такую меру неабгрунтаванай і праз юрыстку падаў скаргу ў суд.
«Па сутнасці, гэта той жа беларускі ізалятар часовага ўтрымання — усюды ходзіш пад канвоем, няма права нічога мець свайго, нават ручкі. Адзенне забралі, я ледзь выбіў частку назад, але куртку так і не аддалі, быў вымушаны хадзіць на прагулкі без курткі, у тапках», — расказаў Дзмітрый Лукомскі.
Паводле слоў Лукомскага, суд пастанавіў вызваліць яго з «Цэнтра ўтрымання іншаземцаў» закрытага тыпу. Дзмітрый паведаміў, што суд стаў на ягоны бок і прызнаў, што дзеянні паліцыі па яго змяшчэнні ў Цэнтр былі празмернымі, а ў яго паводзінах у адкрытым лагеры не было ніякіх правапарушэнняў або злачынстваў.
«Суд пастанавіў, што паліцыя неправамерна працягнула мне тэрмін утрымання ў Цэнтры яшчэ на тры месяцы — да лютага», — дадаў беларус.
Лукомскі адзначае, што з-пад варты яго пакуль не адпусцілі. Паводле працэдуры, на перасылку пісьмовай пастановы суда ў Цэнтр адводзіцца да 7 дзён. Калі гэта адбудзецца, Дзмітрыя перавядуць назад у адкрыты лагер, дзе ён будзе чакаць рашэння па атрыманні абароны. Калі ж паліцыя абскардзіць пастанову суда, то справа можа зацягнуцца, і ўвесь гэты час беларусу давядзецца знаходзіцца ў закрытым лагеры.
Кубракоў даводзіў, што міліцыянт Згірскі не датычны да банды налётчыкаў. Цяпер таго судзяць — пагражае да 20 гадоў3
Каментары
Гэтую Сьвятую Вялікую Літву баранілі нашыя прадзеды - ваяры , і шляхцічы , і сяляне , і мяшчане .
Пазіраюць яны на беларусау́ і сьлёзы бязсільля у́ іхных вачох .
Каго яны бачаць ?!
Здраднікау́ і баязьліу́цау́ , якія паразьбягаліся па Сьвеце і просяць у́ ворагау́ хлеба .
Ганьба , спадарства .