У Гродне пабудуюць новы мікрараён — высоткі могуць сапсаваць від на Каложскую царкву
Хутка ў Гродне пачнуць узводзіць новы мікрараён «Залаты» на 6 тысяч жыхароў, з будынкамі вышынёй да 19 паверхаў. Ён будзе знаходзіцца непадалёк ад гістарычнага цэнтра і Каложскай царквы.
Новы мікрараён з'явіцца паміж праспектам Будаўнікоў, вуліцамі Вясенняй і Каліноўскага. Раней яго называлі «Вясенні», але летам 2023 года перайменавалі ў «Залаты». Забудова будзе рознаўзроўневай — ад 4 да 19 паверхаў.
Гродзенскі гісторык архітэктуры Мечыслаў Супрон лічыць, што новы мікрараён сапсуе панараму гістарычнага цэнтра Гродна, у тым ліку від на Каложскую царкву.
«Я больш чым перакананы, што ўзвядзенне новага квартала на фоне храма 12 стагоддзя — аднаго з галоўных кандыдатаў на трапленне ў спіс ЮНЕСКА ад Беларусі — можа негатыўна паўплываць на станоўчае рашэнне камісіі.
Па апублікаваных рэндарах складана дакладна ацаніць, наколькі моцна будзе сапсаваная панарама, але відавочна, што 15– і 19-павярховыя дамы ў пару кіламетрах ад Каложы будуць вельмі моцна выбівацца», — лічыць краязнаўца.
Калі глядзець на Каложу са старога моста, то нават цяпер можна заўважыць, як на фоне храма бачны дах 15-павярховага дома на рагу вуліц Каліноўскага-Вясенняй.
Адзін з трох 19-павярховых дамоў, якія плануюць пабудаваць, будзе стаяць непадалёк. Астатнія два дамы — яшчэ бліжэй да храма.
Краязнаўца не разумее, навошта 370-тысячнаму гораду дамы вышынёй у 19 паверхаў.
«Ці варта гораду расці ў вышыню, калі зямля ў абласным цэнтры не каштуе столькі, каб была патрэба ахвяраваць камфортам дзеля таго, каб размясціць больш кватэр?» — задаецца пытаннем Супрон.
Ён звяртае ўвагу, што ў параўнанні з рэндарамі, якія былі апублікаваныя ў 2021 годзе, колькасць кватэр і вышыня дамоў павялічыліся. У «Залатым» з’явіцца 2475 кватэр супраць 2284.
«Спачатку самымі высокімі мусілі быць 15-павярховыя дамы, што таксама не мала. Але ў выніку вырашылі пабудаваць тры 19-павярховыя «слупы» ўнутры мікрараёна, а 8-павярховы дом каля будучага кальца на выездзе да Новага моста замянілі 15-павярховым».
Падобная забудова не адпавядае сучасным еўрапейскім стандартам горадабудаўніцтва, гэта хутчэй азіяцкі стыль, кажа краязнаўца.
«У Польшчы і Літве ніхто цяпер не робіць такія спальныя раёны. У Еўропе будуюць 4-5-6-павярховыя жылыя дамы, ствараюць камфортнае асяроддзе, каб не перагружаць архітэктуру квартала. У суседзяў падобны квартал будзе разлічаны не на 6 тысяч, а на 2-3 тысячы жыхароў.
Таксама ў выпадку з «Залатым» застаецца пытанне, дзе жыхары будуць пакідаць машыны. Пад’езду да гэтых 19-павярховікаў няма, аўтамабілі трэба будзе пакідаць недзе ўздоўж квартала. Гэта нонсэнс, бо такія дамы мусяць мець пад сабой падземны паркінг на некалькі паверхаў уніз», — разважае Супрон.
Будаўніцтва падземных паркінгаў прадугледжвалася ў першапачатковым плане, але ў выніку вырашылі зрабіць паркоўкі вакол раёна.
Бондарава абрынулася на музей Янкі Купалы і мастака Сушу31
Каментары