Беларус, якога арыштавалі ў Арменіі праз вышук на радзіме, перадаў ліст з турмы
Яраслава Новікава затрымалі ў Арменіі 2 лютага, калі ён прыехаў з Грузіі. Да гэтага Беларусь абвясціла яго ў міжнародны вышук і абвінаваціла ва ўхіленні ад вайсковай службы. «Медыязона» паразмаўляла з затрыманым і яго адвакатам пра перспектыву выправаджэння ў Беларусь і ўмовы ў зняволенні.
Умовы ў камеры «нядрэнныя», затрыманне прайшло «спакойна»
Яраслаў Новікаў з'ехаў з Беларусі вясной 2023 года. Жыў у Грузіі і выехаў у Арменію, каб зрабіць балгарскую візу — у Грузіі яму гэта не ўдалося. 2 лютага пры ўездзе яго затрымалі. Цяпер Новікава ўтрымліваюць у крымінальна-выканаўчай установе «Ванадзор» за 120 кіламетраў ад Ерэвана.
Беларус распавёў «Медыязоне», што затрыманне прайшло «вельмі спакойна»: без кайданкоў і грубасцяў.
— Размаўлялі на рускай. Аператыўнікі падбадзёрвалі: не асуджалі за тое, што з'ехаў, а, наадварот, казалі, што правільна зрабіў.
Умовы ў камеры, куды Новікава змясцілі, называе «нядрэннымі»: чатыры спальныя месцы, стол, дзве лаўкі, драўляная падлога, аблезлыя сцены і «страшненькі» туалетны пакой. У камеры ёсць тэлевізар і халадзільнік. Адвакат беларуса Араік Папікян запэўніў, што стаўленне ў «Ванадзоры» да Яраслава «нармальнае», «з харчаваннем таксама ўсё ў парадку — ён ні разу не скардзіўся».
— Першыя пяць дзён я правёў адзін, але потым падсялілі Максіма, які трапіў у такую ж сітуацыю. Максім Вайткявічус працуе тэсціроўшчыкам, таксама скончыў МДЛУ. Пасля выпуску з'ехаў у Грузію. У Ерэван Максім ехаў на канцэрт, не падазраючы што нешта можа пайсці не так, бо да гэтага ён ужо бываў у Арменіі пасля пераезду. Пазней мы зразумелі, што нас абодвух абвясцілі ў міждзяржаўны вышук восенню 2023, хоць Максім з'ехаў вясной 2022, а я — вясной 2023, — распавёў Новікаў.
У базе даных вышуку МУС Расіі Яраслава Новікава не ўдалося знайсці. Аднак «Медыязона» знайшла ў ёй яго сукамерніка Максіма. У базе не пазначаны артыкул, па якім шукаюць 23-гадовага беларуса.
Сілавікі прыходзілі да бацькоў у Беларусі і прасілі зрабіць фотапрызнанне віны
— З'язджаючы, я разумеў, што справа будзе заведзеная, але перспектыва жыць і працаваць мне бліжэй, чым трапленне калі не пад мабілізацыю, то пад вельмі ціхую, але актыўную да яе падрыхтоўку, якая, я ўпэўнены, сёння мае месца быць.
Прадстаўнікі амбасады не звязваліся з затрыманымі беларусамі, хоць яны знаходзяцца ў «Ванадзоры» ўжо паўтара месяца. Яраслаў распавёў, што ў Беларусі да ягоных бацькоў «прыходзілі»:
— Казалі: «Калі ваш сын вернецца, нічога страшнага не адбудзецца. Ці зробіць фатаграфію, дзе прызнае віну (на паперцы прасілі напісаць), то вышук спыняць».
У лісце «Медыязоне» Новікаў звярнуўся «да ўсіх маладых людзей, якім пагражае паход у ваенкамат»:
— Калі ласка, падумайце тройчы перад паходам туды; і калі думаеце, што я лішні раз панікую, то паглядзіце на ўсе змены, звязаныя з войскам Беларусі, за 2023 год.
***
Адвакат Папікян даведаўся, што ў «Ванадзоры» ўтрымліваюцца чатыры беларусы, якіх шукаюць у Беларусі. У 2023 годзе вядомы толькі адзін такі выпадак: паўтара месяца не выпускалі з Арменіі Яўгена Гуцалава. У Беларусі ён абвешчаны ў вышук з-за абвінавачванняў па артыкуле аб здзеку над дзяржсімваламі.
Імёны астатніх затрыманых у Арменіі беларусаў невядомыя.
— Усё па адной і той жа схеме: перасеклі мяжу з Грузіі ў Арменію і армянскі бок затрымлівае, арыштоўвае, і цяпер ідзе працэс [вынясення рашэння] аб выдачы. Нікога яшчэ не выдавалі, але працэс ідзе поўным ходам, — кажа Папікян.
Абаронца верыць, што сітуацыя з Яраславам скончыцца добра. На ягоную просьбу аб дапамозе ў Офіс Святланы Ціханоўскай экс-амбасадар у Аргентыне Уладзімір Астапенка напісаў ліст у міграцыйную службу Арменіі, беларуская дыяспара ў Арменіі і некалькі праваабарончых арганізацый рыхтуюць свае заявы ў падтрымку Яраслава.
Каментары